എവറസ്റ്റ് കൊടുമുടിയെ പൂര്‍ണ്ണമായും ഉള്‍കൊള്ളിക്കാന്‍ സാധിക്കുന്ന ഉള്ളളവുള്ള ഒരു ഗുഹ വിയറ്റ്‌നാമില്‍ ഉണ്ട്. ഹാംഗ് സോണ്‍ ഡൂംഗ് എന്ന് പേരുള്ള ഗുഹക്ക് കുറഞ്ഞത് രണ്ട് മുതല്‍ അഞ്ച് ദശലക്ഷം വര്‍ഷം പഴക്കമുണ്ടെന്ന് വിശ്വസിക്കപ്പെടുന്നു. ലാവോസിന്റെയും വിയറ്റ്‌നാമിന്റെയും അതിര്‍ത്തിയിലായാണ് ഈ വിസ്മയ ഗുഹ സ്ഥിതിചെയ്യുന്നത്.

ഈ പുരാതന ഗുഹ അപ്രതീക്ഷിതമായി കണ്ടെത്തിയതായിരുന്നു. 1990-ല്‍ ഹോ ഖാന്‍ എന്ന വിയറ്റ്‌നാം സ്വദേശിയാണ് സോണ്‍ ഡൂങിനെ ആദ്യമായി കണ്ടെത്തിയത്. കാടിന്റെ ഹൃദയഭാഗത്തുള്ള ഒരു വലിയ മലഞ്ചെരിവില്‍ വച്ച് കൊടുങ്കാറ്റില്‍ നിന്ന് അഭയം തേടിയ അദ്ദേഹം പാറയുടെ അടിയില്‍ ഒരു ആഴത്തിലുള്ള ദ്വാരം കണ്ടെത്തി. എന്നാല്‍ അദ്ദേഹം ഗുഹയെക്കുറിച്ച് കൂടുതല്‍ പര്യവേക്ഷണം നടത്തിയില്ല.പിന്നിട് 19 വര്‍ഷങ്ങള്‍ക്ക് ശേഷം ലിംബര്‍ട്ട് എന്ന പര്യവേക്ഷകനും സംഘവുമാണ് ഗുഹയെ പുറം ലോകത്തിന് പരിചയപ്പെടുത്തിയത്.

ഐതിഹാസിക അനുപാതങ്ങളുടെ ഗുഹയാണ് ഹാംഗ് സോണ്‍ ഡൂംഗ്. ഈ ഗുഹയുടെ അളവിനെ എവസ്റ്റിന്റെ പൊക്കത്തോട് താരതമ്യം ചെയ്താണ് പ്രതിപാദിക്കുന്നത്. ഏകദേശം 5 കിലോമീറ്ററിലധികം നീണ്ടുനില്‍ക്കുന്ന ഉള്ളറയാണ് ഗുഹയ്ക്കുള്ളത്. അതിനകത്ത് 40 നിലകളുള്ള ഒരു കെട്ടിടം എളുപ്പത്തില്‍ പണി കഴിപ്പിക്കാന്‍ പറ്റുമത്രേ. ആധുനിക സാങ്കേതികവിദ്യയെപ്പോലും വെല്ലുവിളിക്കുന്ന അദ്ഭുതമാണ് ഹാംഗ് സോണ്‍ ഡൂംഗ് കേവ്.

ഹാംഗ് സോണ്‍ ഡൂംഗ് ഗുഹയ്ക്കുള്ളിലെ കാട് വളരെ സാന്ദ്രമാണ്, ശിലായുഗത്തില്‍പ്പെട്ട കാലത്തേക്ക് കൂട്ടികൊണ്ടു പോകും ഈ ഗുഹയിലെ കാഴ്ച്ചകള്‍. ചുണ്ണാമ്പുകല്ല് മുത്തുകളുടെ ആവാസകേന്ദ്രമായ ഇത് യഥാര്‍ത്ഥത്തില്‍ ഒരു നിധിപോലെ മറഞ്ഞിരിക്കുന്ന ഒന്നാണ്. ഇന്നും ഗുഹയുടെ പൂര്‍ണ്ണമായൊരു രൂപവും ഘടനയും ഒന്നും കണ്ടെത്താനായിട്ടില്ല.

വിദഗ്ദ്ധരുടെ അഭിപ്രായത്തില്‍, ഗുഹയുടെ ഉള്‍വശം ഇനിയും സൂഷ്മ നിരീക്ഷണം ചെയ്യേണ്ടതുണ്ട്, ഇന്നത്തെ സാങ്കേതികവിദ്യക്ക് അസാധ്യമായ ഒരു കാര്യമാണ്. നമുക്കറിയാവുന്ന എല്ലാത്തിനേക്കാളും വലുതും, നമുക്ക് ഊഹിക്കാവുന്നതിലുമധികം രഹസ്യങ്ങള്‍ മറഞ്ഞിരിക്കുന്ന ഇടം കൂടിയാണീ ഗുഹ.

ഗുഹ സന്ദര്‍ശകര്‍ക്കായി തുറന്നിട്ടുണ്ട്. പക്ഷേ പ്രവേശനം കര്‍ശനമായി നിയന്ത്രിക്കുകയും പ്രതിവര്‍ഷം 1000 ആയി പരിമിതപ്പെടുത്തുകയും ചെയ്തിരിക്കുന്നു എന്നു മാത്രം. എല്ലാ ടൂറുകളും സംഘടിപ്പിക്കുകയും നയിക്കുകയും ചെയ്യുന്നത് ഓക്‌സാലിസ് അഡ്വഞ്ചര്‍ ടൂര്‍സ് എന്ന സ്വകാര്യ കമ്പനിയാണ്. ഇതിന്റെ ഡയറക്ടര്‍മാരില്‍ ഒരാളായ ലിംബര്‍ട്ടും സംഘവുമാണ് ഗുഹയെ പുറം ലോകത്തിന് പരിചയപ്പെടുത്തിയത്. ജനുവരിയുടെ അവസാന കാലവും ഓഗസ്റ്റ് മാസത്തിലും കനത്ത മഴയുടെ സമയമായതിനാല്‍ സന്ദര്‍ശനം പരിമിതപ്പെടുത്തിയിരിക്കുന്നു.