സത്യസന്ധതക്കു പകരമായി കിട്ടിയത് ആജീവനാന്തസൗഹൃദം
കള്ളവുമില്ല ചതിയുമില്ല...എള്ളോളമില്ല പൊളിവചനം എന്നു പാടി മലയാളികളായ നമ്മള്‍ ആഘോഷിക്കുന്നത് നഷ്ടപ്പെട്ടുപോയതായി നാം വിചാരിക്കുന്ന ഒരു സുന്ദരകാലത്തേക്കുറിച്ചുള്ള ഓര്‍മ്മകളാണ്. ആരും പരസ്പരം ചതിക്കാതേയും വഞ്ചിക്കാതേയും പരസ്പരബഹുമാനത്തോടെ, സഹവര്‍ത്തിത്വത്തില്‍ കഴിഞ്ഞ ആ പഴയ കാലം തിരിച്ചെത്തിയിരുന്നെങ്കില്‍ എന്ന് ആഗ്രഹിക്കാത്തവരുണ്ടാവില്ല.
എന്നാല്‍ നമുക്കു ചുറ്റുമുള്ളവരില്‍ ചിലരിലെങ്കിലും ആ കാലത്തിന്റെ നന്മയെ ഓര്‍മ്മിപ്പിക്കുന്ന ഹൃദയവിശുദ്ധി ഇപ്പോഴും ഉണ്ടെന്നറിയുന്നത് വല്ലാത്ത ആശ്വാസമുണ്ടാക്കും എന്ന കാര്യത്തില്‍ തര്‍ക്കത്തിനു വഴിയില്ല.
യു.കെ - യിലെ വെസ്റ്റ് മിഡ്‌ലാന്‍സിനടുത്തുള്ള ഹിയര്‍ഫോര്‍ഡിലുള്ള 46-കാരനായ ഏഡ്രിയന് ക്വിന്‍ കാര്‍ ഡീലര്‍ ആണ്. ഒരു ദിവസം വൈകുന്നേരം ഒരു കാര്‍വില്പനയൊക്കെ കഴിഞ്ഞ് ഏകദേശം ഒന്‍പതുലക്ഷത്തിമുപ്പതിനായിരത്തോളം രൂപ കൈയിലെത്തി. അപ്പോഴേക്കും വളരെ വൈകിയിരുന്നു. ഇനി അന്ന് ബാങ്കിലേക്കു പോയാല്‍ വീട്ടിലെത്താന്‍ പിന്നേയും വൈകും. തന്മൂലം ആ പണം ഒരു ബാഗിലാക്കി വീട്ടിലേക്ക് കൊണ്ടുപോകാമെന്ന് തീരുമാനിച്ചു.
വെസ്റ്റ് മിഡ്‌ലാന്‍സിലെ വാള്‍സാള്‍ റെയില്‍വേ സ്‌റ്റേഷനിലിറങ്ങി ഒരു ടാക്‌സി പിടിച്ചു വീട്ടിലെത്തി. വീട്ടിലെത്തി അല്‍പ്പം കഴിഞ്ഞപ്പോഴാണ് പണമടങ്ങിയ ബാഗ് ടാക്‌സിയില്‍ വച്ചു മറന്നെന്ന് തിരിച്ചറിഞ്ഞത്. ഏഡ്രിയന്റെ ചങ്കിടിച്ചുപോയി. ആ കാശ് നഷ്ടമായാല്‍ ഏറെക്കുറെ തന്റെ ബിസിനസ്സ് തന്നെ ഇല്ലാതാകുമെന്ന കാര്യം ഏഡ്രിയന് അറിയാം. സവാരിക്കായി വിളിച്ച ടാക്‌സിയില്‍ നിന്നും ഇറങ്ങിപ്പോരുമ്പോള്‍ വെറുതേ ടാക്‌സിനമ്പര്‍ ഒന്നു ശ്രദ്ധിച്ചു വയ്ക്കാമെന്നൊന്നും ആരും വിചാരിക്കില്ലലോ! ആ ടാക്‌സിഡ്രൈവറുടെ മുഖം ഓര്‍മ്മയുണ്ടെങ്കിലും ഇത്ര വലിയ ഒരു തുക കൈയ്യില്‍കിട്ടിയാല്‍ അയാളെ തിരക്കിവരുന്ന ഉടമയേയും കാത്ത് ഇരിക്കാന്‍ ശ്രമിക്കുമോ, ആ കാശും കൊണ്ട് പെട്ടെന്നൊന്നും കണ്ടെത്താന്‍ ഇടയില്ലാത്തിടത്തേക്ക് മാറാന്‍ ശ്രമിക്കുമോ, എന്നൊക്കെ ഏഡ്രിയന് ചിന്തിച്ചു നോക്കി.
എന്തായാലും വാള്‍സാള്‍ റെയില്‍വേ സ്‌റ്റേഷന്‍ വരെ ഒന്നുപോയി നോക്കാമെന്നു തന്നെ എഡ്രിയന്‍ തീരുമാനിച്ചു. മറ്റൊരു വണ്ടിപിടിച്ച് റെയില്‍വേസ്റ്റേഷനരികെയെത്തിയപ്പോള്‍ അയാള്‍ക്ക് തന്റെ കണ്ണുകളെ വിശ്വസിക്കാന്‍ കഴിഞ്ഞില്ല.
ഏതുസ്ഥലത്തുനിന്നായിരുവോ അയാള്‍ നേരത്തേ ടാക്‌സി വിളിച്ചത് അതേ സ്ഥലത്ത് ആ കാറും ഡ്രൈവറും ഉണ്ടായിരുന്നു എന്നുമാത്രമല്ല, ഏഡ്രിയന് തിരികെ വരുമ്പോള്‍, തന്നെ എളുപ്പം കണ്ടുപിടിക്കാനായിട്ടാണ് അവിടെത്തന്നെ കാറുമിട്ട് കാത്തിരുന്നതെന്ന് അറിയിച്ചു മുഹമ്മദ് നിസാര്‍ എന്ന ഡ്രൈവര്‍. ആ ബാഗ് തിരികെ ഏഡ്രിയനെ ഏല്‍പ്പിച്ച മുഹമ്മദിനോട്, ഇതിനുള്ളില്‍ സാന്‍ഡ്‌വിച്ചും ന്യൂസ്‌പേപ്പറുമൊന്നും അല്ലെന്നറിഞ്ഞില്ലേ, പിന്നെ നീയെന്താ ഇതുംകൊണ്ട് കടന്നുകളയാതിരുന്നത് എന്നുചോദിച്ചതിന് ഒരുചെറുചിരി മാത്രമായിരുന്നു മറുപടി.
പണമടങ്ങിയ ബാഗ് തിരിച്ചുതന്ന മുഹമ്മദിന് സ്‌നേഹോപഹാരമായി ഒരു തുക ഏഡ്രിയന് കവറിലിട്ടു നല്‍കി. ആ കവറിന്റെ പുറത്ത് എഴുതിയിരുന്നത് ഇത്രമാത്രം; എന്റെ ആജീവനാന്ത സുഹൃത്തിന് എന്ന്! സാധാരണക്കാരനായ ഒരു ഡ്രൈവറുടെ സത്യസന്ധത അയാള്‍ക്ക് നേടിക്കൊടുത്തത് ഒരു ലക്ഷാധിപതിയുമായുള്ള ചങ്ങാത്തം!
https://www.facebook.com/Malayalivartha
