മറക്കാന്‍ ശ്രമിച്ചിട്ടും മറക്കാനാകാത്ത മുറിവായി ഇപ്പോഴും ലോകകപ്പിലെ തോല്‍വി ഇന്ത്യന്‍ ആരാധകരുടെ മനസ്സില്‍ കിടക്കുകയാണ്. അതിന് കാരണം കളിയില്‍ അപംയറിനുണ്ടായ പിഴവാണെന്നാണ് ആരാധകര്‍ വാദിക്കുന്നത്. ലോകകപ്പ് ക്രിക്കറ്റില്‍ ഇന്ത്യ സെമി കാണാതെ പുറത്തായെങ്കിലും ന്യൂസീലന്‍ഡിനെതിരായ പോരാട്ടത്തില്‍ അപംയറിനു പറ്റിയൊരു പിഴവ് ആരാധകര്‍ക്കു എത്ര ശ്രമിച്ചിട്ടും മറക്കാനാകുന്നില്ല. ടീം ഇന്ത്യയ്ക്കും താരങ്ങള്‍ക്കും വേണ്ടി സമൂഹമാധ്യമങ്ങളില്‍ 'പൊരിഞ്ഞ പോരാട്ട'ത്തിലാണ് ആരാധകര്‍ ഇപ്പോഴും. കിവീസിനെതിരായ മല്‍സരത്തില്‍ ഇന്ത്യയുടെ തോല്‍വി ഉറപ്പിച്ച ധോണിയുടെ റണ്ണൗട്ടിനെച്ചൊല്ലിയാണു ആരാധകരുടെ തര്‍ക്കം. ധോണിയുടെ പന്ത് യഥാര്‍ഥത്തില്‍ നോബോളായിരുന്നുവെന്നാണ് വാദം.

ഓള്‍ഡ് ട്രാഫഡില്‍ ന്യൂസീലന്‍ഡിനെതിരെ ഇന്ത്യയ്ക്ക് ജയിക്കാന്‍ 10 പന്തില്‍ 25 റണ്‍സ് വേണമെന്ന അവസ്ഥയിലായിരുന്നു ധോണിയുടെ റണ്ണൗട്ട്. ലോക്കി ഫെര്‍ഗൂസന്‍ ബോള്‍ ചെയ്ത 49ാം ഓവറിലാണ്സംഭവം. പന്ത് ഉയര്‍ത്തിയടിച്ച ധോണി രണ്ട് റണ്‍സ് ഓടിയെടുക്കാന്‍ ശ്രമിച്ചതാണു വിനയായത്. മാര്‍ട്ടിന്‍ ഗപ്ടിലിന്റെ നേരിട്ടുള്ള ഏറ് കൃത്യമായി വിക്കറ്റില്‍കൊണ്ടു. ഇതോടെ ധോണി പുറത്ത്. എന്നാല്‍ അംപയറിങ്ങിലെ പിഴവു കാരണമാണ് ധോണി പുറത്തായതെന്നാണ് ആരാധകര്‍ വാദിക്കുന്നത്. ധോണി പുറത്താകുന്ന വിഡിയോയും ചിത്രങ്ങളുമെല്ലാം തെളിവായി അവര്‍ നിരത്തുന്നു. ധോണി പുറത്താകുന്നതിനു തൊട്ടുമുന്‍പുള്ള പന്ത് (48.2) എറിഞ്ഞപ്പോള്‍ ആറ് കിവീസ് ഫീല്‍ഡര്‍മാര്‍ പുറത്തുണ്ടായിരുന്നുവെന്നാണ് ആക്ഷേപം. അവസാന 10 ഓവറില്‍ സര്‍ക്കിളിനു പുറത്ത് അഞ്ച് ഫീല്‍ഡര്‍മാര്‍ മാത്രമാണ് അനുവദനീയം. അധികമായി നിര്‍ത്തിയാല്‍ നോബോള്‍ വിളിക്കാം. അടുത്ത പന്തില്‍ ഫ്രീഹിറ്റും കിട്ടും. ഇതോടെ ധോണി പുറത്താകാതിരിക്കാന്‍ സാധ്യതയുണ്ടായിരുന്നുവെന്നാണ് ആരാധകര്‍ ചൂണ്ടിക്കാട്ടുന്നത്. എന്നാല്‍, എപ്പോള്‍ മുതലാണ് സര്‍ക്കിളിനു പുറത്ത് ആറു ഫീല്‍ഡര്‍മാര്‍ വന്നതെന്നു വ്യക്തമല്ല. ന്യൂസീലന്‍ഡ് കളി ജയിക്കാന്‍ ക്രിക്കറ്റിന്റെ മാന്യത കളഞ്ഞുകുളിച്ചെന്നും കുറ്റപ്പെടുത്തലുകളേറെ.

