കാലിഫോര്ണിയയിലെ വെതര് സര്വീസ് കേന്ദ്രത്തിലെ റഡാറില് തെളിഞ്ഞ കാഴ്ച കണ്ട് നിരീക്ഷകര് ഞെട്ടി!
കലിഫോര്ണിയയിലെ നാഷണല് വെതര് സര്വീസ് കേന്ദ്രത്തിലെ റഡാറില് കഴിഞ്ഞ ദിവസം തെളിഞ്ഞ ഒരു കാഴ്ച നിരീക്ഷകരെ അത്ഭുതപ്പെടുത്തി. ഇതെന്താണെന്ന് തിരിച്ചറിയാന് അവര്ക്ക് സാധിച്ചതുമില്ല.
ഏറെ നേരം നിരീക്ഷിച്ചിട്ടും മഴമേഘങ്ങളോ ചുഴലിക്കാറ്റോ ഒന്നുംതന്നെ കണ്ടെത്താനാകാത്തതിനെത്തുടര്ന്ന് ദൃശ്യം കണ്ട സ്ഥലത്തെ വാനനിരീക്ഷകരുമായി കാലാവസ്ഥാകേന്ദ്രം ബന്ധപ്പെട്ടു. അങ്ങനെയാണ് സംഭവം വ്യക്തമായത്.
എണ്ണിയാല് തീരാത്തത്ര ചെറു വണ്ടുകള് കൂട്ടമായി നീങ്ങിയതാണ് റഡാറിന്റെ കണ്ണില്പ്പെട്ടത്. ഭൂമിയില് നിന്നും ഒരു കിലോ മീറ്ററോളം ഉയരത്തില് പറന്നുനീങ്ങിയിരുന്ന വണ്ടുകളുടെ കൂട്ടത്തിന് പത്തു മൈലില് അധികം വ്യാസം ഉണ്ടായിരുന്നു! ഇത്രയും വലിയ കൂട്ടമായതിനാലാണ് കാലാവസ്ഥ നിരീക്ഷണ കേന്ദ്രത്തിലെ റഡാറില് അവ പതിഞ്ഞത്.
അനേകം ഇനങ്ങളില് പെട്ട ചെറു വണ്ടുകള് കലിഫോര്ണിയയില് ഉള്ളതായി കണ്ടെത്തിയിട്ടുണ്ട്. അവയില് പലതും വലിയ കൂട്ടമായി ഒരു സ്ഥലത്തു നിന്നും മറ്റൊരിടത്തേക്കു നീങ്ങാറുമുണ്ട്. എന്നാല് ഇത്രയധികം വണ്ടുകള് ഒരേസമയം ദൃശ്യമായത് അത്യപൂര്വമാണെന്ന് നിരീക്ഷകര് പറയുന്നു. ചെറു വണ്ടുകള് ഇത്തരത്തില് കൂട്ടമായി പലായനം നടത്തുന്നതിനെ ലേഡിബഗ് ബ്ലൂം എന്നാണ് വിശേഷിപ്പിക്കുന്നത്.
ഹൈപ്പോഡാമിയ കണ്വേര്ജന്സ് (Hippodamia convergens) എന്ന ശാസ്ത്രീയ നാമത്തില് അറിയപ്പെടുന്ന വണ്ടുകളുടെ കൂട്ടമാണ് കാലാവസ്ഥാ കേന്ദ്രത്തിന്റെ റഡാറില് പതിഞ്ഞത്. കാലാവസ്ഥയില് ഉള്ള വ്യതിയാനങ്ങള് മൂലം മറ്റൊരിടത്തേക്ക് വണ്ടുകള് പലായനം ചെയ്തതാവാമെന്ന് നിരീക്ഷകര് വിലയിരുത്തുന്നു.
https://www.facebook.com/Malayalivartha