ട്രെയിന്‍ കുത്തി മറിക്കാന്‍ കാട്ടാനയുടെ ശ്രമം
സിലിഗുരിക്കു സമീപമുള്ള ഗുല്‍മ, സേവോക്ക് സ്റ്റേഷനുകള്‍ക്കിടയില്‍ ട്രാക്കില്‍ ആനയെ കണ്ടപ്പോള്‍ അതിനെ ഇടിക്കാതിരിക്കാന്‍ ട്രെയിന്‍ നിര്‍ത്തി. എന്നാല്‍ ആനയാകട്ടെ ആ ട്രെയിനെ കുത്തി മറിക്കാന്‍ ശ്രമം നടത്തുകയാണുണ്ടായത്. സൈബര്‍ ലോകത്ത് വൈറലാവുകയാണ് ഈ ആനക്കാഴ്ച.
സിലിഗുരി ദിന്‍ഹട്ടാ ഡെമു ട്രെയിനിലെ പ്രധാന ലോക്കോ പൈലറ്റായ ബിപ്ലബ് കാന്തിദാസും സഹായിയായ എന്‍ കെ സിങ്ങും ട്രെയിനില്‍ ഉണ്ടായിരുന്നപ്പോഴാണ് റയില്‍വെ ട്രാക്കിനു സമീപത്തുകൂടി ആന നടന്നു വരുന്നത് കണ്ടത്. അതോടെ ലോക്കോ പൈലറ്റുമാര്‍ ട്രെയിന്‍ നിര്‍ത്തി.
നിര്‍ത്തിയിട്ടിരിക്കുന്ന ട്രെയിന്‍ കണ്ടതോടെ ആനയ്ക്ക് കൗതുകമായി. ആന ട്രാക്കില്‍ കയറി ട്രെയ്‌നിന്റെ മുന്നില്‍ വന്ന് തുമ്പിക്കൈ ഉപയോഗിച്ച് തൊട്ടു നോക്കുകയും തല ഉപയോഗിച്ച് മറിച്ചിടാന്‍ നോക്കുകയും ചെയ്തതോടെ ഉള്ളിലുണ്ടായിരുന്ന ലോക്കോ പൈലറ്റുമാര്‍ വിരണ്ടു. ഇവര്‍ ഹോണ്‍ അടിച്ചതോടെയാണ് ആന സമീപത്തു നിന്നും പിന്‍മാറിയത്. എന്നാല്‍ ട്രാക്കില്‍ നിന്നും മാറാന്‍ ആന കൂട്ടാക്കാതെ അവിടെ തന്നെ നിലയുറപ്പിച്ചു.
കാട്ടാനയുടെ കുറുമ്പിന്റെ ദൃശ്യങ്ങളാണ് ഇപ്പോള്‍ സമൂഹമാധ്യമങ്ങളില്‍ നിറയുന്നത്. പശ്ചിമബംഗാളിലെ സിലിഗുരിയില്‍ നിന്നുള്ളതാണ് ഈ ദൃശ്യങ്ങള്‍. ഐഎഫ്എസ് ഉദ്യോഗസ്ഥനായ സുശാന്ത നന്ദയാണ് ട്വിറ്ററിലൂടെ ഈ ദൃശ്യങ്ങള്‍ പങ്കുവച്ചത്.
https://www.facebook.com/Malayalivartha
