ഇടുക്കിയുടെ സ്വന്തം അച്ചന്‍, ഫാ. ജോസഫ് പുത്തന്‍പുരയ്ക്കല്‍ സോഷ്യല്‍ മീഡിയായിലും, യൂ ടൂബിലും വൈറലായ ഒരു പുരോഹിതനാണ്. കട്ടപ്പനയ്ക്കടുത്ത് വലിയതോവാളയില്‍ നിന്ന് ളോഹയിട്ട് പൗരോഹിത്യത്തിലേക്ക് മലയിറങ്ങിയ കാപ്പിരിയച്ചന്‍. ലോകത്താകമാനമുള്ള ലക്ഷക്കണക്കിന് മലയാളികള്‍ കണ്ടതാണ് അദ്ദേഹത്തിന്റെ വചന പ്രഘോഷണരീതി. അവയിലേതിലെങ്കിലും ഒന്നിനു ചെവി ചേര്‍ത്ത് നോക്കൂ നിങ്ങളും ഫാദറിന്റെ നര്‍മ്മ മധുരമായ പ്രഭാഷണം കേട്ടിരിക്കും. ദൈവവചനങ്ങളെ തമാശയുടെ മേമ്പൊടി ചാലിച്ച് വിശ്വാസികളുടെ ഹൃദയത്തില്‍ ആഴത്തില്‍ പതിപ്പിക്കുന്ന ആ ശൈലി അക്രൈസ്തവരേപ്പോലും പിടിച്ചിരുത്തും.

കുടുബ ബന്ധങ്ങളെ വിളക്കി നിറുത്താന്‍ സഹായിക്കുന്ന കൊച്ചു കൊച്ചു വര്‍ത്തമാനങ്ങള്‍. യൂ ട്യൂബിലും മറ്റ് സോഷ്യല്‍ മീഡിയായിലും ഫാദര്‍ വൈറലാകാനുള്ള കാരണവും അത് തന്നെ. നര്‍മ്മമാണ് കൈമുതല്‍. അതുകൊണ്ട് തന്നെ പ്രേക്ഷകരും അച്ചന് ഏറെയുണ്ട്. ഇപ്പോള്‍ അച്ഛന്റെ ഒരു പ്രസംഗ ഓഡിയോ യൂടൂബില്‍ വൈറലാകുന്നു. പ്രസംഗത്തിലെ അവതരണമാണ് ഇതിന് കാരണം. മാവിനെ വെഞ്ചരിച്ച കഥയാണ് അച്ചന്‍ പറയുന്നത്. അന്ധവിശ്വാസങ്ങള്‍ ഇത്രയും വേണമോ എന്ന ചോദ്യമാണ് ഈ തമാശയിലൂടെ അച്ചന്‍ വിശ്വാസികളിലേക്ക് കടത്തി വിടുന്നത്. ആലുവ മിണ്ടാമഠത്തിലെ ആ കഥ അച്ചന്‍ പറയുന്നത് കേട്ടുനോക്കൂ.

വൈറലാകുന്ന ഓഡിയോ ഇങ്ങനെ:

ആലുവ മിണ്ടാമഠത്തില്‍ ധ്യാനിച്ചു കൊണ്ടിരിക്കുമ്പോള്‍ മദര്‍ പറഞ്ഞു. ഇവിടത്തെ മാവില്‍ മാങ്ങയുണ്ട്. അണ്ടിയിലെല്ലാം വണ്ട്. ഈ വണ്ടിനെയെല്ലാം ബന്ധിച്ചിട്ട് പോകണമെന്ന് പറഞ്ഞു. വിശുദ്ധജലം കൊണ്ടു വരാന്‍ പറഞ്ഞു. സിസ്റ്റേഴ്സ് നിഷ്‌കളങ്കമായി പ്രാര്‍ത്ഥിച്ചു. ഉള്ളുരുകി പ്രാര്‍ത്ഥിച്ചു. ഈ മാവില്‍ കാലാകാലം ഉണ്ടാകുന്ന മാങ്ങയിലെ അണ്ടിയില്‍ ഉണ്ടാകുന്ന വണ്ടിനെ ബന്ധിക്കണേ എന്ന് പ്രാര്‍ത്ഥിച്ച് വെള്ളവും തളിച്ചിട്ടു പോയി. ഒരാഴ്ച കഴിഞ്ഞപ്പോള്‍ മദറിന്റെ കത്ത്. എന്റെ അച്ചാ... അച്ചന്‍ പ്രാര്‍ത്ഥിക്കുമെന്ന് കേട്ടിട്ടുണ്ട്. ഇത്രോം പവറുള്ള പ്രാര്‍ത്ഥനയാണെന്ന് ഇപ്പോഴാ മനസ്സിലായത്. അച്ചന്‍ പ്രാര്‍ത്ഥിച്ചിട്ട് പോയി മൂന്നാം ദിവസം ഭയങ്കര കാറ്റും മഴയും വന്നപ്പോള്‍ മാവ് മൂടോടെ ഒടിഞ്ഞു പോയി. അതോടെ വെഞ്ചെരിപ്പും തീര്‍ന്നുവത്രേ.

2011-ല്‍ കുവൈത്തില്‍ അച്ചന്‍ നടത്തിയ പ്രഭാഷണമാണ് യൂ ട്യൂബില്‍ ആദ്യമായി അപ്പ്‌ലോഡ് ചെയ്തത്. കുവൈത്തിലെ പ്രവാസികളായിരുന്നു അതിന് പിന്നില്‍. രണ്ട് മാസം കൊണ്ട് ലക്ഷക്കണക്കിന് പേരാണ് അത് കണ്ടത്. ഇതിനോടകം അതിന് കാതോര്‍ത്തവര്‍ 15 ലക്ഷത്തിലധികം പേരാണ്. പിന്നീട് കേരളത്തിലും ഇന്ത്യയില്‍ മറ്റിടങ്ങളിലും വിവിധ രാജ്യങ്ങളിലും നടത്തിയ നൂറുകണക്കിന് പ്രഭാഷണങ്ങള്‍ യൂ ട്യൂബിലും ഫെയ്‌സ് ബുക്കിലും, വാട്‌സ് ആപ്പിലും അപ്പ് ലോഡ് ചെയ്യപ്പെട്ടു. എല്ലാം ഹിറ്റായി. അത്തരത്തിലൊന്നാണ് ആലുവ മിണ്ടാമഠം കഥയും. അച്ചന്‍ പ്രഭാഷണത്തിന് മാത്രമായി ഇതിനോടകം സഞ്ചരിച്ചത് 42-ലധികം ലോക രാഷ്ട്രങ്ങളാണ്.

നരിയംപാറയിലെ ദേവസ്വം കോളേജിലായിരുന്നു അച്ചന്റെ പ്രീ ഡിഗ്രി പഠനം. അന്ന് കേരള കോണ്‍ഗ്രസിന്റെ വിദ്യാര്‍ത്ഥി വിഭാഗത്തിന്റെ ജില്ലാ സെക്രട്ടറിയായിരുന്നു. കേരള കോണ്‍ഗ്രസ് പിളര്‍ന്നപ്പോള്‍ രാഷ്ട്രീയം വിട്ടു. പിന്നീടാണ് പൗരോഹിത്യത്തിലേക്ക് തിരിഞ്ഞത്. ഫിലോസഫിയില്‍ കാലിക്കട്ട് സര്‍വകലാശാലയില്‍ നിന്ന് മൂന്നാം റാങ്കോടെ ബിരുദവും, തിരുവനന്തപുരം ലോ അക്കാദമിയില്‍ നിന്ന് എല്‍.എല്‍.ബിയും നേടിയിട്ടുണ്ട്.