പ്രാര്ത്ഥനയില് ഇന്ത്യ ജയിച്ചു കയറി... ലോകത്തെ മികച്ച ടീമുകളെ തോല്പ്പിച്ച് മുന്നേറി ചീളായി കണ്ട് അഫ്ഗാനെ നേരിട്ട ഇന്ത്യ ഞെട്ടിയപ്പോള്; നാനൂറിലധികം പ്രതീക്ഷിച്ച ഇന്ത്യക്കാര് 250 കടക്കാന് പ്രാര്ത്ഥിച്ചു; നടക്കാതെ വന്നപ്പോള് പിന്നെ പ്രാര്ത്ഥനയായി
ഈസിയായി കണ്ട അഫ്ഗാന് ടീം ഇന്ത്യയെ ശരിക്കും വെള്ളം കുടുപ്പിച്ചു. റെക്കോര്ഡ് റണ്ണ് പ്രതീക്ഷിച്ച ആരാധകര് അവസാനം തോല്ക്കരുതേയെന്ന പ്രാര്ത്ഥനയിലായി. ഇന്ത്യയെ അപേക്ഷിച്ച് ആദ്യ സ്പെല്ലില് ഈസിയായി ബാറ്റ് ചെയ്ത അഫ്ഗാന് ജയിക്കുമെന്ന് തോന്നിപ്പിച്ചു. എന്നാല് ഇന്ത്യയ്ക്കെതിരേ 225 റണ്സ് വിജയലക്ഷ്യം പിന്തുടര്ന്ന അഫ്ഗാന് എല്ലാ വിക്കറ്റുകളും നഷ്ടമായതോടെ വിജയം ഇന്ത്യയുടെ വശത്തായി.
അവസാന ഓവര് വരെ ആവേശം നീണ്ടുനിന്ന അഫ്ഗാനിസ്താനെതിരായ ലോകകപ്പ് മത്സരത്തില് ഇന്ത്യയ്ക്ക് 11 റണ്സ് ജയം. 225 റണ്സ് വിജയലക്ഷ്യം പിന്തുടര്ന്ന അഫ്ഗാന് അവസാന ഓവര് വരെ ഇന്ത്യയെ വിറപ്പിച്ച ശേഷമാണ് കീഴടങ്ങിയത്. 213 റണ്സിന് അഫ്ഗാന് ഓള്ഔട്ടായി. അവസാന ഓവറില് ഹാട്രിക്ക് നേടിയ മുഹമ്മദ് ഷമിയാണ് ഇന്ത്യയ്ക്ക് വിജയമൊരുക്കിയത്.
അവസാന ഓവറില് ജയിക്കാന് 16 റണ്സ് വേണ്ടപ്പോള് മുഹമ്മദ് നബി പുറത്തായത് അഫ്ഗാന് തിരിച്ചടിയായി. 55 പന്തുകളില് നിന്ന് 52 റണ്സെടുത്ത മുഹമ്മദ് നബിയാണ് ഇന്ത്യയെ വിറപ്പിച്ചത്.
225 റണ്സ് പിന്തുടര്ന്ന് ബാറ്റിങ്ങിനിറങ്ങിയ അഫ്ഗാന് ശ്രദ്ധയോടെയാണ് ബാറ്റിങ് തുടര്ന്നത്. നബിയെ കൂടാതെ റഹ്മത്ത് ഷാ (36), ക്യാപ്റ്റന് ഗുല്ബാദിന് നയ്ബ് (27) എന്നിവര് ഭേദപ്പെട്ട പ്രകടനം പുറത്തെടുത്തു.
ഹസ്രത്തുള്ള സസായ് (10), ഹഷ്മത്തുള്ള ഷാഹിദി (21), അസ്ഗര് അഫ്ഗാന് (8), നജിബുള്ള സദ്രാാന് (21), റാഷിദ് ഖാന് (14) എന്നിവരാണ് പുറത്തായ മറ്റ് അഫ്ഗാന് താരങ്ങള്.
അവസാന ഓവറില് ഏറെ ടെന്ഷന് നിലനിര്ത്തിയ ശേഷം തുടര്ച്ചയായി 3 വിക്കറ്റുകള് വീണതോടെ ഇന്ത്യയുടെ വിജയം ഉറപ്പിച്ചു.
16 റണ്ണായിരുന്നു അവസാന ഓവറില് വേണ്ടിയിരുന്നത്. മുഹമ്മദ് ഷമി ഹാര്ട്ടിക്കിനും ഉടമയായി. ഈ ലോക കപ്പിലെ ആദ്യ ഹാര്ട്ടിക് കൂടിയായിരുന്നു.
നേരത്തെ ബാറ്റിങ് ദുഷ്കരമായ പിച്ചില് നിശ്ചിത 50 ഓവറില് എട്ടു വിക്കറ്റ് നഷ്ടത്തില് 224 റണ്സെടുക്കാനേ ഇന്ത്യയ്ക്ക് സാധിച്ചുള്ളൂ.
അര്ധ സെഞ്ചുറി നേടിയ ക്യാപ്റ്റന് വിരാട് കോലിയും കേദാര് ജാദവും മാത്രമാണ് അഫ്ഗാന് സ്പിന്നര്മാര്ക്കു മുന്നില് പിടിച്ചുനിന്നത്. 63 പന്തില് അഞ്ചു ബൗണ്ടറി സഹിതം 67 റണ്സെടുത്ത കോലിയെ മുഹമ്മദ് നബി പുറത്താക്കുകയായിരുന്നു. 68 പന്തുകള് നേരിട്ട ജാദവ് 52 റണ്സെടുത്ത് പുറത്തായി.
ഇന്ത്യയുടെ അഞ്ചു വിക്കറ്റുകള് സ്പിന്നര്മാരാണ് നേടിയത്. എം.എസ് ധോനി (23), രോഹിത് ശര്മ (1), ലോകേഷ് രാഹുല് (30), വിജയ് ശങ്കര് (29), ഹാര്ദിക് പാണ്ഡ്യ (7), മുഹമ്മദ് ഷമി (1) എന്നിവരാണ് പുറത്തായ മറ്റു താരങ്ങള്.
അഫ്ഗാനായി മുഹമ്മദ് നബി, ഗുല്ബാദിന് നയ്ബ് എന്നിവര് രണ്ടും മുജീബുര് റഹ്മാന്, റഹ്മത്ത് ഷാ, റാഷിദ് ഖാന്, അഫ്താബ് അലം എന്നിവര് ഓരോ വിക്കറ്റും വീഴ്ത്തി.
നേരത്തെ, ടോസ് നേടിയ ഇന്ത്യന് ക്യാപ്റ്റന് വിരാട് കോലി ബാറ്റിങ് തിരഞ്ഞെടുക്കുകയായിരുന്നു.
https://www.facebook.com/Malayalivartha