ഓട്ടോ സുന്ദരിയെ കണ്ട് മയങ്ങി പൊലീസ് മാമന്മാര്!
മാധവ് കൃഷ്ണയുടെയും കേശനി കൃഷ്ണയുടെയും സ്വന്തം 'സുന്ദരി'യെ, ഞായറാഴ്ച ഇന്റര്സെപ്റ്ററില് പതിവു പരിശോധനകള്ക്കിറങ്ങിയ പൊലീസ് മാമന്മാര് കണ്ടയുടനെ തന്നെ വണ്ടി സൈഡൊതുക്കി ചാടിയിറങ്ങി. വീട്ടുമുറ്റത്തു മക്കള്ക്കു ഓടിച്ചു കളിക്കാനായി തൊടുപുഴ സ്വദേശി അരുണ്കുമാര് നിര്മിച്ചതാണ് സുന്ദരിയെന്ന ഓട്ടോറിക്ഷ. വലുപ്പത്തില് കുഞ്ഞനാണെങ്കിലും യഥാര്ഥ ഓട്ടോറിക്ഷകളിലെ എല്ലാവിധ സൗകര്യങ്ങളും സംവിധാനങ്ങളുമുള്ള ഓട്ടോയാണ് സുന്ദരി. കെഎല്-11-636 എന്ന നമ്പരും ഓട്ടോയുടെ മുന്നിലുണ്ട്. അതുകൊണ്ട് ഫൈനടിക്കാനല്ല, സുന്ദരി ഓട്ടോ 'ഫൈനെ'ന്ന് പറഞ്ഞ് ഒപ്പം ഫോട്ടോ എടുക്കാനായിരുന്നു പൊലീസ് മാമന്മാരുടെ വരവ്.
ഓട്ടോറിക്ഷ വെറും കളിപ്പാട്ടമല്ല പുലിക്കുട്ടി തന്നെയാണ്. യഥാര്ഥ ഓട്ടോറിക്ഷയെ വെല്ലുന്ന രീതിയിലാണ് ഇവരുടെ അച്ഛന് തൊടുപുഴ വെള്ളിയാമറ്റം മൂത്തേടത്തുപറമ്പില് അരുണ്കുമാര് പുരുഷോത്തമന്(33) സ്വന്തമായി ഓട്ടോറിക്ഷ നിര്മിച്ചു നല്കിയത്. 60 കിലോഗ്രാം ഭാരമുള്ള 'സുന്ദരി'ക്ക് 150 കിലോഗ്രാം വരെ ഭാരം വഹിക്കാന് കഴിയും. ഉപയോഗ രഹിതമായ വസ്തുക്കള് വിനിയോഗിച്ചാണു ഓട്ടോറിക്ഷയുടെ നിര്മാണം.
കിക്കര്, ഇന്ഡിക്കേറ്റര്, വൈപര്, ഹെഡ്ലൈറ്റ്, ഹോണ്, ഫസ്റ്റ് എയ്ഡ് ബോക്സ്, പാട്ടുപെട്ടി തുടങ്ങിയവ എല്ലാമുള്ള ഒരു സമ്പൂര്ണ ഓട്ടോറിക്ഷയാണ് സുന്ദരി. ഓട്ടോയുടെ മുന്വശത്തിനായി ഡിടിഎച്ച് ഡിഷ് ആന്റിനയും സ്റ്റൗവിന്റെ മെറ്റല് ഭാഗം ബേസ്മെന്റിനായും ഉപയോഗപ്പെടുത്തി. സൈക്കിളിന്റെ ഡിസ്ക് ബ്രേക്ക് രീതിയാണു മുച്ചക്രത്തിലേക്കു പകര്ത്തിയത്. തടിയില് ഒരുക്കിയ ചക്രങ്ങളില് ടയറിന്റെ ഗ്രിപ്പ് ഒട്ടിച്ചാണു ടയര് നിര്മിച്ചത്. മൂന്നരയടി ഉയരവും ആനുപാതികമായ നീളവുമുള്ള 'കുട്ടി ഓട്ടോ' ഏഴര മാസത്തെ അധ്വാനത്തിലൂടെയാണ് അരുണ്കുമാര് നിര്മിച്ചത്. ഉപകരണങ്ങള്ക്കു മാത്രമായി 15000 രൂപ ചെലവായി.
ചെറുപ്പം മുതല് കളിക്കാനായി വാഹനങ്ങള് സ്വന്തമായി നിര്മിച്ചിരുന്ന അരുണ്കുമാര് എസ്എസ്എല്സിക്കു പഠിക്കുമ്പോള് മണ്ണുമാന്തിയന്ത്രത്തിന്റെ വര്ക്കിങ് മോഡല് നിര്മിച്ചു സംസ്ഥാന തലത്തില് ഒന്നാം സ്ഥാനം നേടിയിരുന്നു. പ്രാരാബ്ധങ്ങള്മൂലം ചെറുപ്പകാലത്തു തനിക്കു ലഭിക്കാതെ പോയ കളിപ്പാട്ടങ്ങള് കഠിനാധ്വാനത്തിലൂടെ മക്കള്ക്കു നിര്മിച്ചു നല്കുന്നതിലാണ് ഈ പിതാവിന്റെ സന്തോഷം. നഴ്സായി ജോലി ചെയ്യുന്ന അരുണ്കുമാറിന്റെ ആവേശമാണ് ചെറു വാഹനങ്ങളുടെ നിര്മ്മാണം. നെടുമ്പള്ളി എന്ന പേരില് ലൂസിഫറിലെ മോഹന്ലാലിന്റെ വാഹനം നിര്മാണം പൂര്ത്തീകരിച്ചു കൊണ്ടിരിക്കുകയാണ് അരുണ് കുമാര്.
https://www.facebook.com/Malayalivartha
