വീണ്ടും അതു സംഭവിച്ചു; ജോണ്സണ് & ജോണ്സണ് വാക്സിന് പരീക്ഷണം നിര്ത്തി; തിരഞ്ഞെടുപ്പിന് മുമ്പ് വാക്സിന് ഇറക്കാന് ട്രംപ്; ഈ അനാവശ്യ ധൃതി പാളിച്ചക്ക് കാരണമായോ? കോവിഡ് വന്നുപോകട്ടെ എന്നു കരുതുന്നത് അപകടം; മുന്നറിയിപ്പുമായി ലോകാരോഗ്യ സംഘടന
കോവിഡിനെ പ്രതിരോധിക്കാന് വാക്സിന് എത്രയും പെട്ടന്ന് എത്തുമെന്ന പ്രതീക്ഷയിലാണ് ലോകം. അതിനിടെ അത്ര സുഖകരമല്ലാത്ത വാര്ത്തകളാണ് പുറത്ത് വരുന്നത്. വാക്സിന് പരീക്ഷണത്തില് അവസാന ഘട്ടത്തിലെത്തി നില്ക്കുന്ന ജോണ്സണ് & ജോണ്സണ് കമ്പനിയുടെ മനുഷ്യരിലുള്ള വാക്സിന് പരീക്ഷണം താല്ക്കാലികമായി നിര്ത്തിവച്ചു എന്ന വാര്ത്തകളാണ് പുറത്ത് വരുന്നത്. വാക്സിന് പരീക്ഷിച്ച ഒരാള്ക്ക് അവശത അനുഭവപ്പെട്ടതിനെത്തുടര്ന്നാണ് പരീക്ഷണം അടിയന്തരമായി നിര്ത്തിയത്. താല്ക്കാലികമായി മനുഷ്യരിലെ കോവിഡ് വാക്സിന് പരീക്ഷണം നിര്ത്തിവയ്ക്കുകയാണെന്നും മൂന്നാംഘട്ടത്തിലുള്ള പരീക്ഷണവും നിര്ത്തിവയ്ക്കുന്നു പരീക്ഷണത്തില് പങ്കെടുത്ത ഒരാള്ക്ക് അവശത കണ്ടെത്തിയതിനെത്തുടര്ന്നാണിതെന്നും കമ്പനി അറിയിച്ചു.
ഗുരുതരമായ പ്രതികൂല സംഭവങ്ങള് ഒരു ക്ലിനിക്കല് പഠനത്തിന്റെ, പ്രത്യേകിച്ച് ഒരു വലിയ പഠനത്തിന്റെ പ്രതീക്ഷിത ഭാഗമാണെന്ന് ജെആന്ഡ്ജെ പറഞ്ഞു. സെപ്റ്റംബര് അവസാനത്തോടെയാണ് കോവിഡ് 19 വാക്സിന് മൂന്നാംഘട്ട ട്രയലില് പങ്കെടുക്കുന്നതിനായി ജോണ്സണ് ആന്ഡ് ജോണ്സണ് അംഗങ്ങളെ ചേര്ത്തുതുടങ്ങിയത്. യു.എസിലെ 200 നിര്ദിഷ്ടസ്ഥലങ്ങളില് നിന്നുള്പ്പടെ ലോകത്തിന്റെ വിവിധ ഭാഗങ്ങളിലായി 60,000 വൊളണ്ടിയര്മാരെ അംഗങ്ങളാക്കാനായിരുന്നു ലക്ഷ്യമിട്ടിരുന്നത്. പരീക്ഷണം താല്ക്കാലികമായി നിര്ത്തിയതോടെ ഓണ്ലൈന് എന്റോള്മെന്റ് സിസ്റ്റം അടച്ചു.
