ആരോഗ്യ സംവിധാനത്തില് വീഴ്ചയുണ്ടായാല് കര്ശന നടപടിയുണ്ടെകുമെന്ന് മുഖ്യമന്ത്രി
പൊതുജനാരോഗ്യ സംവിധാനത്തില് വീഴ്ച വരുത്തുന്നവര്ക്കെതിരെ കര്ശന നടപടിയുണ്ടെകുമെന്ന് മുഖ്യമന്ത്രി പിണറായി വിജയന്. പൊതുജനാരോഗ്യ സംവിധാനത്തില് ജനങ്ങള്ക്കാണ് മുന്ഗണന. അതില് യാതൊരു വിട്ടു വീഴ്ചയും ആരും പ്രതീക്ഷിക്കേണ്ടതില്ല. വീഴ്ചകളില് കര്ശന നടപടികളുണ്ടാകും. ചില പ്രശ്നങ്ങള് ഉയന്നു വന്നത് പരിഹരിക്കാന് ഉത്തരവാദിത്വപൂണ്ണമായ നടപടികള് ഉണ്ടാകുമെന്നും മുഖ്യമന്ത്രി തിരുവനന്തപുരത്ത് പറഞ്ഞു. വണ്ടാനം മെഡിക്കല് കോളേജിലെ ശസ്ത്രക്രിയ പിഴവിനെ തുടര്ന്ന് ഉഷ ജോസഫിന്റെ വയറ്റില് 5 വര്ഷം ശസ്ത്രക്രിയ ഉപകരണം കുടുങ്ങിയ സംഭവത്തിന്റെ പശ്ചാത്തലത്തിലടക്കമാണ് മുഖ്യമന്ത്രിയുടെ പ്രതികരണം.
അതേസമയം ശസ്ത്രക്രിയ ഉപകരണം ഇന്നലെ വയറ്റില് നിന്ന് പുറത്തെടുത്ത ഉഷ ജോസഫ് ഐ സി യുവില് നിരീക്ഷണത്തില് തുടരുകയാണ്. കൊച്ചി അമൃത ആശുപത്രിയില് നടന്ന ശസ്ത്രക്രിയയിലാണ് ഉപകരണം പുറത്തെടുത്തത്. ഇന്നലെ ശസ്ത്രക്രിയക്ക് ശേഷം ഐ സി യുവില് നിരീക്ഷണത്തില് കഴിയുകയാണ് ഇവര്. ഉഷ ജോസഫിന്റെ ആരോഗ്യനില തൃപ്തികരമെന്നാണ് ആശുപത്രിയില് നിന്നുള്ള അറിയിപ്പ്. വയറ്റില് ആര്ട്ടറി ഫോര്സെപ്സ് എന്ന ശസ്ത്രക്രിയ ഉപകരണം കുടുങ്ങിയതിനെ തുടര്ന്ന് 5 വര്ഷമായി വേദന സഹിച്ച് കഴിയുകയായിരുന്നു ഇവര്. അമൃത ആശുപത്രിയിലെ ഗ്യാസ്ട്രോ സര്ജറി വിഭാഗം മേധാവി ഡോ. ഒ വി സുധീര്, യൂറോളജി വിഭാഗം മേധാവി ഡോ. കെ വി സഞ്ജീവന്, ഗൈനക്കോളജി വിഭാഗം മേധാവി ഡോ. രാധാമണി. കെ എന്നിവരുടെ നേതൃത്വത്തില് നടത്തിയ ശസ്ത്രക്രിയയിലാണ് ആര്ടരി ഫോര്സെപ്സ് പുറത്തെടുത്തത്.
ആരോഗ്യ വകുപ്പ് നിര്ദേശിച്ചത് അനുസരിച്ച് എറണാകുളം ഗവണ്മെന്റ് മെഡിക്കല് കോളേജിലെ മെഡിക്കല് സൂപ്രണ്ട് ഡോ. ഗണേഷ് മോഹന്, സര്ജറി വിഭാഗം മേധാവി ഡോ. അബ്ദുള് സിയാദ് എ. കെ എന്നിവരും ശസ്ത്രക്രിയയില് ഭാഗമായിരുന്നു. പുന്നപ്ര സ്വദേശിയാണ് ഉഷ ജോസഫ്. 2021 മെയ് 5 നാണ് ആലപ്പുഴ വണ്ടാനം മെഡിക്കല് കോളേജില് ഇവര് ശസ്ത്രക്രിയക്ക് വിധേയമായത്. ഗര്ഭ പാത്രത്തിലെ മുഴ നീക്കം ചെയ്യുന്നതിനായിരുന്നു ഇത്. എന്നാല് ശസ്ത്രക്രിയക്ക് പിന്നാലെ നിരന്തരം വയറു വേദന അനുഭവപ്പെടുകയായിരുന്നു. വര്ഷങ്ങളായി വേദനയ്ക്ക് മരുന്നു കഴിച്ചാണ് മുന്നോട്ടു പോയിരുന്നത്. മൂത്രത്തില് കല്ലെന്ന് സംശയിച്ച് ഡോക്ടര്മാര് പറഞ്ഞതനുസരിച്ചാണ് ഇക്കഴിഞ്ഞ ബുധനാഴ്ച എക്സ്റേ എടുത്തത്. അപ്പോഴാണ് ആര്ട്ടറി ഫോര്സെപ്സ് വയറില് കിടക്കുന്നത് കണ്ടെത്തിയത്.
https://www.facebook.com/Malayalivartha
