ഒരു ഗുഹയ്ക്കകത്തുള്ള ലോകത്തിലെ ഏറ്റവും ആഴത്തിലുള്ള വിള്ളല്‍, ഇറ്റലി- സ്‌ലൊവേനിയ അതിര്‍ത്തിയിലുള്ള ജൂലിയന്‍ ആല്‍പ്‌സ് പര്‍വത നിരകളിലാണ്. കുത്തനെ, കിണറു പോലെയുള്ള ഒരു വിള്ളല്‍ അവിടെയാണുള്ളത്. 603 മീറ്ററാണ് ഇതിന്റെ ആഴം. ഒരാള്‍ അറിയാതെയെങ്ങാനും ഇതിലേക്കു വീണാല്‍ താഴെയെത്തണമെങ്കില്‍ 11 സെക്കന്‍ഡെടുക്കും. എന്നാല്‍ റഷ്യയിലെ ഒരു കുഴിയെപ്പറ്റി കേട്ടാല്‍ 'ഇതൊക്കെ എന്ത്' എന്നു തോന്നിപ്പോകും. ഭൂമിക്കടിയിലേക്ക് 12 കിലോമീറ്റര്‍ ആഴത്തിലാണ് ഈ കുഴി. കൃത്യമായിപ്പറഞ്ഞാല്‍ 12,262 മീറ്റര്‍. കുത്തനെയുള്ള കുഴികളില്‍ ലോകത്തില്‍ ഏറ്റവും ആഴമുള്ളതാണിത്.

സാധാരണ ഗതിയില്‍ ഇത്രയേറെ ആഴത്തിലൊക്കെ കുഴിയെടുക്കണമെങ്കില്‍ അത് എണ്ണഖനനത്തിനായിരിക്കും. എന്നാല്‍ റഷ്യയുടെ ലക്ഷ്യം അതായിരുന്നില്ല. ഭൂമിക്കിടയില്‍ യഥാര്‍ഥത്തില്‍ എന്താണെന്നു കണ്ടെത്തുകയെന്ന ഗവേഷണത്തിന്റെ ഭാഗമായിട്ടായിരുന്നു ഈ ഡ്രില്ലിങ്. 1970 മേയ് 24-നാണ് കോല പെനിന്‍സുലയില്‍ ഗവേഷണത്തിന്റെ ഭാഗമായുള്ള ഡ്രില്ലിങ് ആരംഭിച്ചത്.

പതിയെപ്പതിയെ കുഴിയെടുത്ത് 15 കി.മീ. ആഴത്തില്‍ കുഴിയെടുക്കുകയായിരുന്നു ലക്ഷ്യം. അങ്ങനെ കുഴിച്ചു കുഴിച്ച് 1989-ല്‍ ഈ കുഴി 12 കി.മീറ്ററെത്തി ലോക റെക്കോര്‍ഡിട്ടു. ഈ കുഴിക്കു വേണ്ടി തയാറാക്കിയ ഡ്രില്ലിങ് ഉപകരണങ്ങളും ലോകത്തിനു മുന്നില്‍ ഇന്നും അദ്ഭുതമാണ്. സാങ്കേതികവിദ്യ അത്രയൊന്നും വികസിച്ചിട്ടില്ലാത്ത കാലത്താണ് ഇതെല്ലാമെന്നും ഓര്‍ക്കണം. ആ വര്‍ഷം തന്നെ വീണ്ടും കുഴിച്ച് നീളം 13.5 കി.മീറ്ററിലെത്തിക്കാനായിരുന്നു നീക്കം. തൊട്ടടുത്ത വര്‍ഷം അവസാനത്തോടെ 15 കി.മീറ്ററും.

പക്ഷേ 12 കിലോമീറ്റര്‍ കഴിഞ്ഞതും പണി കിട്ടി. ചുട്ടുപഴുത്ത പാറക്കല്ലുകളായിരുന്നു അവിടെ ഗവേഷകരെ കാത്തിരുന്നത്. അതായത്, ഏകദേശം 180 ഡിഗ്രി സെല്‍ഷ്യസ്. അതോടെ ഗവേഷണം അവിടെവച്ചു നിര്‍ത്തേണ്ടി വന്നു. കോല സൂപ്പര്‍ഡീപ്പ് ബോര്‍ഹോള്‍ എന്നറിയപ്പെടുന്ന ഈ കുഴിക്ക് വാവട്ടം കുറവാണ്. വ്യാസം വെറും 23 സെ.മീ. അതുകൊണ്ടു തന്നെ മനുഷ്യന്‍ ഇതിലേക്കു വീഴാനും സാധ്യത കുറവ്. അഥവാ എന്തെങ്കിലുമൊരു വസ്തു ഇതിലേക്കിട്ടാല്‍ അത് അടിത്തട്ടിലെത്തണമെങ്കില്‍ 50 സെക്കന്‍ഡെങ്കിലും എടുക്കും.