നവംബര് 3ന് നടക്കുന്ന അമേരിക്കന് പ്രസിഡന്റ് തിരഞ്ഞെടുപ്പിന് മുന്നേ വാക്സിന് പുറത്തിറക്കാനാണ് പ്രസിഡന്റ് ഡൊണാള്ഡ് ട്രംപ് ലക്ഷ്യമിട്ടിയരുന്നു. അമേരിക്കയില് വാക്സിന് പരീക്ഷണത്തില് അവസാന ഘട്ടത്തിലെത്തിയ ജോണ്സണ് ആന്റ് ജോണ്സണ് കമ്പനിയുടെ വാക്സിനിനായിരുന്നു ട്രംപിന്റെ പ്രതീക്ഷ. പ്രസിഡന്റ് പ്രതീക്ഷകള് കാത്തു സൂക്ഷിക്കാന് ജോണ്സണ് ആന്റ് ജോണ്സണ് കമ്പനി അനാവശ്യ ധൃതി കാണിച്ചോയെന്നു വ്യക്തമല്ല. ഇതിന്റെ ഫലമാണോ ഇപ്പോളുണ്ടായ തിരിച്ചടിയെന്നും ആരോപണം ഉയരുന്നുണ്ട്. അടുത്ത വര്ഷം പകുതിയെങ്കിലും കഴിയാതെ വ്യാപകമായ വാക്സിനേഷന് സാദ്ധ്യതയില്ലെന്ന് ലോകാരോഗ്യ സംഘടന വ്യക്തമാക്കിയിരിക്കുന്നതാണ്. മൂന്നാം ഘട്ട ട്രയല് പൂര്ത്തിയായാലും വാക്സിന്റെ സുരക്ഷ പരിശോധിച്ച് ഉറപ്പുവരുത്തിയ ശേഷം മാത്രമേ എല്ലാവര്ക്കും നല്കാന് സാധിക്കൂ എന്നും ലോകാരോഗ്യ സംഘടന വ്യക്തമാക്കുന്നു.
അതേസമയം, കോവിഡ് വന്നുപോകട്ടെയെന്ന തരത്തിലുള്ള മനോഭാവം അപകടകരമാണെന്നും, മുന്കരുതല് വേണമെന്നും ശക്തമായ മുന്നറിയിപ്പുമായി ലോകാരോഗ്യസംഘടന രംഗത്തെത്തി. കോവിഡ് വന്നുപോകട്ടെയെന്നും, അങ്ങനെ കൂട്ടത്തോടെ കൊവിഡ് വരുമ്പോള് ഒരു ജനസമൂഹം കൊവിഡ് പ്രതിരോധം താനെ കണ്ടെത്തുമെന്നുമുള്ള ധാരണ തെറ്റെന്ന് ലോകാരോഗ്യസംഘടന മുന്നറിയിപ്പ് നല്കുന്നു. രോഗം വന്നതിലൂടെ ഉണ്ടാകുന്ന ഹെര്ഡ് ഇമ്മ്യൂണിറ്റിയെന്ന സങ്കല്പ്പം തന്നെ അപകടകരവും അധാര്മികവുമാണ്. ''വാക്സിനേഷന് വേണ്ടി ഉപയോഗിക്കുന്ന ഒരു സങ്കല്പ്പമാണ് ഹെര്ഡ് ഇമ്മ്യൂണിറ്റി. വാക്സിനേഷന് ഭൂരിപക്ഷം പേരിലും എത്തിയാല്, ബാക്കി ആളുകളില് സ്വാഭാവികപ്രതിരോധം രൂപപ്പെടുമെന്നത് തെളിയിക്കാന് ഉപയോഗിക്കുന്ന ഒരു ആശയം മാത്രമാണ് ഇത്. കൊവിഡിനെ ഫലപ്രദമായി പ്രതിരോധിക്കാന് ഹെര്ഡ് ഇമ്മ്യൂണിറ്റി മതിയെന്ന സങ്കല്പ്പം തന്നെ തെറ്റാണ്'', ഡബ്ല്യുഎച്ച്ഒ തലവന് ടെഡ്രോസ് അദനോം ഗെബ്രയേസസ് പറയുന്നു.
ഉദാഹരണമായി അദ്ദേഹം ചൂണ്ടിക്കാട്ടുന്നത് മീസില്സ് റുബല്ല വാക്സിനാണ്. റുബല്ല വാക്സിന് 95 ശതമാനം പേരിലും എത്തിയാല് ബാക്കി അഞ്ച് ശതമാനം പേരിലേക്ക് രോഗമെത്താനുള്ള സാധ്യത പൂര്ണമായും അടയുമെന്ന സങ്കല്പ്പമാണ് ഹെര്ഡ് ഇമ്മ്യൂണിറ്റി. അതല്ലാതെ രോഗം വന്നുപോയാല് സ്വാഭാവികപ്രതിരോധം വരുമെന്ന വാദമല്ല അദ്ദേഹം ചൂണ്ടിക്കാട്ടുന്നു.
https://www.facebook.com/Malayalivartha