ഖദീജത്ത് ഷെഹ്ബ എന്ന 11 വയസ്സുകാരി കഴിഞ്ഞ 8 മാസങ്ങള്‍ കഴിച്ചുകൂട്ടിയത് ഉമ്മയുടെ വലുതായി വരുന്ന വയറിനുള്ളില്‍ ഒളിച്ചിരിക്കുന്ന തന്റെ കുഞ്ഞോമനയോട് കളിചിരികള്‍ പറഞ്ഞാണ്. താന്‍ ജനിച്ചതിനുശേഷം 11 വര്‍ഷം കഴിഞ്ഞ് ജനിക്കുന്ന കുഞ്ഞിനെ കാണാന്‍ കാത്തിരിക്കയായിരുന്നു അവള്‍.  ഉമ്മ സമീറയും സ്വപ്നങ്ങളേറെ കണ്ടിട്ടുണ്ടാകും. എന്നാല്‍ നിറവയറിനൊപ്പം സ്വപ്നങ്ങളും പേറി പൊന്നു പോലെ കൊണ്ടു നടന്ന പൊന്നോമനയെ കാണാനാകാതെ സമീറ ഈ ലോകത്തു നിന്നു കടന്നുപോയി. കോവിഡ് ആയിരുന്നു വില്ലന്‍.

ഒരു കിഡ്‌നി എടുത്തു മാറ്റേണ്ടി വന്നതുള്‍പ്പെടെ എല്ലാ പ്രതിസന്ധികളിലും പിടിച്ചു നിന്നിട്ടുള്ള സമീറയെ ഇത്തവണ വിധി തോല്‍പ്പിച്ചു..! പരിയാരത്തെ കണ്ണൂര്‍ ഗവ.മെഡിക്കല്‍ കോളജ് ആശുപത്രിയിലെ പീഡിയാട്രിക് വിഭാഗത്തിലെ ഐസിയുവില്‍ കഴിയുകയാണ് 8ാം മാസത്തില്‍ സിസേറിയനിലൂടെ പുറത്തെടുത്ത സമീറയുടെ 2 ദിവസം മാത്രം പ്രായമായ പെണ്‍കുഞ്ഞ്.

ഇന്നലെ നടത്തിയ കോവിഡ് പരിശോധനയില്‍ ഫലം നെഗറ്റീവ് ആണെങ്കിലും 4 ദിവസത്തിനു ശേഷം വീണ്ടും പരിശോധന നടത്തുമെന്ന് ആശുപത്രി അധികൃതര്‍ അറിയിച്ചു. ആ കുഞ്ഞ് മനസ്സിലേക്ക് എത്തുമ്പോഴാണു പ്രിയപ്പെട്ടവളുടെ വേര്‍പാടിന്റെ ദുഃഖം ആ കുടുംബം മറക്കുന്നത്. ആശുപത്രിയില്‍ വെന്റിലേറ്ററില്‍ കഴിയുന്ന കുഞ്ഞിനെ ഒരുനോക്കു കാണാന്‍ ഇതുവരെ വീട്ടുകാര്‍ക്കു കഴിഞ്ഞിട്ടില്ല. 'ആദ്യദിവസം കുഞ്ഞ് കരഞ്ഞിരുന്നില്ല. എന്നാല്‍ ഇന്നലെ കുഞ്ഞു കരഞ്ഞെന്നാണ് ആശുപത്രിയില്‍ നിന്ന് അറിയാന്‍ കഴിഞ്ഞത്', സമീറയുടെ ഭര്‍ത്താവ് ഹനീഫ പറയുന്നു.

സമീറയ്ക്കു കോവിഡ് സ്ഥിരീകരിച്ചത് പനി ഉണ്ടായതിനെ തുടര്‍ന്നു നടത്തിയ പരിശോധനയിലാണ്. പിന്നീട് വീട്ടിലെത്തിയെങ്കിലും രാത്രി ശാരീരിക അസ്വസ്ഥതകള്‍ ഉണ്ടായതിനെ തുടര്‍ന്ന് ആശുപത്രിയിലേക്കു മാറ്റി. കോവിഡ് ചികിത്സയ്ക്കായി അന്ന് ആംബുലന്‍സില്‍ കയറി പോയ സമീറയെ പിന്നീടു ബന്ധുക്കള്‍ കണ്ടിട്ടില്ല. രോഗം കൂടിയതോടെ പരിയാരം ഗവ.മെഡിക്കല്‍ കോളജിലേക്കു മാറ്റുകയായിരുന്നു.

ഹനീഫയുടെ ഫോണിലേക്കു 'തീരെ സുഖമില്ലെന്നു' പറഞ്ഞു കഴിഞ്ഞ ചൊവ്വാഴ്ച രാത്രി സമീറയുടെ ഫോണെത്തിയതിനെ തുടര്‍ന്ന്് പിറ്റേന്നു ഹനീഫ ആശുപത്രിയില്‍ എത്തിയെങ്കിലും സമീറയെ കാണാനായില്ല. സിസേറിയന്‍ ചെയ്തു കുഞ്ഞിനെ പുറത്തെടുക്കണമെന്ന് അറിഞ്ഞപ്പോഴും പ്രതീക്ഷയോടെ കാത്തിരിക്കുകയായിരുന്നു ഈ കുടുംബം. 8-ാം മാസത്തില്‍ കുഞ്ഞിനെ പുറത്തെടുത്തു, എന്നാല്‍ സമീറയ്ക്കു ജീവിതത്തിലേക്കു തിരിച്ചെത്താനായില്ല. വെന്റിലേറ്ററിലുള്ള കുഞ്ഞിനെക്കുറിച്ച് ആശുപത്രി അധികൃതര്‍ പറയുന്ന വിവരം മാത്രമേയുള്ളൂ ബന്ധുക്കള്‍ക്കും.

ഗവ.മെഡിക്കല്‍ കോളജിനു പുറത്തു സമീറയുടെ 2 ബന്ധുക്കള്‍ വാഹനത്തില്‍ കാവലിരിക്കുന്നുണ്ട്, 5-ാം നിലയില്‍ വെന്റിലേറ്ററില്‍ കഴിയുന്ന കുഞ്ഞിനായി, എന്ത് ആവശ്യമുണ്ടെങ്കിലും ഓടിയെത്തുന്നതിനായി. പ്രാര്‍ഥനയോടെ ഒരു കുടുംബം മുഴുവന്‍ കാസര്‍കോട് നായന്മാര്‍മൂലയിലെ വീട്ടിലും...!