ഡൗണ്സ് സിന്ഡ്രോമുമായി പിറന്ന മകനെ ഉപേക്ഷിക്കാത്തതിന് ഭാര്യ ഭര്ത്താവിനെ ഉപേക്ഷിച്ചു
ന്യൂസിലന്ഡിലെ ഓക്ലന്ഡിലെ സാമുവല് ഫോറസ്റ്റും ഭാര്യ റുസാന് ബദല്യനും തന്റെ ആദ്യ കുഞ്ഞിന്റെ ജനനത്തിനായി ആകാംഷയോടെ കാത്തിരിക്കുകയായിരുന്നു. ഭാര്യയുടെ നാടായ അര്മീനിയയിലായിരുന്നു പ്രസവം. ജനിച്ച കുഞ്ഞിനെ കുട്ടിയുടെ അച്ഛനേയോ അമ്മയേയോ കാണിക്കാന് ആശുപത്രി അധികൃതര് തയ്യാറാകാതിരുന്നപ്പോള് തന്നെ ഫോറസ്റ്റിന് അല്പം ആശങ്കയുണ്ടായി. കുറച്ചു സമയത്തിനുശേഷം ഡോക്ടര്മാര് അയാളോടു പറഞ്ഞു. നിങ്ങളുടെ കുഞ്ഞിന് അല്പം ഗുരുതരമായ ഒരു പ്രശ്നമുണ്ടെന്ന്. കുഞ്ഞിന് ഡൗണ്സ് സിന്ഡ്രോം എന്ന രോഗാവസ്ഥയുണ്ടെന്നറിഞ്ഞ് ഞെട്ടിപ്പോയെങ്കിലും തന്റെ മകനെ കണ്ടപ്പോള് അയാളുടെ സങ്കടങ്ങളെല്ലാം മാറി. അവന് ഒരു കൊച്ചു സുന്ദരനാണ്. അവന് എന്തു പ്രശ്നമുണ്ടെങ്കിലും സാരമില്ല, ഞങ്ങളവനെ പൊന്നു പോലെ വളര്ത്തുമെന്ന് ഫോറസ്റ്റ് തീരുമാനിച്ചു.
എന്നാല് ലിയോ എന്നു പേരിട്ട തന്റെ കുഞ്ഞിനെ കണ്ടതിനുശേഷം ഭാര്യയുടെ മുറിയില് തിരിച്ചെത്തിയ ഫോറസ്റ്റ് ഭാര്യ റുസാന്റെ പ്രതികരണം കണ്ട് ഞെട്ടിപ്പോയി. അര്മീനിയയില് ഇത്തരത്തിലൊരു കുഞ്ഞു ജനിക്കുന്നത് കുടുംബത്തിന് നാണക്കേടാണെന്നും അതുകൊണ്ട് കുഞ്ഞിനെ ഉപേക്ഷിക്കണമെന്നുമാണ് ഭാര്യ ആവശ്യപ്പെട്ടത്. കുട്ടിയെ ഉപേക്ഷിക്കാന് തയ്യാറല്ലെങ്കില് കൂടെ ജീവിക്കാന് ഒരുക്കമല്ലെന്ന് അവള് തീര്ത്തു പറഞ്ഞു. അവള് ഒരാഴ്ച കാത്തു നോക്കിയെങ്കിലും കുഞ്ഞിനെ ഉപേക്ഷിക്കാന് ഫോറസ്റ്റ് തയ്യാറാകാതിരുന്നതിനാല് അവള് വിവാഹമോചനത്തിന് അപ്പീല് ഫയല് ചെയ്തു. കുഞ്ഞിനെയും കൂട്ടി ന്യൂസിലന്ഡിലേയ്ക്ക് മടങ്ങാനാണ് ഫോറസ്റ്റിന്റെ തീരുമാനം. അവന്റെ കുടുംബത്തിലെല്ലാവരും ആഹ്ലാദത്തോടെ കാത്തിരിക്കുകയാണ്.
മനുഷ്യരില് 23 ജോഡി ക്രോമസോമുകളുള്ളതിലെ, ഇരുപത്തിയൊന്നാമത്തെ ജോഡിയുടെ സ്ഥാനത്ത്, രണ്ടെണ്ണത്തിന് പകരം മൂന്നെണ്ണം വരുന്നതു മൂലം ഉണ്ടാകുന്ന ജനിതക രോഗമാണ് ഡൗണ്സ് സിന്ഡ്രോം. എങ്കിലും വിദ്യാഭ്യാസവും ചിട്ടയായ ആരോഗ്യപാലനവും വഴി ഇത്തരത്തിലുള്ളവരെ സ്വയംപര്യാപ്തമാക്കാന് കഴിയുന്നതാണ്. ഫോറസ്റ്റും അതു തന്നെയാണ് ചെയ്യാന് ഉദ്ദേശിക്കുന്നത്. സാമ്പത്തികമായി അത്ര ഉയര്ന്ന സ്ഥിതിയിലല്ലാത്ത അയാള് കുഞ്ഞിന്റെ സംരക്ഷണത്തിന് മറ്റാരെയെങ്കിലും ചുമതലപ്പെടുത്തുകയോ, കുഞ്ഞിനെ ഡേ കെയറിലാക്കുവാനോ ഇഷ്ടപ്പെടാത്തതിനാല് ഗോഫണ്ട് മീ എന്നൊരു പേജ് നെറ്റില് തുടങ്ങിയിട്ടുണ്ട്. അതിലേയ്ക്ക് ഇന്റര്നെറ്റില് നിന്നും സഹായം ഒഴുകുകയാണ്.
ഡൗണ്സിന്ഡ്രോമുമായി ജനിച്ച തങ്ങളുടെ കുഞ്ഞിനെ ഓസ്ട്രേലിയന് ദമ്പതികള് ഉപേക്ഷിച്ച വാര്ത്ത അടുത്തിടെ പുറത്തു വന്നിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha