വോട്ട് ചെയ്തു കൊണ്ടിരിക്കുമ്പോള് തന്നെ വോട്ട് എണ്ണിത്തുടങ്ങും!
വോട്ടെടുപ്പു നടന്ന് 30 ദിവസത്തിനു ശേഷമാണ് ഇന്ന് വോട്ടെണ്ണല് നടക്കുന്നത്. 2009-ല് ലോക്സഭയിലേക്കും 2011-ല് നിയമസഭയിലേക്കും നടന്ന തിരഞ്ഞെടുപ്പുകളുടെയും ഫലമറിയാന് 30 ദിവസം കാത്തിരിക്കേണ്ടി വന്നു. 2014-ലെ ലോക്സഭാ തിരഞ്ഞെടുപ്പിലായിരുന്നു ഏറ്റവും ദീര്ഘമായ കാത്തിരുപ്പ് (36 ദിവസം) . 1999-ല് 25, 2006-ല് 19, 1996-ല് 11 ദിവസങ്ങള് കാത്തിരിക്കേണ്ടി വന്നു. 1960 മുതല് മറ്റവസരങ്ങളില് വോട്ടെണ്ണല് തുടങ്ങാന് 4 ദിവസത്തിലധികം കാത്തിരിക്കേണ്ടി വന്നിട്ടില്ല; മിക്കവാറും പിറ്റേന്നു തന്നെ വോട്ടെണ്ണല് നടക്കുമായിരുന്നു.
രാജ്യം മുഴുവന് പോളിങ് പൂര്ത്തിയായതിനു ശേഷമാണ് ഇന്ന് കൗണ്ടിംഗും ഫലപ്രഖ്യാപനവും നടത്തുന്നത്. എന്നാല് നേരത്തെ പോളിങ് തീരും മുന്പേ തന്നെ കൗണ്ടിങും ഫലപ്രഖ്യാപനവും നടന്നിരുന്നു.
ഒന്നാം ലോക്സഭയിലേക്കും തിരുവിതാംകൂര്-കൊച്ചി നിയമസഭയിലേക്കും 1951/52- ല് ഒരുമിച്ചായിരുന്നു തിരഞ്ഞെടുപ്പ്. 14 ഘട്ടങ്ങളായി പോളിങും ഇതിനിടയില് തന്നെ കൗണ്ടിങും ഫലപ്രഖ്യാപനവും നടത്തി. മലബാര് ഉള്പ്പെട്ട മദ്രാസിലും ഇതുപോലെയായിരുന്നു. രണ്ടാം ലോക്സഭയിലേക്കും ഒന്നാം കേരള നിയമസഭയിലേക്കും 1957-ല് നടന്ന തിരഞ്ഞെടുപ്പിലും വോട്ടെടുപ്പിനിടയില് തന്നെ വോട്ടെണ്ണലും ഫലപ്രഖ്യാപനവും നടത്തി.
അതേസമയം തിരുവിതാംകൂര്-കൊച്ചി നിയമസഭയിലേക്ക് 1954-ല് 8 ഘട്ടമായി നടന്ന ഇടക്കാല തിരഞ്ഞെടുപ്പില് അവസാനഘട്ട പോളിങിന്റെ പിറ്റേന്നായിരുന്നു കൗണ്ടിങും ഫലപ്രഖ്യാപനവും തുടങ്ങിയത്. ഒരു മണ്ഡലത്തിലെ ഫലപ്രഖ്യാപനം മറ്റു മണ്ഡലങ്ങളിലെ പോളിങിനെ ബാധിക്കാതിരിക്കാനായിരുന്നു ഈ ക്രമീകരണം.
1960 മുതല് കേരള നിയമസഭയിലേക്കുള്ള തിരഞ്ഞെടുപ്പുകളിലെല്ലാം പോളിങ് പൂര്ത്തിയായതിനു ശേഷം മാത്രമേ കൗണ്ടിങും ഫലപ്രഖ്യാപനവും നടത്തിയിട്ടുള്ളൂ. 1962 മുതല് കേരളത്തില് നടന്നിട്ടുള്ള ലോക്സഭാ തിരഞ്ഞെടുപ്പുകളിലും ഇങ്ങനെ തന്നെയായിരുന്നു. 1967-ല് അഖിലേന്ത്യാ തലത്തിലുള്ള വോട്ടെടുപ്പ് പൂര്ത്തിയാകുന്നതിനു മുന്പു തന്നെ കേരളത്തില് വോട്ടെണ്ണലും ഫലപ്രഖ്യാപനവും നടത്തിയെന്നു മാത്രം. 1971, 1977, 1980, 1984, 1989 ലോക്സഭാ തിരഞ്ഞെടുപ്പുകളില് അവസാന ഘട്ട വോട്ടെടുപ്പു ദിവസം തന്നെ വോട്ടെണ്ണല് നടന്നെങ്കിലും വോട്ടെടുപ്പ് തീര്ന്നതിനു ശേഷം മാത്രമാണ് ഫലപ്രഖ്യാപനം നടത്തിതുടങ്ങിയത്.
പിന്നീടുള്ള ലോക്സഭാ തിരഞ്ഞെടുപ്പുകളിലെല്ലാം പോളിങ് തീര്ന്നതിനു ശേഷം മറ്റൊരു ദിവസമാണ് കൗണ്ടിങ് നടത്തിയിട്ടുള്ളത്. തിരുവിതാംകൂര് നിയമസഭയിലേക്ക് 1948-ല് നടന്ന തിരഞ്ഞെടുപ്പ് 7 ഘട്ടങ്ങളായിട്ടാണ് നടന്നത്. ഓരോ ദിവസത്തെയും പോളിങ് കഴിയുമ്പോള് തന്നെ കൗണ്ടിങും ഫലപ്രഖ്യാപനവും നടത്തിയിരുന്നു. അക്കൊല്ലം നടന്ന കൊച്ചി നിയമസഭാ തിരഞ്ഞെടുപ്പില് പോളിങിനു ശേഷമായിരുന്നു കൗണ്ടിങ്.
https://www.facebook.com/Malayalivartha