ലോകത്തെ ഏറ്റവും വലിയ പണം വാരി ചിത്രമെന്ന ടൈറ്റാനിക്കിന്റെ റെക്കോര്‍ഡ് പഴങ്കഥയായി. 

നിലവില്‍ രണ്ടാംസ്ഥാനത്ത് തുടരുകയായിരുന്നു ലോകസിനിമയിലെ ഈ കപ്പല്‍ പ്രണയം. 'അവഞ്ചേഴ്‌സ്: എന്‍ഡ് ഗെയിം' ടൈറ്റാനിക്കിനെ പിന്തള്ളി രണ്ടാമതെത്തി.

ഇതോടെ ചിത്രത്തിന് അഭിനന്ദനവുമായി സംവിധായകന്‍ ജെയിംസ് കാമറൂണും രംഗത്തെത്തി. ട്വിറ്ററിലൂടെയാണ് അദ്ദേഹം അവഞ്ചേഴ്‌സിന്റെ അണിയറപ്രവര്‍ത്തകരെ അഭിനന്ദിച്ചത്. ജെയിംസ് കാമറൂണിന്റെ അവതാര്‍ എന്ന ചിത്രമാണ് ലോകത്തെ പണംവാരി ചിത്രങ്ങളില്‍ ഇപ്പോഴും ഒന്നാം സ്ഥാനത്ത്.

കാമറൂണ്‍ അവഞ്ചേഴ്‌സിന്റെ അണിയറപ്രവര്‍ത്തകരെ അനുമോദിച്ചത് അവഞ്ചേഴ്‌സ് വന്നിടിക്കുമ്പോള്‍ ടൈറ്റാനിക് മുങ്ങിപ്പോവുന്ന ഒരു ചിത്രം പങ്കുവച്ചാണ്. 'ഒരു മഞ്ഞുമലയാണ് യഥാര്‍ഥ ടൈറ്റാനിക്കിനെ മുക്കിയത്. എന്റെ ടൈറ്റാനിക്കിനെ അവഞ്ചേഴ്‌സ് മുക്കിയിരിക്കുന്നു. ലൈറ്റ്‌സ്റ്റോം എന്റര്‍ടെയിന്‍മെന്റിലെ എല്ലാവരും നിങ്ങളുടെ നേട്ടത്തെ അഭിനന്ദിക്കുന്നു. സിനിമാ ലോകം മറ്റെന്തിനേക്കാളും വലുതാണെന്ന് നിങ്ങള്‍ ഒരിക്കല്‍ കൂടി കാണിച്ചു തരുന്നു.' അദ്ദേഹം കുറിച്ചു. കാമറൂണിന്റെ ട്വീറ്റിന് നന്ദി പറഞ്ഞു കൊണ്ട് മാര്‍വല്‍ ഫാന്‍സും രംഗത്തെത്തി.

അവതാറിന്റെ രണ്ടാം ഭാഗത്തിന്റെ തിരക്കുകളിലാണ് ജെയിംസ് കാമറൂണ്‍.രണ്ടാഴ്ച കൊണ്ട് 2.2 ബില്യണ്‍ ഡോളറാണ് ചിത്രം കളക്റ്റ് ചെയ്തത്. ടൈറ്റാനിക്കിന്റെ ഇതുവരെയുള്ള കളക്ഷന്‍ 2.1 ബില്യണ്‍ ഡോളറായിരുന്നു. നിലവില്‍ 2.78 ബില്യണ്‍ റെക്കോര്‍ഡ് കളക്ഷന്‍ നേടി ഒന്നാം സ്ഥാനത്തുള്ള കാമറൂണ്‍ ചിത്രം അവതാറിന്റെ റെക്കോര്‍ഡും അവഞ്ചേഴ്‌സ് മറികടക്കുമോ എന്ന ആകാംക്ഷയിലാണ് സിനിമാപ്രേമികള്‍.