സൗദിയിലെ വര്‍ഷങ്ങള്‍ നീണ്ട പ്രവാസജീവിതം അവസാനിപ്പിച്ച് ഇന്ത്യയിലേക്കു മടങ്ങിയയാളെ സൗദി കുടുംബാംഗങ്ങള്‍ യാത്രയാക്കുന്നതിന്റെ ദൃശ്യങ്ങള്‍ സോഷ്യല്‍മീഡിയയുടെ കണ്ണു നനയിക്കുന്നു.

വടക്കന്‍ സൗദിയിലെ അല്‍ ജോഫിലുള്ള ഒരു വീട്ടില്‍ മിഡോ ഷെരിന്റെ കഴിഞ്ഞ 35 വര്‍ഷക്കാലത്തെ ജോലി വീട്ടിലെ കൃഷി നോക്കുക, സഞ്ചാരികള്‍ തങ്ങുന്ന റസ്റ്റ് ഹൗസില്‍ കാപ്പിയും ചായയും വിതരണം ചെയ്യുക എന്നിവയൊക്കെ ആയിരുന്നു. പ്രായാധിക്യത്താല്‍ ഇനിയുള്ള കാലം വിശ്രമത്തിനായി സ്വന്തം നാട്ടിലേക്ക് മടങ്ങുവാന്‍ തീരുമാനിച്ച ഇദ്ദേഹത്തെ യാത്രയാക്കുവാന്‍ വലിയ ആഘോഷമാണ് കുടുംബം സംഘടിപ്പിച്ചത്.

അദ്ദേഹം മടങ്ങുമ്പോള്‍ കൈ നിറയെ പണം നല്‍കിയതിനു പുറമെ ഇനിയുള്ള കാലം അദ്ദേഹത്തിന് എല്ലാ മാസവും പെന്‍ഷനും ഈ വീട്ടുകാര്‍ നല്‍കും. മിഡോ ഞങ്ങളുടെ കുടുംബത്തോട് എന്നും ആത്മാര്‍ത്ഥത പുലര്‍ത്തിയിരുന്നുവെന്നാണ് ഇദ്ദേഹം ജോലി ചെയ്തിരുന്ന വീട്ടിലെ അംഗമായ അവാദ് ഖുഗൈര്‍ അല്‍ റെമില്‍ അല്‍ ഷെമീരി പറയുന്നത്.

മാത്രമല്ല അദ്ദേഹം ഞങ്ങളുടെ കുടുംബത്തിലെ എല്ലാവരോടും വളരെ നല്ല രീതിയിലാണ് പെരുമാറിയിരുന്നത്. ഞങ്ങളും കുടുംബത്തിലെ ഒരാളെ പോലെയാണ് മിഡോയെ കരുതിയിരുന്നതെന്നും അവാദ് ഖുഗൈര്‍ ട്വിറ്ററിലൂടെ വ്യക്തമാക്കി.