ഫ്ളൈ ഡൈനിങ്ങ്; ഭക്ഷണം ആസ്വദിക്കാം 160 അടി ഉയരത്തില്
പുരാതനകാലത്തെ സപ്താത്ഭുതങ്ങളില് ഒന്നായിരുന്നു ബാബിലോണിയയിലെ തൂങ്ങുന്ന പൂന്തോട്ടം. വിവിധ തട്ടുകളായി ക്രമീകരിക്കപ്പെട്ടിരുന്ന ഈ പൂന്തോട്ടം ഏകദേശം 22 മീറ്റര് വരെ ഉയരത്തിലായിരുന്നു നിര്മിക്കപ്പെട്ടിരുന്നത്. ബി സി ഒന്നാം നൂറ്റാണ്ടിലുണ്ടായ ഒരു ഭൂകമ്പത്തില് തൂങ്ങുന്ന ഈ ഉദ്യാനം നാമാവശേഷമായെന്നാണ് ചരിത്ര രേഖകള് പറയുന്നത്. എന്തായാലും തൂങ്ങുന്ന പൂന്തോട്ടത്തിന്റെ കഥകള് അവിടെ അവസാനിച്ചു. ഈ ആധുനിക കാലത്തില് തൂങ്ങുന്ന ഒരു ഭക്ഷ്യശാലയാണ് കാഴ്ചക്കാരില് അദ്ഭുതങ്ങള് സൃഷ്ടിക്കുന്നത്.
ബെംഗളൂരുവിലെ തൂങ്ങുന്ന റെസ്റ്റോറന്റ് അതിഥികള്ക്കു സമ്മാനിക്കുന്നത് തടാകത്തിന്റെ ഭംഗി നുകര്ന്നു ആകാശത്തിലും ഭൂമിയിലുമല്ലാതെ മനോഹരമായ പ്രകൃതിയുടെ സൗന്ദര്യമാസ്വദിച്ചുകൊണ്ടു ഭക്ഷണം ആസ്വദിക്കുക എന്ന അനിര്വചനീയമായ അനുഭവമാണ്. ക്രയിന് ഉപയോഗിച്ച് ഒരു ഭക്ഷണ മേശ ഉയര്ത്തിയാണ് ഭക്ഷണം കഴിക്കാനെത്തുന്നവരെ റെസ്റ്റോറന്റ് അധികൃതര് വിസ്മയലോകത്തെത്തിക്കുന്നത്. 160 അടി ഉയരത്തില് സ്ഥിതിചെയ്യുന്ന തീന്മേശ 360 ഡിഗ്രിയില് കറങ്ങുകയും ചെയ്യും. നഗവര തടാകത്തിന്റെ സൗന്ദര്യം ആസ്വദിക്കുന്നതിനൊപ്പം മന്യത ടെക് പാര്ക്കിന്റെ കാഴ്ചകളും ഈ തൂങ്ങുന്ന ഭക്ഷ്യമേശയ്ക്കു ചുറ്റുമിരിക്കുമ്പോള് കണ്മുമ്പില് വന്നുനിറയും.
ഈ സ്കൈ ഡൈനിങ്ങ് റെസ്റ്റോറന്റ് സ്ഥിതി ചെയ്യുന്നത് ബംഗളൂരു നഗരത്തിന്റെ ഹൃദയഭാഗത്തുതന്നെയാണ്. ഒരേ സമയം 22 പേര്ക്ക് ഈ തീന്മേശയിലിരുന്നു ഭക്ഷണം ആസ്വദിക്കാം. ഒരു ടേബിള് മൊത്തമായോ ഒരു ഇരിപ്പിടം മാത്രമായോ ബുക്ക് ചെയ്യാനുള്ള സൗകര്യമുണ്ട്. സഹായങ്ങളുമായി റെസ്റ്റോറന്റ് ജീവനക്കാരും ഒരു ഫോട്ടോഗ്രാഫറും ഭക്ഷണ സമയത്തിലുടനീളം അതിഥികള്ക്കൊപ്പമുണ്ടാകും.
ഏറെ സമയം റെസ്റ്റോറന്റില് ചെലവഴിക്കാമെന്ന മോഹത്തോടെ ഈ ഭക്ഷ്യശാലയിലേക്കു ആരും കടന്നു വരണ്ട. മോക്ടെയില് കഴിക്കാനാണ് കയറുന്നതെങ്കില് അരമണിക്കൂര് മാത്രമാണ് അതിനായി അനുവദിക്കപ്പെട്ടിട്ടുള്ള സമയം. ഡിന്നറിനെങ്കില് ഒരുമണിക്കൂര് സമയം. ആകാശത്തിലെയും ഭൂമിയിലെയും കാഴ്ചകള് രുചിക്കൊപ്പം ആസ്വദിക്കാം. ഗ്രില്ഡ് ചിക്കെനും റൈസും മോക്ടെയിലും ഒരു ബൗള് നിറയെ പഴങ്ങളും അടങ്ങിയതാണ് ഡിന്നര്. സന്ദര്ശകര്ക്കു കണ്മുമ്പില്വെച്ചു ഭക്ഷണം തയ്യാറാക്കി നല്കുക എന്നതൊന്നും ഈ റെസ്റ്റോറന്റില് നടക്കില്ല. അതിഥികള് എത്തുമ്പോള് നേരത്തെ തയ്യാറാക്കിവെച്ചിരിക്കുന്ന ഭക്ഷണം വിളമ്പുക മാത്രമാണ് ഇവിടെ ചെയ്യുന്നത്. പക്ഷേ, ഒന്നോര്ക്കുക, ഇവിടെ ഭക്ഷണത്തേക്കാള് പ്രാധാന്യം, സ്കൈ ഡൈനിങ്ങിനാണ്.
ആകാശത്തിലും ഭൂമിയിലുമല്ലാതെ വായുവില് നിന്നുള്ള ഈ ആഹാരം കഴിക്കല് ചിലരിലെങ്കിലും എത്രമാത്രം സുരക്ഷിതമെന്ന സംശയമുണ്ടാക്കിയേക്കാം. സുരക്ഷയുടെ കാര്യത്തില് യാതൊരു ഭയത്തിന്റെയും ആവശ്യമില്ലെന്നാണ് റെസ്റ്റോറന്റ് അധികൃതര് ഉറപ്പുനല്കുന്നത്. വളരെ സുരക്ഷിതമായ രീതിയിലും ആധുനിക സാങ്കേതിക വിദ്യകള് ഉപയോഗിച്ചുമാണ് സീറ്റുകള് സജ്ജമാക്കിയിരിക്കുന്നത്. അതിഥികളെ സീറ്റില് ബന്ധിപ്പിക്കുകയും ചെയ്യും. നാലടി അഞ്ചിഞ്ച് പൊക്കമുള്ളവരെ മാത്രമേ ഇവിടെ ഭക്ഷണം കഴിക്കാനായി പ്രവേശിപ്പിക്കുകയുള്ളു. ശരീര ഭാരം അതെത്രയായലും കുഴപ്പമില്ല. മോക്ടെയിലിനു അതിഥികളുടെ കയ്യില് നിന്നും ഈടാക്കുന്ന തുക ഒരു വ്യക്തിയ്ക്ക് 3999 രൂപയാണ്. ഡിന്നറിനു 6999 രൂപയും. അവധി ദിവസങ്ങളില് ഈ തുക കുറച്ചുകൂടി ഉയരാനിടയുണ്ട്.
https://www.facebook.com/Malayalivartha