കാലങ്ങള്‍ പലതു കഴിഞ്ഞിട്ടും കാര്യമായ മാറ്റമൊന്നും പരീക്ഷിക്കാത്ത ഒരു മേഖലയാണ് ശവപ്പെട്ടികളുടെ വൈവിധ്യവല്‍ക്കരണം . ശവപ്പെട്ടിയുടെ നിര്‍മാണത്തിലും ആകൃതിയിലുമൊക്കെ ഒരു സ്റ്റൈലൊക്കെ കൊണ്ടുവന്നാലെന്താ എന്ന് ആരും കാര്യമായി ചിന്തിച്ചിട്ടില്ല.

എന്നാല്‍ ആഫ്രിക്കന്‍ രാജ്യമായ ഘാനയില്‍ കാര്യങ്ങള്‍ ഇങ്ങനെയല്ല. ഇവിടെ മരിച്ച തങ്ങളുടെ പ്രിയപ്പെട്ടവര്‍ക്ക് അവരിഷ്ടപ്പെടുന്ന രീതിയിലുള്ള യാത്രയയപ്പ് നല്‍കണമെന്നുള്ളത് നിര്‍ബന്ധമുള്ള കാര്യമാണ്. അതുകൊണ്ടുതന്നെ മൃതസംസ്‌കാര ചടങ്ങുകളൊക്കെ ദിവസങ്ങളോളം നീണ്ടുപോകാറുണ്ട്.

ഘാനയില്‍ മൃതസംസ്‌കാരത്തിന് ഉപയോഗിക്കുന്ന ശവപ്പെട്ടികള്‍ക്ക് വളരെയേറെ പ്രത്യേകതകളുണ്ട്. മരിച്ചയാളുടെ ജീവിതശൈലിയും,സ്വപ്നങ്ങളും, ആഗ്രഹങ്ങളും സമൂഹത്തിലെ അയാളുടെ സ്ഥാനവുമൊക്കെ ആ ശവപ്പെട്ടി പ്രതിഫലിപ്പിക്കും.

ആളുകളുടെ ആവശ്യപ്രകാരം വിവിധ ആകൃതിയിലും നിറത്തിലുമൊക്കെയുള്ള ശവപ്പെട്ടികള്‍ നിര്‍മിച്ചു നല്‍കുന്ന കടകള്‍ ഘാനയിലുണ്ട്. ലോകത്തിലെ ഏറ്റവും വലിയ കൊക്കോ ഉത്പാദക രാജ്യമാണ് ഘാന. ഇവിടത്തെ മിക്ക ആളുകളുടെയും ഉപജീവനമാര്‍വും കൊക്കോ കൃഷിയാണ്. അതുകൊണ്ടുതന്നെ വലിയ കൊക്കോ കായയുടെ ആകൃതിയിലുള്ള ശവപ്പെട്ടികള്‍ക്ക് ഘാനയില്‍ ആവശ്യക്കാര്‍ ഏറെയാണ്. 70,000 രൂപയ്ക്കു മുകളിലാണ് ഇത്തരത്തിലുള്ള ഒരു ശവപ്പെട്ടിയുടെ വില.

മരിച്ചയാളിന്റെ സ്വഭാവത്തിനനുസരിച്ചുള്ള ശവപ്പെട്ടികളും നിര്‍മിക്കാറുണ്ട്. പെട്ടെന്ന് ദേഷ്യപ്പെട്ടിരുന്ന ആളുകള്‍ക്കായി ചുവന്ന മുളകിന്റെ ആകൃതിയിലുള്ള ശവപ്പെട്ടികളാണ് ഉണ്ടാക്കുന്നത്.ഇവയ്ക്ക് പുറമെ ധനികരായ ആളുകള്‍ ആഡംബരക്കാറുകളുടെയും വിമാനങ്ങളുടെയുമൊക്കെ ആകൃതിയില്‍ ശവപ്പെട്ടികള്‍ പണിയിക്കാറുണ്ട്.

പരമ്പരാഗതമായി ശവപ്പെട്ടി നിര്‍മാണത്തിലേര്‍പ്പെട്ടിരിക്കുന്ന കുടുംബങ്ങള്‍ ഘാനയിലുണ്ട്. രാജ്യത്തിനകത്തുനിന്ന് മാത്രമല്ല പുറത്തുനിന്നുപോലും ഇവരുടെ ശവപ്പെട്ടികള്‍ക്ക് ആവശ്യക്കാര്‍ എത്താറുണ്ടത്രെ. തങ്ങള്‍ സ്വന്തമായി നിര്‍മിച്ച ആയുധങ്ങള്‍ ഉപയോഗിച്ചാണ് ഇവിടത്തെ ആശാരിമാര്‍ ശവപ്പെട്ടികള്‍ പണിയുന്നത്.

ശവസംസ്‌കാര ചടങ്ങുകളൊക്കെ ദിവസങ്ങളോളം നീണ്ടുപോകാറുള്ളതിനാല്‍ ഇത്തരം ശവപ്പെട്ടികള്‍ പണിതെടുക്കാന്‍ ആവശ്യമായ സമയം ലഭിക്കാറുമുണ്ട്.