പി.സി ജോര്ജിനെ ആക്രമിച്ചതിന് കോണ്ഗ്രസ് വലിയ വില നല്കേണ്ടി വരും
യൂത്ത് കോണ്ഗ്രസ് പ്രവര്ത്തകര് സര്ക്കാര് ചീഫ് വിപ്പ് പി.സി ജോര്ജിനെ ആക്രമിച്ചതിന് വലിയ വില നല്കേണ്ടി വരുമെന്ന് രാഷ്ട്രീയ നിരീക്ഷകര് വിലയിരുത്തുന്നു. സംഭവം അറിഞ്ഞ് എ ഗ്രൂപ്പിലെ പലരും ആശങ്കയിലാണ്. അതേസമയം ഐ ഗ്രൂപ്പില് ആഹ്ളാദവും. തനിക്കെതിരെയുള്ള പ്രക്ഷോഭത്തിന് യൂത്ത് കോണ്ഗ്രസുകരെ അഴിച്ചുവിട്ടത് മുഖ്യമന്ത്രി ഉമ്മന്ചാണ്ടിയും ആന്റോ ആന്റണി എം.പിയും ആണെന്ന് പി.സി ജോര്ജ് വ്യക്തമാക്കിയിട്ടുണ്ട്.
സോളാര് വിഷയത്തില് മുഖ്യമന്ത്രിക്കും മന്ത്രിമാര്ക്കും എതിരെ പരസ്യമായി ആരോപണങ്ങളും രഹസ്യമായി വാര്ത്തകളും തെളിവുകളും പുറത്തുവിട്ടതിനാണ് ജോര്ജിനെ ആക്രമിക്കാന് തീരുമാനിച്ചത്. പാമോലിന് കേസില് കോടതി മുഖ്യമന്ത്രിക്കെതിരെ പരാമര്ശം ഉണ്ടായപ്പോള് പി.സി ജോര്ജ് തന്റെ ലൈറ്റര് പാഡില്, ജഡ്ജിക്കെതിരെ രാഷ്ട്രപതിക്ക് പാരാതി അയച്ചത് വിവാദമായിരുന്നു. ഉമ്മന്ചാണ്ടിയുടെ നിര്ദ്ദേശ പ്രകാരമാണ് ജോര്ജ് അത് ചെയ്തത്.
മുന് മന്ത്രി ടി.എം ജേക്കബ് അന്തരിച്ചപ്പോള് മന്ത്രിസഭ നിലനിര്ത്താന് സി.പി.എം എം.എല്.എ ആര്. ശെല്വരാജിനെ രാജിവപ്പിച്ചത് പി.സി ജോര്ജായിരുന്നു എന്നത് പരസ്യമായ രഹസ്യമാണ്. അതും ഉമ്മന്ചാണ്ടിയുടെ നിര്ദ്ദേശ പ്രകാരമായിരുന്നെന്ന് ആക്ഷേപമുണ്ട്. അങ്ങനെ പല കാര്യങ്ങളും ജോര്ജിനെ ഉപയോഗിച്ച് മുഖ്യമന്ത്രിയും എ ഗ്രൂപ്പും നടത്തിയിട്ടുണ്ട്. ഇക്കാര്യങ്ങളുടെയെല്ലാം തെളിവുകളും ജോര്ജിന്റെ കയ്യിലുണ്ടെന്ന് എല്ലാ നേതാക്കള്ക്കും അറിയാം. വരും ദിവസങ്ങളില് ചീഫ് വിപ്പ് അതൊക്കെ പുറത്തുവിടുമെന്നറിയുന്നു.
https://www.facebook.com/Malayalivartha