19-ാം നൂറ്റാണ്ടിലെ കാല്‍പ്പനിക കവികളില്‍ പ്രമുഖനാണ് ഫ്രഞ്ച് കവി ചാള്‍സ് ബോദ്‌ലെയര്‍. കാല്‍പ്പനിക കവിതകള്‍ക്ക് പുതിയ മുഖം നല്‍കിയ അദ്ദേഹത്തിന്റെ കവിതകളില്‍ പച്ചയായ ജീവിതം തുടിച്ചിരുന്നു. 24-ാം വയസില്‍ ഗുരതരമായ സാമ്പത്തിക ബുദ്ധിമുട്ടുകളും പട്ടിണിയും സഹിക്കാനാകാതെ ആത്മഹത്യയ്ക്ക് ശ്രമിച്ചിരുന്നു കവി. അന്ന് പ്രിയ കാമുകിയുടെ അറിവിലേക്ക് എഴുതി വച്ച ആത്മഹത്യാക്കുറിപ്പ് കഴിഞ്ഞ ദിവസം ലേലം ചെയ്തു. ലേലത്തില്‍ രണ്ടുകോടിയോളം രൂപയ്ക്കാണ് (234,000 യൂറോ) ആ കുറിപ്പ് വിറ്റുപോയത്. ഈ 21-ാം നൂറ്റാണ്ടിലും 19-ാം നൂറ്റാണ്ടില്‍ ജീവിച്ച് കടന്നു പോയ മഹാകവിയെ ലോകം നെഞ്ചോട് ചേര്‍ത്ത് സ്‌നേഹിക്കുന്നുവെന്നതിന്റെ സാക്ഷ്യപത്രം!

1845 ജൂണ്‍ 30-നാണ് ചാള്‍സ് ബോദ്‌ലെയര്‍ തന്റെ 24-ാം വയസില്‍ കാമുകി ഴീനെ ദുവലിന് കത്തെഴുതുന്നത്. ഞാന്‍ മരിക്കുകയാണ്. എനിക്ക് ജീവിച്ചിരിക്കാന്‍ അര്‍ഹതയില്ല. ഈ കത്ത് നിനക്ക് കിട്ടുന്നതിനു മുന്‍പ് ഞാന്‍ മരിച്ചിരിക്കുമെന്നും ബോദ്ലെയര്‍ കത്തില്‍ കുറിച്ചു. കത്തെഴുതിയതിനു തൊട്ടുപിന്നാലെ കത്തിക്കൊണ്ട് നെഞ്ചില്‍ കുത്തി മുറിവേല്‍പ്പിച്ച് കവി ആത്മഹത്യയ്ക്ക് ശ്രമിച്ചു. എന്നാല്‍ പരിക്കുകള്‍ ഗുരുതരമല്ലാത്താതിനാല്‍ അദ്ദേഹം ജീവിതത്തിലേയ്ക്ക് തിരിച്ചു വന്നു.

പിന്നീട് 22 കൊല്ലങ്ങള്‍ കൂടി കഴിഞ്ഞ് 46-ാം വയസില്‍ 1867-ലായിരുന്നു അദ്ദേഹത്തിന്റെ മരണം. അദ്ദേഹത്തിന്റെ അവസാന ദിനങ്ങള്‍ പരിതാപകരമായിരുന്നു താനും! പട്ടിണിയും മാനസികവൃഥകളും മാനസികവും ശാരീരകവുമായി ആരോഗ്യത്തെ ദുര്‍ബലമാക്കി. അമിതമായ തോതില്‍ മയക്കുമരുന്ന് ഉപയോഗിച്ചതും മരണം നേരത്തെയാക്കി. 1866-ല്‍ പക്ഷഘാതം വന്നതോടെ ശരീരം പൂര്‍ണമായി തളര്‍ന്നു. 1867-ല്‍ മരിച്ചു.

തിന്‍മയുടെ പുഷ്പങ്ങള്‍ - Les Fleurs du mal (ലെ ഫ്‌ല്യുഏഴ്‌സ് ദു മല്‍/ദ ഫ്‌ലവേഴ്‌സ് ഓഫ് ഈവിള്‍) എന്ന കൃതിയാണ് ബോദ്‌ലെയറെ പ്രസിദ്ധിയുടെ കൊടുമുടിയില്‍ എത്തിച്ചത്. സംഘാടകര്‍ പ്രതീക്ഷിച്ചതിനേക്കാള്‍ മൂന്നിരട്ടി തുകയ്ക്കാണ് ബോദ്‌ലെയറുടെ കത്ത് വിറ്റ് പോയതെന്ന് ഫ്രഞ്ച് വെബ്‌സൈറ്റായ ഒസെനാറ്റ് അറിയിച്ചു. കത്ത് ലേലത്തില്‍ പിടിച്ച വ്യക്തിയുടെ പേര് പുറത്തു വിട്ടിട്ടില്ല.