ബെംഗളൂരുവിലെ വെന്‍ഗലംപ്പള്ളി പ്രൈമറി ഗവണ്‍മെന്റ് സ്‌കൂളില്‍ അടുത്തിടെ ഒരു പുതിയ വിദ്യാര്‍ത്ഥി എത്തി. പേര് ലക്ഷ്മി. കൃത്യമായി പറഞ്ഞാല്‍ 12 ദിവസം മുന്‍പാണ് ലക്ഷ്മി ഇവിടെ പഠിക്കാനെത്തിയത്. പറഞ്ഞു വരുന്നത് ഒരു മിടുക്കത്തി കുരങ്ങിനെ കുറിച്ചാണ്. ചാര നിറത്തിലുള്ള ഈ കുരങ്ങ് 12 ദിവസങ്ങള്‍ക്ക് മുന്‍പാണ് സ്‌കൂളില്‍ എത്തിയത്. എല്ലാ ദിവസവും കൃത്യമായി ലക്ഷ്മി സ്‌കൂളില്‍ വരാന്‍ തുടങ്ങിതോടെ വിദ്യാര്‍ഥികളുടെ ശ്രദ്ധ അവളിലായി.

കാര്യങ്ങള്‍ കുഴഞ്ഞതോടെ അധ്യാപകര്‍ വാതില്‍ അടച്ചിട്ടുപഠിപ്പിക്കാന്‍ തുടങ്ങി. എന്നാല്‍ ജനല്‍ പടിയിലിരുന്നു ശ്രദ്ധയോടെ പാഠങ്ങള്‍ വീക്ഷിക്കാന്‍ ലക്ഷ്മി തുടങ്ങിയതോടെ അധ്യാപകര്‍ ലക്ഷ്മിക്ക് സ്ഥിരം പ്രവേശനം നല്‍കുകയായിരുന്നു. കുരങ്ങിന്റെ സാന്നിധ്യം ആദ്യം അധ്യാപകരെയും വിദ്യാര്‍ഥികളെയും ഭയപ്പെടുത്തിയെങ്കിലും പിന്നീട് കുരങ്ങ് സ്‌കൂളിലെ അംഗമായി മാറുകയായിരുന്നു. കുട്ടികളാണ് ലക്ഷ്മിയെന്ന പേരു നല്‍കിയത്.

അച്ചടക്കവും അനുസരണശീലവുമുളള വിദ്യാര്‍ഥിനിയാണ് ലക്ഷ്മിയെന്നാണ് എല്ലാവരുടേയും അഭിപ്രായം. സ്‌കൂളിന്റെ എല്ലാ നിയമങ്ങളും ലക്ഷ്മി അനുസരിക്കും. സ്‌കൂള്‍ അസംബ്ലിക്കു കൃത്യസമയത്ത് എത്തും. എല്ലാ ക്ലാസുകളിലും മുടങ്ങാതെ പങ്കെടുക്കും. ക്ലാസുകള്‍ കഴിഞ്ഞു കൂട്ടുകാരുമായി കളിക്കും.

ലക്ഷ്മിയുടെ വരവിനു ശേഷം എല്ലാ ദിവസവും 100 ശതമാനമാണ് വിദ്യാര്‍ഥികളുടെ ഹാജരെന്ന് പ്രഥമ അധ്യാപകന്‍ പറയുന്നു. രണ്ടു ദിവസമായി ലക്ഷ്മിയ്ക്കു വയറിന് ആരോഗ്യപ്രശ്നമുണ്ട്. ഡോക്ടര്‍ വന്നു പരിശോധിച്ച ശേഷം ജങ്ക് ഫുഡ് കൊടുക്കരുതെന്നാണ് നിര്‍ദ്ദേശിച്ചിട്ടുള്ളത്.