പ്രകൃതിയുടെ വികൃതികള്‍ ചിലപ്പോഴൊക്കെ മനുഷ്യരുടെ ബുദ്ധിയ്ക്കും ഗ്രഹണശക്തിക്കുമൊക്കെ അംഗീകരിക്കാവുന്നതിനും അപ്പുറമായിരിക്കും. സൗത്ത് ഈസ്റ്റ് ലണ്ടനിലെ ഗ്രീന്‍വിച്ചിലുളഅള ക്യാലി മാര്‍ട്ടിന്‍ നാലാമത്തെ പ്രാവശ്യം ഗര്‍ഭിണിയായപ്പോള്‍ അവളും ഇരുപത്തിനാലുകാരനായ ബോയ്ഫ്രണ്ട് കെയ്‌ലാന്‍ ബ്രൗറ്റണും ഉള്ളുരുകി പ്രാര്‍ത്ഥിച്ചു . ഈ കുഞ്ഞിനെയെങ്കിലും തങ്ങള്‍ക്ക് കിട്ടണേ എന്ന്. ഇതിനു മുമ്പ് മൂന്നു പ്രാവശ്യം ക്യാലി ഗര്‍ഭിണി ആയെങ്കിലും അതു മൂന്നും അലസിപ്പോകുകയായിരുന്നു, പക്ഷേ ഇത്തവണയും അവരുടെ പ്രാര്‍ത്ഥന ഫലിച്ചില്ല. കാരണം രണ്ടു മാസമായപ്പോഴേക്കും അവളുടെ കുഞ്ഞ് ഗര്‍ഭ പാത്രത്തിലല്ല വളരുന്നതെന്നും ഫലോപ്പിയന്‍ ട്യൂബിലാണെന്നും കണ്ടെത്തി.

എക്‌ടോപ്പിയല്‍ പ്രഗ്നന്‍സി എന്നു പറയുന്ന മാരകമായ സ്ഥിതി വിശേഷമാണത്. ആ ഭ്രൂണത്തെ ട്യൂബിനുളളില്‍ തുടര്‍ന്നു വളരാന്‍ അനുവദിച്ചാല്‍ ഫലോപ്പിയന്‍ ട്യൂബ് പൊട്ടി രക്തസ്രാവമുണ്ടായി അമ്മ മരിക്കാനാണു സാധ്യത. തന്‍ലം അടിയന്തിര ശസ്ത്രക്രീയയിലൂടെ ഫലോപ്പിയന്‍ ട്യൂബില്‍ വളരുന്ന ഭ്രൂണത്തെ നീക്കംചെയ്യുകയല്ലാതെ മറ്റു പോംവഴികളൊന്നുമില്ലെന്ന് അറിഞ്ഞപ്പോള്‍ ക്യാലിയും കെയ്‌ലാനും കടുത്ത നിരാശയിലായി. തങ്ങള്‍ക്ക് ഒരിക്കലും അച്ഛനും അമ്മയും ആകാന്‍ സാധിക്കില്ലായിരിക്കും എന്ന ചിന്തയില്‍ അവര്‍ ആകെ തളര്‍ന്നു പോയി. അടിയന്തിര ശസ്ത്രക്രിയയിലൂടെ ഗര്‍ഭ നീക്കം ചെ.യ്തതിനുശേഷം കടുത്ത ദുഖത്തിലായിരുന്നു ഇരുവരും.

ഒരു മാസം കഴിഞ്ഞപ്പോഴേയ്ക്കും ക്യാലിയ്ക്ക് വല്ലാത്ത വയറുവേദന തുടങ്ങി. വേദന സഹിക്കാവുന്നതിലും അപ്പുറമായപ്പോള്‍ ആശുപത്രിയിലെത്തിച്ചു. അള്‍ട്രാ സൗണ്ട് സ്‌കാന്‍ നടത്തി. അതിന്റെ റിപ്പോര്‍ട്ട് കണ്ട് ഞെട്ടിയത് ഡോക്ടര്‍മാരാണ്. ക്യാലി മൂന്നു മാസം ഗര്‍ഭിണിയാണ് എന്നായിരുന്നു കാരണം. അതായത്, ഫലോപ്പിയന്‍ ട്യൂബിലെ ഗര്‍ഭത്തിന് രണ്ടു മാസം പ്രായമായപ്പോള്‍ ശസ്ത്രക്രിയ നടത്തിയപ്പോള്‍, ക്യാലിയുടെ ഗര്‍ഭ പാത്രത്തിനുള്ളില്‍ രണ്ടു മാസം പ്രായമായ മറ്റൊരു ഭ്രൂണം വളരുന്നുണ്ടായിരുന്നു.

ഒരേ സമയം രണ്ടു ഭ്രൂണങ്ങള്‍ രണ്ടിടത്തായി വളരാന്‍ തുടങ്ങുക എന്ന അപൂര്‍വ്വതയാണ് ക്യാലിയുടെ കാര്യത്തില്‍ സംഭവിച്ചത്. എംബിബിഎസിനു പഠിക്കുമ്പോള്‍ ഇത്തരത്തില്‍ ഗര്‍ഭധാരണം നടക്കാമെന്നും അതിന് 50,000 ല്‍ ഒരു സാധ്യതയുണ്ടെന്നുമൊക്കെ പഠിച്ചിട്ടുണ്ടെങ്കിലും അത്തരമൊന്ന് ജീവിതത്തില്‍ ആദ്യമായി നേരിട്ടു കാണുകയായിരുന്നു ഡോക്ടര്‍മാര്‍. കൃത്രിമ ബീജധാരണത്തിലൂടെ ഗര്‍ഭം ധരിക്കുന്നവര്‍ക്കാണ് ഇങ്ങനെയുണ്ടാകാന്‍ സാധ്യത കൂടുതലുള്ളത് എന്നിരിക്കെ സ്വാഭാവിക രീതിയില്‍ ഗര്‍ഭിണിയായ ക്യാലിയുടെ കാര്യം കൂടുതല്‍ അദ്ഭുതം ഉളവാക്കി.
നേരത്തെ നടന്ന ശസ്ത്രക്രീയയുടെ സമയത്ത് ഈ ഭ്രൂണം നശിപ്പിക്കപ്പെടാനുള്ള സാധ്യത വളരെയേറെയായിരുന്നു. അതുമല്ലെങ്കില്‍ ശസ്ത്രക്രീയ്ക്കുശേഷം ഗര്‍ഭമലസിപ്പോകുവാനും ഇടയുണ്ടായിരുന്നു. ഇങ്ങനെയുള്ള പ്രതികൂല സാഹചര്യങ്ങളെല്ലാം ഉണ്ടായിട്ടും ദോഷമൊന്നും സംഭവിക്കാതെ നിലനിന്ന ആ കുഞ്ഞ് അത്ഭുതശിശുവാണെന്നാണ് ഡോക്ടര്‍മാരുടെ അഭിപ്രായം. ഏതായാലും അമ്മ കടന്നു പോയ കഷ്ടപ്പാടിലെല്ലാം അമ്മയോടൊപ്പമുണ്ടായിരുന്ന എമ്മി ജനിച്ച് ഇപ്പോള്‍ മിടുക്കിക്കുട്ടിയായി ഇരിക്കുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക