ആരാധകര്‍ ഏറെ നാള്‍ കാത്തിരുന്ന നടന്‍ വിജയ് ദേവരകൊണ്ടയും നടി രശ്മിക മന്ദാനയും വിവാഹ വാര്‍ത്ത സ്ഥിരീകരിച്ചു. ആരാധകര്‍ നല്‍കിയ 'വിരോഷ്' എന്ന പേരിന് നന്ദി പറഞ്ഞ ഇരുവരും, തങ്ങളുടെ കൂടിച്ചേരലിനെ 'വിരോഷിന്റെ വിവാഹം' എന്ന് വിളിക്കാന്‍ ആഗ്രഹിക്കുന്നുവെന്ന് കുറിച്ചു.

വിവാഹ വാര്‍ത്ത സ്ഥിരീകരിച്ച് നടി രശ്മിക മന്ദാനയും നടന്‍ വിജയ് ദേവരകൊണ്ടയും. ഇത്രയും കാലം വിവാഹ വാര്‍ത്തകളോട് മൌനം പാലിച്ച ഇരുവരും ഒടുവില്‍ അക്കാര്യം സ്ഥിരീകരിച്ചിരിക്കുകയാണ്. ആരാധകരുടെ സ്‌നേഹത്തിന് ഇരുവരും നന്ദി പറഞ്ഞു. വിരോഷ് എന്നാണ് ആരാധകര്‍ ഇരുവരെയും ചേര്‍ത്ത് വിളിച്ചിരുന്നത്. അതിനാല്‍ ഈ കൂടിച്ചേരലിനെ വിരോഷിന്റെ വിവാഹം എന്നു പേരിട്ട് വിളിക്കാന്‍ ആഗ്രഹിക്കുന്നുവെന്ന് ഇരുവരും ഇന്‍സ്റ്റഗ്രാം സ്‌റ്റോറിയില്‍ കുറിച്ചു.

'ഞങ്ങളുടെ പ്രിയപ്പെട്ടവരേ, ഞങ്ങള്‍ എന്തെങ്കിലും പ്ലാന്‍ ചെയ്യുന്നതിന് മുന്‍പേ, ഞങ്ങള്‍ എന്തെങ്കിലും തെരഞ്ഞെടുക്കുന്നതിന് മുന്‍പേ നിങ്ങള്‍ ഞങ്ങള്‍ക്ക് വേണ്ടി നിലകൊണ്ടു. ഒരുപാട് സ്‌നേഹത്തോടെ നിങ്ങള്‍ ഞങ്ങള്‍ക്ക് പേരിട്ടു. ഞങ്ങളെ വിരോഷ് എന്ന് വിളിച്ചു. ഇന്ന് നിറഞ്ഞ ഹൃദയത്തോടെ, ഞങ്ങളുടെ ഈ കൂടിച്ചേരലിനെ വിരോഷിന്റെ വിവാഹം എന്നു വിളിക്കാന്‍ ഞങ്ങള്‍ ആഗ്രഹിക്കുകയാണ്. നിങ്ങള്‍ നല്‍കിയ സ്‌നേഹത്തിനുള്ള ആദരവാണിത്. എന്നും സ്‌നേഹത്തോടെ ചേര്‍ത്തുപിടിക്കുന്നതിന് ഒരുപാട് നന്ദി. നിങ്ങള്‍ എന്നെന്നും ഞങ്ങളുടെ ഭാഗമായിരിക്കും, നിറഞ്ഞ സ്‌നേഹം' രശ്മികയും വിജയ്‌യും പങ്കുവെച്ച കുറിപ്പില്‍ പറയുന്നത്.