ഹര്‍ത്താല്‍ദിനത്തില്‍ സബിലാഷിനും മെറിന്‍മേരിയ്ക്കും പ്രണയസാഫല്യം, കോണ്‍ഗ്രസുകാര്‍ പൂട്ടിയ രജിസ്ട്രാര്‍ ഓഫീസ് തുറപ്പിച്ചത് ഇടത് എം.എല്‍.എ!
താനൂര്‍ സ്വദേശിയായ സബിലാഷും പത്തനംതിട്ട സ്വദേശിയായ മെറിന്‍ മേരിയും ആറു വര്‍ഷത്തെ പ്രണയത്തിനൊടുവില്‍ രജിസ്റ്റര്‍ വിവാഹം നടത്താന്‍ തീരുമാനിക്കുകയായിരുന്നു.
ഇതിനായി തിങ്കളാഴ്ച രാവിലെ താനൂര്‍ സബ് രജിസ്ട്രാര്‍ ഓഫീസില്‍ എത്തി. അപ്പോഴാണ് ഹര്‍ത്താലായതിനാല്‍ രജിസ്ട്രാര്‍ ഓഫീസ് കോണ്‍ഗ്രസ് പ്രവര്‍ത്തകര്‍ ബലമായി അടപ്പിച്ചതറിഞ്ഞത്.
തുടര്‍ന്ന് എന്ത് ചെയ്യണമെന്നറിയാതെ വിഷമിച്ച ഇവര്‍ വി അബ്ദുറഹിമാന്‍ എംഎല്‍എയുമായി ബന്ധപ്പെട്ടു. വിവരമറിഞ്ഞ എംഎല്‍എ നേരിട്ട് സ്ഥലത്തെത്തുകയും രജിസ്ട്രാറെ വിളിച്ചുവരുത്തുകയും മുന്‍കൈ എടുത്ത് വിവാഹം നടത്തിക്കൊടുക്കുകയുമായിരുന്നു.
രജിസ്റ്റര്‍ ചെയ്ത രശീതി നവദമ്പതികള്‍ക്ക് കൈമാറിക്കൊണ്ട് വി അബ്ദുറഹിമാന്‍ എംഎല്‍എ രണ്ടുപേരുടെയും കൈകള്‍ ചേര്‍ത്തുവച്ചു.
ആറു വര്‍ഷം മുന്‍പ് ഇരുവരുടെയും സുഹൃത്തിന്റെ വിവാഹവേളയിലെ പരിചയപ്പെടല്‍ ഹര്‍ത്താല്‍ ദിനത്തിലെ രജിസ്റ്റര്‍ വിവാഹത്തിലെത്തിച്ചു. ചടങ്ങില്‍ ഇവര്‍ക്കുപുറമെ ഇരുവരുടെയും സുഹൃത്തുക്കളും അടുത്ത ബന്ധുക്കളും പങ്കെടുത്തു.
https://www.facebook.com/Malayalivartha