1995-ല്‍ ഡ്രില്ലിങ് അവസാനിപ്പിച്ചതിനു ശേഷം കാഠിന്യമേറിയ ഇരുമ്പുകവചം കൊണ്ട് മൂടിയിട്ടിരിക്കുകയാണ് കോല ബോര്‍ഹോള്‍. ആര്‍ക്കും തുറക്കാനാകാത്ത വിധമാണ് ഈ അടച്ചിടല്‍. പരീക്ഷണം ഉപേക്ഷിച്ച ശേഷം ഇവിടേക്ക് ആരും തിരിഞ്ഞു നോക്കാതായി. പരീക്ഷണ സമയത്ത് നിര്‍മിച്ച കെട്ടിടങ്ങളെല്ലാം തകര്‍ന്നു. ഇരുമ്പുകഷണങ്ങളും മറ്റും ചിതറിക്കിടക്കുന്നതിനിടയില്‍ ആരുടെയും ശ്രദ്ധയില്‍പ്പെടാത്ത വിധമാണ് ഇപ്പോള്‍ ഈ 'ആഴക്കുഴി' അടച്ചിട്ടിരിക്കുന്നത്.

ഇടയ്‌ക്കൊക്കെ ആരെങ്കിലും കൗതുകം കാരണം ഇവിടം കാണാന്‍ വന്നാലായി! എന്നാല്‍ ഈ കുഴിയില്‍ നിന്നു ഗവേഷകര്‍ക്കു ലഭിച്ചത് അദ്ഭുതപ്പെടുത്തുന്ന വിവരങ്ങളായിരുന്നു. 12 കി.മീ. താഴെയും വെള്ളമുണ്ടെന്നതായിരുന്നു അതിലൊന്ന്. എന്നാല്‍ അത് ഭൂമിക്കടിയിലെ ധാതുക്കളുടെ പ്രവര്‍ത്തനം കൊണ്ടുണ്ടായതാണ്. മുകളിലേക്കു തനിയെ വരാനും സാധിക്കില്ല, കട്ടിയേറിയ പാറകള്‍ തടയുന്നതാണു കാരണം.

ഭൂമിക്കടിയില്‍ 6 കി.മീ. ആഴത്തില്‍ സൂക്ഷ്മജീവികളായ 'പ്ലാങ്ക്ടണുകളുടെ' ഫോസിലുകള്‍ ലഭിച്ചതാണു മറ്റൊരു കാര്യം. ഇത്തരത്തില്‍ പ്രാചീന കാലത്തെ 24 സൂക്ഷ്മജീവികളുടെ ഫോസിലുകളാണു കണ്ടെത്തിയത്. 270 കോടി വര്‍ഷം പഴക്കമുള്ള പാറകളുടെ സാംപിളും ലഭിച്ചു ഗവേഷകര്‍ക്ക്. പക്ഷേ ആ പാറകളാണു 'പണി' തന്നതും. സഹിക്കാനാകാത്ത ചൂടായിരുന്നു അവയ്‌ക്കെല്ലാം. അതോടെ ഡ്രില്ലിങ്ങും നിലച്ചു.

പക്ഷേ എത്രയൊക്കെ കുഴിച്ചാലും ഭൂമിയുടെ നടുവിലേക്ക് ഗവേഷകര്‍ക്ക് എത്താനാകില്ലെന്നതാണു സത്യം. 6371 കി.മീ താഴെയാണ് ഈ നടുഭാഗം. അങ്ങനെ നോക്കുമ്പോള്‍ ഭൂമിയുടെ കേന്ദ്രത്തിലേക്കുള്ള കുഴിയെടുക്കലില്‍ 0.002 ശതമാനം മാത്രമേ 'കോല'യിലൂടെ ഗവേഷകര്‍ പൂര്‍ത്തിയാക്കിയിട്ടുള്ളൂ!