അമേരിക്കക്കാരി മിസി ഫ്രാങ്ക്‌ലിന്റെ ഇപ്പോഴത്തെ ഏറ്റവും വലിയ ആഗഹം ഇന്ത്യയിലെത്തുക എന്നതാണ് . വായിച്ചുമാത്രം അറിഞ്ഞിട്ടുള്ള , കേട്ടുപരിചയമുള്ള , തന്റെ സ്വപ്നത്തിന്റെ നാട്ടില്‍! ഇന്ത്യന്‍ സന്ദര്‍ശനം ഒരു സ്വപ്നം പോലെ സൂക്ഷിക്കുന്നത് ഒരു സാധാരണ അമേരിക്കക്കാരിയല്ല, അഞ്ചുവട്ടം ഒളിംപിക് ചാംപ്യനായ 23-വയസ്സുകാരി യുവതിയാണ് മിസി ഫ്രാങ്ക്‌ലിന്‍.

വിസ്മയങ്ങളുടെ ആകെത്തുകയാണ് മിസിയുടെ ജീവിതം. അഞ്ച് ഒളിംപിക് മെഡലുകളുടെ അതിശയനേട്ടത്തിനുടമ. ലോകത്തിന്റെ ആരാധന നേടിയ നീന്തല്‍ക്കുളത്തിലെ മിന്നുംതാരം. ഒളിംപിക്‌സ് ഉള്‍പ്പെടെയുള്ള വേദികള്‍ കീഴടക്കിയശേഷം ലോകവേദികള്‍ മാടിവിളിക്കുന്നതിനിടെ അപ്രതീക്ഷിതമായി വിരമിക്കല്‍ പ്രഖ്യാപിച്ച താരം. കഴിഞ്ഞവര്‍ഷം അവസാനമായിരുന്നു മിസിയുടെ വിരമിക്കല്‍ അവിശ്വസനീയതയോടെ ലോകം കേട്ടത്. നിരന്തരമായ തോള്‍വേദനയാണ് മിസിയെ നീന്തല്‍ക്കുളങ്ങളില്‍നിന്ന് അകാലത്തില്‍ അകറ്റിയത്.

അതോടെ ലോകത്തിന്റെ ശ്രദ്ധയില്‍നിന്നകന്ന്, താരപ്പകിട്ടും ബഹളവുമില്ലാത്ത ഒരു ലോകത്തേക്ക് പിന്‍വലിഞ്ഞു മിസി. ലോകം അവരെ മറന്നുതുടങ്ങുകയായിരുന്നു; മിസി ലോകത്തെ അറിയുകയും. തിരക്കിനിടെ മാറ്റിവച്ച ഇഷ്ടമുള്ള നൂറു കൂട്ടം കാര്യങ്ങളിലേക്ക് അവര്‍ കടന്നു. അതിലൊന്നായിരുന്നു യോഗയും മതപഠനവും.

ആദ്യമൊക്കെ തമാശയ്ക്ക്. പിന്നെയത് ഗൗരവത്തിലായി. അതോടെ ആത്മീയ പുസ്തകങ്ങളും യോഗയുടെ ശാസ്ത്രീയഗ്രന്ഥങ്ങളും വായിക്കാന്‍ തുടങ്ങി. ഹന്ദുമതത്തെക്കുറിച്ച് കൂടുതല്‍ അറിഞ്ഞു. അറിയുന്തോറും വായനയും ധ്യാനവും പഠനവും കൂടുതല്‍ ആഴത്തിലായി. ഭാരതത്തിന്റെ ഇതിഹാസങ്ങളായ രാമായണവും മഹാഭാരതവുമാണ് ഇപ്പോള്‍ മിസി വായിക്കുന്നത്. മനസ്സിലെ ഏറ്റവും വലിയ മോഹം ഇതിഹാസങ്ങള്‍ ജനിച്ച നാട് എത്രയും വേഗം സന്ദര്‍ശിക്കുക എന്നതും.

ഒരു വര്‍ഷമായി ഞാന്‍ മതഗ്രന്ഥങ്ങളാണു വായിക്കുന്നത്. വായിക്കന്തോറും എന്റെ താല്‍പര്യവും വര്‍ധിച്ചു. കണ്ണു തുറപ്പിക്കുന്ന അനുഭവം. വ്യത്യസ്ത സംസ്‌കാരങ്ങളും വിശ്വാസവും പഠിക്കുന്നത് രസകരവും വിജ്ഞാനപ്രദവുമാണ്. ഞാന്‍ ജനിച്ചത് ക്രിസ്ത്യന്‍ മതത്തിലാണ്. പക്ഷേ, ഇപ്പോള്‍ പഠിക്കുന്നതു ഹന്ദു, മുസ്ലിം മതങ്ങളും. – മിസി തന്റെ പുതിയ സ്‌നേഹത്തെക്കുറിച്ച് പറയുന്നു. ഓരോ പുതിയ സന്ദര്‍ശകനെയും സ്‌നേഹിച്ചു സ്വീകരിക്കുന്ന, കഥകളുറങ്ങുന്ന ആര്‍ഷസംസ്‌കാരത്തിന്റെ നാട് കാത്തിരിക്കുകയാണ് നീന്തല്‍ക്കുളത്തില്‍ വിജയഗാഥ രചിച്ച പ്രതിഭാശാലിയായ താരത്തിന്റെ സന്ദര്‍ശനത്തിനുവേണ്ടി.