മൂങ്ങയുടെ ഒളിച്ചുകളി; ഒരു അപൂര്‍വ ചിത്രം കാണാം
മരുഭൂമിയിലെ മൂങ്ങയുടെ പാര്‍ശ്വവീക്ഷണമാണിത്. ചിത്രത്തില്‍ മൂങ്ങയ്ക്ക് ഒരു കണ്ണ് മാത്രമേയുള്ളൂ. ശരീരം മരത്തിനു പിന്നില്‍ മറച്ചു പിടിച്ചുകൊണ്ട് ആരെങ്കിലും ഒളിഞ്ഞുനോക്കാന്‍ ശ്രമിക്കുന്നതിന്റെ ഫോട്ടോ എടുത്താല്‍ എങ്ങനെ ഇരിക്കുമോ ആ മട്ടിലുള്ള മൂങ്ങയുടെ ദൃശ്യമാണ് കാമറയില്‍ പതിഞ്ഞത്.
ഏതായാലും അത്യപൂര്‍വമായ ചിത്രം ദുബായ് മരുഭൂമിയില്‍ നിന്ന് ക്യാമറയില്‍ പകര്‍ത്തിയത് പി.എസ്. നിസ്താറാണ്. ദുബായില്‍ ഉദ്യോഗസ്ഥനായ അദ്ദേഹം ചാവക്കാട് സ്വദേശിയാണ്.
പാരോ ഈഗിള്‍ ഔള്‍ (Pharaoh Eagle Owl) വിഭാഗത്തില്‍ പെടുന്ന മൂങ്ങയാണ്. മരുഭൂമിയില്‍ പാറകള്‍ക്കിടയിലാണ് മൂങ്ങയെ കാണുക. നല്ല കാഴ്ചശക്തിയുള്ളവയാണ് ഈ മൂങ്ങകള്‍. അതിനാല്‍ രാത്രിയിലും ഇര തേടാന്‍ ഇവയ്ക്ക് കഴിയും. ചിലപ്പോള്‍ കൊടിയ വിഷമുള്ള തേളിനെ കൊത്തിയെടുത്ത് നിമിഷങ്ങള്‍ക്കകം തല പിളര്‍ന്ന് കൊന്നശേഷം മൂങ്ങകള്‍ അകത്താക്കും.
വനാന്തരത്തിലേക്ക് പോകുന്നതുപോലെ മരുഭൂമിയുടെ ആഴത്തിലേക്ക് ജീപ്പില്‍ സഞ്ചരിച്ചാലേ പരിസരവുമായി ലയിച്ചിരിക്കുന്ന മൂങ്ങയെ കണ്ടെത്താന്‍ കഴിയൂ എന്ന് നിസ്താര്‍ പറഞ്ഞു.
മരുഭൂമിയിലുള്ള ഉടുമ്പിനെയും നിസ്താറിന് ക്യാമറയില്‍ കിട്ടി. പലതരം ഇഴജന്തുക്കളെയും പ്രാണികളെയും തക്കം കിട്ടിയാല്‍ എലിയെപ്പോലുള്ള ജീവികളെയും ഉടുമ്പ് ഇരയാക്കി മാറ്റും.
https://www.facebook.com/Malayalivartha
