മലപ്പുറം സ്വദേശികളാണ് സാദിഖി കുഞ്ഞാനിയും രാഹുലും. കുട്ടിക്കാലത്ത് പിടിപ്പെട്ട മസ്‌കുലര്‍ ഡിസ്‌ട്രോഫി അഥവാ മസിലുകള്‍ക്ക് ശേഷി നഷ്ടപ്പെടുന്ന രോഗാവസ്ഥ സാദിഖ് കുഞ്ഞാനിയെ വീല്‍ച്ചെയറിലാക്കി്. രാഹുലിന്റെ ശരീരമാകട്ടെ ഏഴ് വര്‍ഷം മുമ്പ് നട്ടെല്ലിന് ക്ഷതമേറ്റാണ് തളര്‍ന്നത്. രോഗം തളര്‍ത്തിയ ശരീരത്തോട് പോരാടുന്നതിന്റെ ഇടയ്ക്കാണ് ഇരുവരും കണ്ടുമുട്ടന്നതും സുഹൃത്തുക്കളാകുന്നതും. ആ സൗഹൃദത്തിന്റെ ചങ്കുറപ്പില്‍ ഇരുവരും നടത്തിയത് ഏഴുദിവസത്തെ സ്വപ്നതുല്യമായ ഗോവന്‍ യാത്ര.

രോഗത്തിന് ശരീരത്തെ തളര്‍ത്താനായി, പക്ഷെ മനസിനെ തളര്‍ത്താനായില്ല. ആ സൗഹൃദം ഇവരെ എത്തിച്ചത് ഗോവയിലും. ഗോവയില്‍ പോകണമെന്ന ഇരുവരുടെയും സ്വപ്നത്തെ പലരും പരിഹസിക്കുകയാണ് ചെയ്തത്. എന്നാല്‍ ആ പരിഹാസങ്ങളെയെല്ലാം അവഗണിച്ചുകൊണ്ടാണ് സ്വപ്നതീരത്തേക്ക് ഇവര്‍ എത്തിയത്. വീല്‍ചെയറും കെട്ടിവെച്ച് മുചക്രസ്‌കൂട്ടറില്‍ ഇരുവരും ഗോവ ചുറ്റികണ്ടതിനെക്കുറിച്ച് കുറിപ്പ് എഴുതിയിട്ടുണ്ട്. ഒപ്പം ഹൃദയഹാരിയായ ചിത്രങ്ങളും പങ്കുവെച്ചു. കുറിപ്പിന്റെ പൂര്‍ണ്ണരൂപം:

ഉടലില്‍ ചേര്‍ത്ത ശേഷിയെ/കഴിവിനെ കുറിച്ച് ഇനിയും സംസാരിച്ചു കൊണ്ടിരിക്കുന്നവരുടെ ഇടയിലേക്കാണ് ഈ ചിത്രങ്ങള്‍ പങ്കു വെക്കുന്നത്.. ത്രീ വീല്‍ സ്‌കൂട്ടിയില്‍ ഒരു ഗോവന്‍ റൈഡിനെ കുറിച്ച് ആലോചിച്ചു തുടങ്ങിയപ്പോഴേ പരിഹസിക്കാനും നിരുത്സാഹപ്പെടുത്താനും ആളുകള്‍ ഏറെയായിരുന്നു.സ്വയം തീര്‍ത്ത തടവറകളില്‍, അവനവന്റെ സുരക്ഷിതഇടങ്ങളില്‍ മാത്രം പാര്‍ക്കുന്നവര്‍.

ഈ ചിത്രങ്ങള്‍ ഗോവയില്‍ നിന്നുള്ളതാണ്.എല്ലാ പരിഹാസങ്ങളെയും അര്‍ഹിക്കുന്ന അവഗണനയോടെ പിന്നിലേക്ക് വലിച്ചെറിഞ്ഞ് ആ സ്‌കൂട്ടറിന്റെ ബാക്കില്‍ വീല്‌ചെയറടക്കം കെട്ടി വെച്ച് ഞങ്ങള്‍ ഗോവയില്‍ എത്തിയ ചിത്രങ്ങള്‍.

ഒരു ഗോവന്‍ റൈഡ് ഏത് ഒരാളെ പോലെയും ഞങള്‍ രണ്ടാളുടെയും മനസിലും കയറി പറ്റിയിട്ട് നാളേറെയായിരുന്നു. അങ്ങനെ ഒരു ദിവസം യാത്ര തിരിച്ചു .7 ദിവസത്തെ സുന്ദരമായ യാത്ര .കാഴ്ചകള്‍ അതിമനോഹരമായിരുന്നു യാത്രയിലുടനീളം.പക്ഷെ പലപ്പോഴും കാഴ്ചകള്‍ക്കപ്പുറമുള്ള അനുഭവങ്ങളായിരുന്നു ഈ യാത്രയുടെ ഹൈലൈറ്റ്.പറഞ്ഞു തീരാത്ത കഥകളുണ്ട്.

റൈഡിന്റെ കാര്യം പറഞ്ഞപ്പോള്‍ .അനകെന്താ പിരാന്തു ഉണ്ടോ? എന്ന് ചോദിച്ച മഹാന്മാര്‍ ഉണ്ട് .അവരോടു ഒന്നെ പറയാനൊള്ളൂ ഒരു ബുള്ളറ്റും ktm ഉം എല്ലാം വാങ്ങി ട്രിപ്പും പ്ലാന്‍ ചെയ്തിരിക്കുന്ന ഇങ്ങള് പോകുന്നില്ലെങ്കില്‍ പോണ്ട.നിങ്ങള്‍ക്ക് നിങ്ങള്‍ തന്നെ ഒരുക്കിയ തടവറകളില്‍ സുഖമായിരിക്കട്ടെ എന്ന് പ്രാര്‍ത്ഥിക്കുന്നു.

തളര്‍ന്നത് എന്റെ ശരീരമാണ്.അല്ലാതെ മനസ്സല്ല. കൂടെ കൂടിയവര്‍ Noufal Kaippally Rahul Owlpool #vipindas_ktni, ഇതൊരു ബോധ്യപ്പെടുത്തലല്ല.. ഉറച്ചു പോയ ചില ബോധങ്ങളോടുള്ള എന്റെ പരിഹാസം മാത്രം..