വിക്കറ്റ് കീപ്പിങ് ഗ്ലൗവിലുള്ള സൈനിക ചിഹ്നം നീക്കാന് ധോണിയ്ക്ക് ഐസിസി നിര്ദ്ദേശം
വിക്കറ്റ് കീപ്പിങ് ഗ്ലൗവിലെ സൈനിക ചിഹ്നം നീക്കാന് ഇന്ത്യന് താരം മഹേന്ദ്രസിങ് ധോണിക്ക് ഐസിസി നിര്ദ്ദേശം. ഇത്തരമൊരു ചിഹ്നം ധരിക്കുന്നതിന് മുന്കൂര് അനുമതി വാങ്ങാത്ത സാഹചര്യത്തിലാണിത്. രാജ്യാന്തര ക്രിക്കറ്റ് കൗണ്സിലിന്റെ ആവശ്യപ്രകാരം ബിസിസിഐ-യാണ് ധോണിയോട് ഇക്കാര്യം ആവശ്യപ്പെട്ടത്. സൈനികരോടുള്ള ആദരസൂചകമായി വിക്കറ്റ് കീപ്പിങ് ഗ്ലൗവില് സൈനിക ചിഹ്നം ആലേഖനം ചെയ്ത ധോണിയുടെ നടപടിയെ പ്രകീര്ത്തിച്ച് നിരവധി ആരാധകര് രംഗത്തെത്തിയിരുന്നു. ഇതിനു പിന്നാലെയാണ് ഐസിസിയുടെ ഇടപെടല്.
ധോണിയുടെ ഗ്ലൗവിലെ സൈനിക ചിഹ്നം വൈറലായത് ദക്ഷിണാഫ്രിക്കയ്ക്കെതിരായ ലോകകപ്പ് മല്സരത്തിനിടെയാണ്. ദക്ഷിണാഫ്രിക്കയുടെ ആന്ഡിലെ പെഹ്ലുക്വായോയെ സ്റ്റംപ് ചെയ്യുന്നതിനിടെ ധോണിയുടെ ഗ്ലൗസിലെ 'ബലിദാന് ബാഡ്ജ്' ടിവി ക്യാമറകള് ഒപ്പിയെടുക്കുകയായിരുന്നു. മല്സരത്തിനു തൊട്ടുപിന്നാലെ ഇതിന്റെ ദൃശ്യങ്ങള് സമൂഹമാധ്യമങ്ങളില് വൈറലായി. ധോണിയുടെ രാജ്യസ്നേഹത്തെയും സൈനികരോടുള്ള ബഹുമാനത്തെയും പ്രകീര്ത്തിച്ച് ഒട്ടേറെപ്പേര് രംഗത്തെത്തി.
ഇന്ത്യന് ആര്മിയുടെ പാരച്യൂട്ട് റജിമെന്റില് ഓണററി ലഫ്റ്റനന്റ് കേണല് പദവിയുള്ളയാളാണ് ധോണി. മുന്കൂട്ടി അനുമതി വാങ്ങാതെ വസ്ത്രങ്ങളിലോ ക്രിക്കറ്റ് ഉപകരണങ്ങളിലോ രാഷ്ട്രീയപരമോ മതപരമോ ആയ ചിഹ്നങ്ങള് ഉപയോഗിക്കരുതെന്നാണ് ഐസിസി ചട്ടം. ഐപിഎല്ലിനു മുന്പ് ഓസ്ട്രേലിയക്കെതിരെ കളിച്ചപ്പോള്, പുല്വാമ ആക്രമണത്തില് കൊല്ലപ്പെട്ട ജവാന്മാരോടുള്ള ആദരസൂചകമായി ഇന്ത്യന് കളിക്കാരെല്ലാം സൈനിക തൊപ്പി ധരിച്ചിരുന്നെങ്കിലും അത് മുന്കൂട്ടി അനുമതി വാങ്ങിയ ശേഷമായിരുന്നു.
https://www.facebook.com/Malayalivartha