യുഎസിലെ ടാനിയ യംഗ് എന്ന പെണ്‍കുട്ടിയും കൂട്ടുകാരും ടൂര്‍ പോയത് ടെന്നസിയിലെ ഗാറ്റ് ലിന്‍ബര്‍ഗിലുള്ള വനത്തിലേക്കാണ്്്. പോകുന്നവഴിക്ക് ഒരുപ്രദേശത്ത് എത്തിയപ്പോള്‍ അവര്‍ വണ്ടിനിറുത്തി പുറത്തിറങ്ങി. വണ്ടി വഴിയിലിട്ടിട്ട് അവര്‍ കുറച്ച് ഉള്ളിലേക്ക് കയറി ചിത്രങ്ങളൊക്കെയെടുത്ത് തിരിച്ചെത്തിയപ്പോള്‍ ശരിക്കും ഞെട്ടി.തങ്ങളുടെ വണ്ടിക്കകത്ത് ഒരു കരടിക്കുട്ടന്‍ ഇരിക്കുന്നു.

എന്തു ചെയ്യണമെന്നറിയാതെ കൂട്ടുകാര്‍ പരുങ്ങി നില്‍ക്കുമ്പോഴാണ് ആ കരടിക്കുട്ടന്റെ അമ്മക്കരടി വാഹനത്തിനടുത്തേക്ക് എത്തിയത്. അമ്മക്കരടി വാഹനത്തിന്റെ വാതിലിലും ചില്ലിലുമൊക്കെ അടിച്ച് ബഹളം വയ്ക്കാന്‍ തുടങ്ങി. വാഹനത്തിനകത്ത് കുടുങ്ങിപ്പോയ കരടിക്കുഞ്ഞ് കാറിനകമെല്ലാം നശിപ്പിക്കാന്‍ തുടങ്ങി. ടാനിയയും കൂട്ടുകാരും സംഭവങ്ങളെല്ലാം കാമറയില്‍ പകര്‍ത്തി.

ഈസമയം സന്ദര്‍ശകരില്‍ ഒരാള്‍ സമാന്തരമായി മറ്റൊരു കാറിലെത്തിയ ശേഷം കാറിന്റെ ഡോര്‍ തുറന്നുകൊടുത്തു. കുറച്ചു സമയത്തെ പരാക്രമത്തിനുശേഷം കരടിക്കുഞ്ഞ് കാറില്‍ നിന്നിറങ്ങി അമ്മയ്‌ക്കൊപ്പം കാട്ടിലേക്ക് പോയി. ഭയന്നുപോയ കൂട്ടുകാര്‍ പോലീസിനെ വിളിച്ചുവരുത്തി. അവരെത്തി കാര്‍ നന്നാക്കിയ ശേഷമാണ് സംഘം യാത്ര തുടര്‍ന്നത്.

കാറിനകത്തുണ്ടായിരുന്ന ഭക്ഷണപ്പൊതി എടുക്കാനാകും കരടി കാറിനുള്ളില്‍ കയറിയതെന്ന് കരുതുന്നു. കുറച്ചൊന്നു ഭയന്നെങ്കിലും സമൂഹമാധ്യമങ്ങളില്‍ വൈറലായിക്കൊണ്ടിരിക്കുന്ന ഒരുപിടി ചിത്രങ്ങള്‍ പകര്‍ത്താന്‍ കഴിഞ്ഞതിന്റെ സന്തോഷത്തിലാണ് ടാനിയയും കൂട്ടുകാരും.