അമേരിക്കയിലെ ഒരു പ്രമുഖ വ്യവസായ ശൃംഖലയാണ് സെവന്‍ ഇലവന്‍. ഈ മാന്ത്രിക സംഖ്യയോട് നൂറു ശതമാനവും നീതി പുലര്‍ത്തി ഒരു കുഞ്ഞ് ജനിച്ചു. ആ ശിശുവിന്റെ കഥ വൈറലാകുകയും ചെയ്തു.

മിസൗറി സംസ്ഥാനത്തെ സെന്റ് ലൂവിസില്‍ ജൂലൈ 11-ന് (ഏഴാം മാസം പതിനൊന്നാം തീയതി,അതായത് 7/11), വൈകിട്ട് 7.11-ന് ജനിച്ച കുട്ടിക്ക് മറ്റൊരു പ്രത്യേകത കൂടി ഉണ്ടായിരുന്നു. ജനിച്ചു വീണപ്പോള്‍ കുട്ടിയുടെ ഭാരം ഏഴ് പൗണ്ടും പതിനൊന്ന് ഔണ്‍സും ആയിരുന്നുവത്രേ.

ലേഗ്‌ഫോര്‍ഡും റെയ്ച്ചലുമാണ് അദ്ഭുത ശിശുവിന്റെ മാതാപിതാക്കള്‍. ഗര്‍ഭകാലഘട്ടത്തില്‍ റെയ്ച്ചലിന് 7/11 നോട് ഒരു പ്രത്യേക മമത ഉണ്ടായിരുന്നതായി ഭര്‍ത്താവ് ലേഗ്‌ഫോള്‍സ് പറഞ്ഞു. റെയ്ച്ചല്‍ ക്ലോക്കില്‍ നോക്കുമ്പോള്‍ ദൃഷ്ടിയില്‍ പെട്ടിരുന്നത് 7.11 എന്ന സമയമായിരുന്നു എന്നതും ഒരു പ്രത്യേകതയായി ചൂണ്ടികാണിക്കുന്നു.

ഈ നമ്പറിന്റെ പ്രത്യേക സാമ്യം സെവന്‍ ഇലവന്‍ വ്യവസായ ശൃംഖലയെ അറിയിക്കുമെന്ന് മാതാപിതാക്കള്‍ പറഞ്ഞു. അമ്മയും കുഞ്ഞും സുഖമായിരിക്കുന്നുവെന്നും, ഇത്തരത്തിലുള്ള ജനനം വളരെ അപൂര്‍വമാണെന്നും ആശുപത്രി അധികൃതര്‍ പറഞ്ഞു.