ചെറിയ മനുഷ്യര്‍ അധിവസിക്കുന്ന ഒരു ദ്വീപിന്റെയും അവിടത്തെ ആളുകളുടെയും കഥ പറഞ്ഞ വിനയന്റെ അദ്ഭുത ദ്വീപ് എന്ന ചിത്രം കണ്ടിട്ടില്ലാത്ത മലയാളികള്‍ ചുരുക്കമായിരിക്കും. ഈ അദ്ഭുത ദ്വീപിനോട് ഏറെ സാദ്യശ്യമുള്ള ഒരു പ്രദേശം ഇറാനിലുണ്ട്. സിനിമയില്‍ നിന്ന് വ്യത്യസ്മായി ഇവിടെയുണ്ടായിരുന്ന സ്ത്രീകളും പുരുഷന്മാരും ഒരുപോലെ ചെറിയ മനുഷ്യരായിരുന്നു. സിനിമയില്‍ ആ ദ്വീപിലെ പുരുഷന്മാര്‍ക്കു മാത്രമാണ് ഉയരക്കുറവ് ഉണ്ടായിരുന്നത്.

ഇറാന്റെ തെക്കേ അറ്റത്ത് അഫ്ഘാന്‍ അതിര്‍ത്തിയില്‍ നിന്ന് 75 കിലോമീറ്റര്‍ മാറി സ്ഥിതി ചെയ്യുന്ന മഖുനിക് ആണ് ആ ഗ്രാമം. ഒരു നൂറ്റാണ്ടു മുമ്പുവരെ ഇവിടെ ജീവിച്ചിരുന്ന ആളുകള്‍ക്ക് ഒരു മീറ്റര്‍ വരെ മാത്രമെ ഉയരമുണ്ടായിരുന്നുള്ളു. ഇറാന്റെ മറ്റ് ഭാഗങ്ങളില്‍ നിന്നെല്ലാം ഒറ്റപ്പെട്ടുകിടക്കുന്ന ഒരു പ്രദേശമാണിത്. 2005-ലാണ് ഇവിടെ ഒളിഞ്ഞുകിടന്ന ഈ പുരാതന കുള്ളന്‍ ഗ്രാമത്തെക്കുറിച്ച് പുറംലോകമറിയുന്നത്. 2005-ല്‍ ഇവിടെ നടത്തിയ ഗവേഷണത്തില്‍ 25 സെന്റീമീറ്റര്‍ മാത്രം നീളമുള്ള മമ്മീകരിച്ച ഒരു മൃതദേഹം കണ്ടെത്തി. ഇതോടെ മഖുനിക് ഉള്‍പ്പെടുന്ന ഇവിടത്തെ 13 ഗ്രാമങ്ങള്‍ പണ്ട് നീളംകുറഞ്ഞ മനുഷ്യര്‍ അധിവസിച്ചിരുന്ന പ്രദേശമാണെന്ന് ഗവേഷകര്‍ ഉറപ്പിച്ചു.

എന്നാല്‍ 25 സെന്റീമീറ്റര്‍ മാത്രം നീളമുള്ള ആ മമ്മി ഒരു കുഞ്ഞിന്റേതാണെന്ന് പിന്നീട് നടത്തിയ പഠനങ്ങളില്‍ തെളിഞ്ഞു. എന്നാലും മഖുനിക് ഉള്‍പ്പെടുന്ന പ്രദേശങ്ങളില്‍ ജീവിച്ചിരുന്ന ആളുകള്‍ക്ക് സാധാരണ മനുഷ്യരേക്കാള്‍ ഉയരം കുറവായിരുന്നു എന്നു തെളിയിക്കുന്ന മറ്റു പല തെളിവുകളും ഈ പ്രദേശത്തുനിന്ന് ലഭിച്ചിട്ടുണ്ട്.

