ഇനി രാജി; അല്ലാതെ വിടുന്ന പ്രശ്‌നമില്ലെന്ന് കോണ്‍ഗ്രസും ബി.ജെ.പിയും; കേസു വന്നാലും രാജി വേണ്ട നിലപാടിലേക്ക് സി.പി.എം; എന്‍.ഐ.എയുടെ ചോദ്യം ചെയ്യാന്‍ ഇഡിയുടെ ചോദ്യം ചെയ്യല്‍ പോലെ ലഘുകരിക്കാന്‍ സാധിക്കില്ല; രാജിയില്ലെങ്കില്‍ കേരളത്തില്‍ പ്രതിഷേധങ്ങള്‍ ആളി കത്തും
സ്വര്‍ണക്കടത്ത് കേസില്‍ മന്ത്രി കെ.ടി ജലീലിനെ ഇന്ന് എന്‍.ഐ.എ ചോദ്യം ചെയ്തതോടെ രാജിയില്‍ കുറഞ്ഞതൊന്നും ആവശ്യമില്ലെന്ന കടുത്ത നിലപാടിലേക്ക് നീങ്ങുകയാണ് കോണ്‍ഗ്രസും ബി.ജെ.പിയും. എന്‍.ഐ.എ ചോദ്യം ചെയ്തതോടെ മന്ത്രിക്കെതിരെയുള്ള ആരോപണങ്ങള്‍ ശക്തമാകുമെന്ന മനസിലാക്കി ഒരു മുഴം മുന്നേ എറിയുകയാണ് സി.പി.എം. ഈ വിഷയത്തില്‍ ഇനി മന്ത്രിക്കെതിരെ കേസ് വന്നാലും രാജി വയ്‌ക്കേണ്ടതില്ലെന്നാണ് സി.പി.എമ്മിന്റെ നിലപാട്. അന്വേഷണ ഏജന്‍സികള്‍ വിവരങ്ങള്‍ തേടുന്നു എന്നതിന്റെ പേരില്‍ രാജിവെക്കണമെന്ന ആവശ്യം അംഗീകരിക്കാകില്ല. സ്വര്‍ണക്കടത്തു കേസുമായി ബന്ധപ്പെട്ട് ജലീല്‍ ഒരു കേസിലും പ്രതിയല്ലെന്നും അദ്ദേഹം രാജിവെക്കേണ്ട കാര്യമില്ലെന്നും സിപിഎം കേന്ദ്ര കമ്മിറ്റി അംഗം എം.വി.ഗോവിന്ദന്‍ മാസ്റ്റര്‍ പറഞ്ഞു. സ്വര്‍ണക്കടത്ത് കേസില്‍ ഒന്നാം പ്രതിയായി വരേണ്ട ആള്‍ കേന്ദ്ര മന്ത്രി വി. മുരളീധരനാണെന്നും അദ്ദേഹം തിരിച്ചടിച്ചു. ജലീലിന്റെ രാജി എന്ന ആവശ്യം തള്ളി എല്‍ഡിഎഫ് കണ്‍വീനര്‍ എ. വിജയരാഘവനും രംഗത്തെത്തി. ഒരു തരത്തിലുമുള്ള നിയമലംഘനങ്ങള്‍ നടത്തിയിട്ടില്ലെന്ന് ജലീല്‍ വ്യക്തമാക്കിയിട്ടുണ്ട്. ഏത് ഏജന്‍സിയ്ക്കും അന്വേഷണം നടത്താം. അവര്‍ ചോദിക്കുന്നതില്‍ അറിയുന്ന കാര്യം പറയും. ഇക്കാര്യത്തില്‍ ഒരു ആശങ്കയും ഇല്ലെന്നും അദ്ദേഹം പറഞ്ഞു.