സെമിയില്‍ ധോണിയെ നേരത്തേ ഇറക്കാതിരുന്നതിനെതിരെ സച്ചിന്‍ തെന്‍ഡുല്‍ക്കറുള്‍പ്പെടെയുള്ള മുന്‍ താരങ്ങള്‍ പലരും രംഗത്തെത്തിയിരുന്നു. ഇന്ത്യയുടെ മൂന്ന് മുന്‍നിര ബാറ്റ്സ്മാന്‍മാര്‍ പുറത്തായിട്ടും അനുഭവ സമ്പത്തുള്ള ധോണിയെ ഇറക്കാതിരുന്നതു തന്ത്രത്തിലെ പിഴവായാണു മുന്‍ താരങ്ങള്‍ കണക്കാക്കുന്നത്. സാവധാനം ധോണി സ്‌കോര്‍ ഉയര്‍ത്തിയിരുന്നെങ്കില്‍ ഫലം തന്നെ മാറുമായിരുന്നെന്നാണ് ഇവരുടെ വാദം. സൗരവ് ഗാംഗുലി, വി.വി.എസ്. ലക്ഷ്മണ്‍ തുടങ്ങിയവരും ഇതേ അഭിപ്രായവുമായി രംഗത്തെത്തി.

ലോകകപ്പില്‍നിന്നു പുറത്തായെന്നു കരുതി ടീം ഇന്ത്യയ്ക്കു വിശ്രമമില്ല. ഒന്നരയാഴ്ചത്തെ വിശ്രമം. ഓഗസ്റ്റ് 3ന് വെസ്റ്റിന്‍ഡീസ് പര്യടനം തുടങ്ങും. വിരാട് കോലിയുടെയും സംഘത്തിന്റെയും മുന്നിലുള്ള ഏറ്റവും പ്രധാന ലക്ഷ്യം അടുത്ത വര്‍ഷം ഒക്ടോബറില്‍ ഓസ്ട്രേലിയയില്‍ നടക്കുന്ന ട്വന്റി20 ലോകകപ്പാണ്. ഒരുക്കങ്ങള്‍ക്ക് ഇനി 15 മാസം മാത്രമേ ബാക്കിയുള്ളൂ. ഓഗസ്റ്റ് 3ന് ഇന്ത്യയുടെ വെസ്റ്റിന്‍ഡീസ് പര്യടനം തുടങ്ങും. 3 വീതം ട്വന്റി20യും ഏകദിനവും. 2 ട്വന്റി20 മത്സരങ്ങള്‍ യുഎസിലാണ്. അതിനുശേഷം ലോക ടെസ്റ്റ് സീരിസിന്റെ ഭാഗമായി 2 മത്സരങ്ങളടങ്ങുന്ന ടെസ്റ്റ് പരമ്പര. സെപ്റ്റംബര്‍ 15 മുതല്‍ ദക്ഷിണാഫ്രിക്കന്‍ ടീമിന്റെ ഇന്ത്യന്‍ പര്യടനം. 3 വീതം ട്വന്റി20യും ടെസ്റ്റും. ബംഗ്ലദേശ്, സിംബാബ്വെ, ഓസ്ട്രേലിയ, ന്യൂസീലന്‍ഡ്, വെസ്റ്റിന്‍ഡീസ് ടീമുകളും ഈ വര്‍ഷം ഒടുവിലായും അടുത്ത വര്‍ഷം തുടക്കത്തിലും ഇന്ത്യയില്‍ പര്യടനം നടത്തും.

ട്വന്റി20 ലോകകപ്പ് ഒരുക്കത്തിന്റെ ഭാഗമായി അടുത്ത 14 മാസത്തിനുള്ളില്‍ 20 രാജ്യാന്തര ട്വന്റി20 പരമ്പരകളില്‍ ഇന്ത്യ കളിക്കും. വിന്‍ഡീസുമായി ഇന്ത്യയിലും അവിടെയുമായി 6 ട്വന്റി20. ദക്ഷിണാഫ്രിക്ക, ബംഗ്ലദേശ്, സിംബാബ്വെ ടീമുകളുമായി ഇന്ത്യയില്‍ 3 വീതം ട്വന്റി20. ഓസീസുമായി നാട്ടില്‍ രണ്ടെണ്ണം. കിവീസുമായി അവരുടെ നാട്ടില്‍ 3 ട്വന്റി20.2020 ഒക്ടോബറിലാണു ട്വന്റി20 ലോകകപ്പ്. ഇന്ത്യയുടെ ആദ്യ മത്സരം 24നു ദക്ഷിണാഫ്രിക്കയ്ക്കെതിരെ. ഓസ്ട്രേലിയ, പാക്കിസ്ഥാന്‍, ഇംഗ്ലണ്ട്, ദക്ഷിണാഫ്രിക്ക, ന്യൂസീലന്‍ഡ്, വെസ്റ്റിന്‍ഡീസ്, അഫ്ഗാനിസ്ഥാന്‍, ശ്രീലങ്ക, ബംഗ്ലദേശ് ടീമുകള്‍ക്കു പുറമേ പുറമേ യോഗ്യതാ മത്സരം കടന്നെത്തുന്ന 6 ടീമുകളും ലോകകപ്പ് കളിക്കും. ആകെ 16 ടീമുകള്‍.