ഒന്നര മുതല്‍ രണ്ടു മീറ്റര്‍ വരെ മാത്രം ഉയരമുള്ള മണ്‍ വീടുകളാണ് ഇവിടത്തെ മനുഷ്യരുടെ ഉയരക്കുറവിന്റെ ഏറ്റവും വലിയ തെളിവ്. മരത്തില്‍ തീര്‍ത്ത വാതിലുകളും ജനലുകളുമൊക്കെയുള്ള ഈ വീടുകള്‍ പുറത്തുനിന്നു നോക്കിയാല്‍ ചെറുതെങ്കിലും ഉള്ളില്‍ എല്ലാവിധ സൗകര്യങ്ങളുമുണ്ട്. ഒരു ശരാശരി മനുഷ്യന് ഇതിനുള്ളില്‍ ക്കയറി കാഴ്ചകള്‍ കാണുന്നത് ഏറെ പ്രയാസകരമായ കാര്യമാണ്.


മഖുനിക്കിലെ ആളുകളുടെ ഉയരക്കുറവിനു പിന്നില്‍ സങ്കടകരമായ ഒരു കാരണമുണ്ട്. അപൂര്‍വ്വമായി മാത്രം മഴ ലഭിക്കുന്ന ഈ പ്രദേശത്ത് മൃഗങ്ങളെ വളര്‍ത്തുന്നതും കൃഷി ചെയ്യുന്നതുമൊക്കെ വളരെ ബുദ്ധിമുട്ടുള്ള കാര്യമായിരുന്നു. അതുകൊണ്ടുതന്നെ ഇവര്‍ ഭക്ഷണത്തിനും വെള്ളത്തിനും കടുത്ത ക്ഷാമം അനുഭവിച്ചിരുന്നു. തന്മൂലമുണ്ടായ പോഷകക്കുറവായിരുന്നു ഇവരുടെ ഉയരക്കുറവിന്റെ കാരണം. വരണ്ട താഴ് വരകളില്‍ വളരുന്ന ഒരുതരം പുല്ലായിരുന്നു ഇവരുടെ പ്രധാന ഭക്ഷണം. ഈ പുല്ല് ഉണക്കിപ്പൊടിച്ച് ചില റൊട്ടികളും മറ്റും ഉണ്ടാക്കിയിരുന്നു.

ഇരുപതാം നൂറ്റാണ്ടിന്റെ മധ്യത്തോടെ മഖുനിക് ഉള്‍പ്പെടുന്ന പ്രദേശങ്ങളിലേക്ക് കൂടുതല്‍ റോഡുകള്‍ നിര്‍മ്മിക്കപ്പെട്ടു. ഇതോടെ ഈ പ്രദേശത്തിന് പുറംലോകവുമായി ബന്ധമുണ്ടായി . അങ്ങനെ പോഷകസമൃദ്ധമായ ഭക്ഷണം മഖുനിക്കിലേക്ക് എത്തിത്തുടങ്ങി. ക്രമേണ ഇവിടത്തെ ആളുകള്‍ക്ക് ഉയരംവച്ചുതുടങ്ങി. അതോടെ മണ്ണില്‍തീര്‍ത്ത അവരുടെ കുഞ്ഞുവീടുകളില്‍ താമസം അസാധ്യമായി മാറി. പുതിയ വീടുകള്‍ പണിയാന്‍ നിര്‍ബന്ധിതരായതോടെ ആളുകള്‍ അവരുടെ പഴയ വീടുകള്‍ ഉപേക്ഷിച്ച് കുറച്ചുകൂടി സൗകര്യമുള്ള സ്ഥലങ്ങള്‍ തേടിപ്പുറപ്പെട്ടു. അതോടെ മഖുനിക്കിലെ പുരാതന നഗരം അവിടെ അവശേഷിച്ചു. ഇപ്പോള്‍ ഈ കുള്ളന്‍ വീടുകളിലൊന്നും ആരും താമസിക്കുന്നില്ല. ലോകത്തിന്റെ വിവിധഭാഗങ്ങളില്‍ നിന്നെത്തുന്ന സഞ്ചാരികള്‍ക്ക് അദ്ഭുത കാഴ്ചകള്‍ സമ്മാനിച്ചുകൊണ്ട് അവയങ്ങനെ നില്‍ ്ക്കുന്നു.