ഇനിയും കൂടുതല്‍ നാണം കെടാന്‍ നില്‍ക്കാതെ മന്ത്രി കെ.ടി.ജലീല്‍ രാജിവെക്കണമെന്നാണ് പ്രതിപക്ഷ നേതാവ് രമേശ് ചെന്നിത്തല പറയുന്നത്. എന്‍.ഐ.എ ഓഫീസില്‍ നിന്ന് മന്ത്രിസ്ഥാനം രാജിവെച്ചുകൊണ്ടാകണം ജലീല്‍ ഇറങ്ങേണ്ടത്. ആദ്യമായിട്ടാണ് കേരളത്തിലെ ഒരു മന്ത്രിയെ ഇ.ഡിയും എന്‍ഐഎയും ചോദ്യം ചെയ്യുന്നതെന്നും അദ്ദേഹം പറഞ്ഞു.എന്‍ഐഎ ചോദ്യം ചെയ്യുന്നത് അതീവ ഗുരുതരമായ വിഷയമാണ്. ഇനിയും നാണം കെടാന്‍ നില്‍ക്കരുത്. തന്നേയും ചോദ്യം ചെയ്യുമോ എന്ന ഭയമാണ് മുഖ്യമന്ത്രിക്ക്. കെ.ടി.ജലീല്‍ ഗുരുതരമായ കുറ്റങ്ങള്‍ ചെയ്തിരിക്കുന്നു എന്നുള്ളതാണ് വസ്തുത. എന്നിട്ടും ഈ മന്ത്രിയെ സംരക്ഷിക്കുന്ന മുഖ്യമന്ത്രിയുടെ നിലപാട് എല്ലാ അഴിമതിക്കാരേയും സംരക്ഷിക്കാനുള്ള നിലയാണ്. അത് കേരളത്തിന് നാണക്കേടാണെന്നും പ്രതിപക്ഷ നേതാവ് പറഞ്ഞു.മുഖ്യമന്ത്രി എന്ത് ന്യായീകരണമാണ് ഇക്കാര്യത്തില്‍ പറയാന്‍ പോകുന്നത് എന്നാണ് ഇനി എല്ലാവരും ഉറ്റുനോക്കുന്നതെന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍ പറഞ്ഞു. കേന്ദ്രത്തിലെ രണ്ട് ഏജന്‍സികള്‍ക്കും ജലീല്‍ നടത്തിയ കുറ്റകൃത്യങ്ങള്‍ ബോധ്യമായിട്ടുണ്ട്. ജലീല്‍ സ്വര്‍ണം കടത്തിയെന്ന ബിജെപിയുടെ ആരോപണം സ്ഥിരീകരിച്ചിരിക്കുന്നു എന്നതാണ് വസ്തുത. അടിയന്തരമായി മുഖ്യമന്ത്രി ജലീലിനെ രാജിവെപ്പിക്കണം. ഇല്ലെങ്കില്‍ സംസ്ഥാനത്ത് കൂടുതല്‍ ആളുകള്‍ പ്രക്ഷോഭത്തിനിരങ്ങും. കള്ളംപറഞ്ഞാലും സത്യപറഞ്ഞാലും തിരിച്ചറിയാനുള്ള ശാസ്ത്രീയ സംവിധാനങ്ങള്‍ എന്‍ഐഎയുടെ പക്കലുണ്ട്. അതുകൊണ്ട് തന്നെ ജലീലിന് ഇനിയും പിടിച്ച് നില്‍ക്കാനാവില്ല. മറ്റു മന്ത്രിമാരിലേക്കും ഒടുവില്‍ തന്നിലേക്കും അന്വേഷണം എത്തുമെന്നുള്ളത് കൊണ്ടാണ് മുഖ്യമന്ത്രി ന്യായീകരിച്ചുകൊണ്ടിരിക്കുന്നത്. നിയമവാഴ്ചക്ക് മുമ്പില്‍ അത്തരം ന്യായീകരണങ്ങള്‍ പ്രസക്തിയുണ്ടാകില്ലെന്നും സുരേന്ദ്രന്‍ പറഞ്ഞു.
ഇന്ന് പുലര്‍ച്ചെ ആറുമണിയോടെയാണ് ചോദ്യം ചെയ്യലിനായി മന്ത്രി കെ ടി ജലീല്‍ എന്‍ഐഎ ഓഫീസില്‍ എത്തിയത്. മുന്‍ എംഎല്‍എ എ എം യൂസഫിന്റെ കാറിലാണ് മന്ത്രി എത്തിയത്. കഴിഞ്ഞ ദിവസം ലഭിച്ച നോട്ടീസിന്റെ അടിസ്ഥാനത്തിലാണ് മന്ത്രി എന്‍ഐഎ ഓഫീസില്‍ എത്തിയിരിക്കുന്നത്. സ്വര്‍ണ്ണം അല്ലെങ്കില്‍ ഏതെങ്കിലും ഹവാല ഇടപാടുകള്‍ മതഗ്രന്ഥത്തിന്റ മറവില്‍ നടന്നിട്ടുണ്ടോയെന്നതാണ് പരിശോധനാ വിഷയം. നേരത്തെ എന്‍ഫോഴ്‌മെന്റ് രണ്ട് ദിവസങ്ങളിലായി രണ്ടു ദിവസമായി മന്ത്രിയെ ചോദ്യം ചെയ്തത്. പക്ഷേ അന്ന് കെ.ടി ജസീല്‍ പറഞ്ഞത് തന്റെ സ്വത്ത് വിവരങ്ങള്‍ ചോദിച്ചറിഞ്ഞുവെന്ന ന്യായമാണ്. എന്നാല്‍ ദേശവിരുദ്ധ കേസുകള്‍ അന്വേഷിക്കുന്ന എന്‍.ഐ.എ പോലുള്ള എജന്‍സികള്‍ ചോദ്യം ചെയ്യുമ്പോള്‍ ഇത്തരം ന്യായങ്ങള്‍ വിലപോകില്ല. അതുകൊണ്ട് തന്റെ മന്ത്രിയുടെ രാജിക്കായുള്ള ആവശ്യത്തിന് സമ്മര്‍ദം വര്‍ധിക്കുമെന്ന കാര്യത്തില്‍ സംശയമില്ല.
https://www.facebook.com/Malayalivartha
