ലോകകപ്പിലെ അവസാന പന്തില് ഗപ്ടിലിന് പൂര്ത്തീകരിക്കാനായത് സിംഗിള് മാത്രം! ഗപ്ടിലിന് ഇടതുകാലില് 2 വിരലുകള് മാത്രമേയുള്ളൂ!
ഇക്കഴിഞ്ഞ ലോകകപ്പ് ഫൈനലില് ജേതാക്കളെ നിശ്ചയിച്ച നിയമത്തിലെ തെറ്റും ശരിയും ഇപ്പോഴും തര്ക്കവിഷയമാണ്. അന്ന് ലോകകപ്പ് സൂപ്പര് ഓവറിലെ അവസാന പന്തില് കിവീസ് വിജയത്തിനു വേണ്ടിയിരുന്ന 2 റണ്സ് എടുക്കാനായി ഓടിയത് കിവീസ് താരം മാര്ട്ടിന് ഗപ്ടില് ആയിരുന്നു. സൂപ്പര് ഓവറിലെ അവസാന പന്ത് മാത്രമാണ് ഗപ്ടില് നേരിട്ടത്. ഗപ്ടില് ആദ്യ റണ് ഓടിയെടുത്തപ്പോഴേക്കും ഡീപ് മിഡ് വിക്കറ്റില്നിന്നു വിക്കറ്റ് കീപ്പര് ജോസ് ബട്ലറുടെ കൈകളിലേക്ക് ത്രോ എത്തിയിരുന്നു. ക്രീസിലേക്കുള്ള മുഴുനീളന് ഡൈവിനും ഗപ്ടിലിനെ രക്ഷിക്കാനായില്ല. പിന്നീട് ബൗണ്ടറിക്കണക്കില് ലോകകപ്പ് നഷ്ടമായതോടെ കണ്ണീരണിഞ്ഞ ഗപ്ടിലിനെ ഇംഗ്ലണ്ട് താരങ്ങള് അടക്കമുള്ളവര് എത്തിയാണ് ആശ്വസിപ്പിച്ചത്.
കിവീസിനു ലോകകപ്പ് നേടിക്കൊടുക്കാന് കഴിഞ്ഞില്ലെങ്കിലും ഗപ്ടിലിന്റെ ഫീല്ഡിങ് മികവിന്റെ കൂടി പേരിലാകും ഈ ലോകകപ്പ് ഓര്മിക്കപ്പെടുക. ഓസീസിന് എതിരായ മത്സരത്തില് സ്റ്റീവ് സ്മിത്തിനെ പുറത്താക്കിയ ഇടംകൈ ഡൈവിങ് ക്യാച്ച്, സെമിയില് എം.എസ്. ധോണിയെ റണ്ണൗട്ടാക്കിയ ഡയറക്ട് ഹിറ്റ്; ഇവ രണ്ടും ഈ ലോകകപ്പിന്റെ ഓര്മച്ചിത്രങ്ങളാണ്!
എന്നാല് അവസാന പന്തില് രണ്ടാമത്തെ റണ്ണിന് വേണ്ടി ഓടിയ ഗപ്ടിലിനു വേഗം അല്പം കുറവായിരുന്നോ എന്നു ചോദിച്ചാല്, അതെ, വേഗം അല്പ്പം കുറവായിരുന്നു എന്നതാണ് വാസ്തവം. കാരണം ഗപ്ടിലിന്റെ ഇടതു കാലില് രണ്ടു വിരലുകളേയുള്ളു! 13-ാം വയസ്സില്, ഇടതുകാലില് ട്രക്ക് കയറിയപ്പോള് ചതഞ്ഞരഞ്ഞ 3 വിരലുകള് പിന്നീടു മുറിച്ചു നീക്കുകയായിരുന്നു.
എന്നാല് പഴയതുപോയ ഓടാനും നടക്കാനും, ഇടതു കാലില് അവശേഷിച്ച രണ്ടുവിരലുകള് മതി എന്ന ആ കൗമാരക്കാരന്റെ തിരിച്ചറിവ് മാര്ട്ടിന് ഗപ്ടില് എന്ന ഒരു പോരാളിയെ ന്യൂസീലന്ഡ് ക്രിക്കറ്റ് ടീമിന് സമ്മാനിച്ചു. ഏകദിനത്തില് ഇരട്ട സെഞ്ചുറി നേടിയ ഒരേയൊരു കിവീസ് ബാറ്റ്സ്മാനെന്ന റെക്കോര്ഡുകാരനായ ഗപ്ടിലിന് പക്ഷേ, ലോകകപ്പ് ഫൈനലിലെ സൂപ്പര് ഓവറില് കിവീസിനെ വിജയലക്ഷ്യത്തില് എത്തിക്കാനായില്ല.
ഏകദിന ക്രിക്കറ്റില്, അരങ്ങേറ്റത്തില് തന്നെ സെഞ്ചുറി നേടുന്ന ആദ്യ ന്യൂസീലന്ഡ് താരമാണ് മാര്ട്ടിന് ഗപ്ടില്. 2009 ജനുവരി 10-ന് ഓക്ലന്ഡില് വെസ്റ്റിന്ഡീസിനെതിരെ നടന്ന മല്സരത്തില് അരങ്ങേറിയ ഗപ്ടില് 122 റണ്സാണെടുത്തത്. ഓപ്പണറായെത്തിയ ഗപ്ടില് 135 പന്തില് എട്ടു ബൗണ്ടറിയും രണ്ടു സിക്സും സഹിതം 122 റണ്സുമായി പുറത്താകാതെ നിന്നു. മഴമൂലം ഈ മല്സരം പൂര്ത്തിയാക്കാനായില്ല.
ഏകദിനത്തില് ഉയര്ന്ന രണ്ടാമത്തെ വ്യക്തിഗത സ്കോര് മാര്ട്ടിന് ഗപ്ടിലിന്റെ പേരിലാണ്. ഏകദിനത്തില് ഗപ്ടിലിനേക്കാള് ഉയര്ന്ന വ്യക്തിഗത സ്കോര് ഇന്ത്യന് താരം രോഹിത് ശര്മയുടെ 264 റണ്സ് ആണ്. 2015 ലോകകപ്പ് ക്വാര്ട്ടറില് വെസ്റ്റിന്ഡീസിനെതിരെയുള്ള കിവീസിന്റെ മല്സരത്തില് ഗപ്ടില് നേടിയ 237 റണ്സ് ആണ് ഏകദിനത്തിലെ ഉയര്ന്ന രണ്ടാമത്തെ വ്യക്തിഗത സ്കോര്. 163 പന്തില് 24 ബൗണ്ടറിയും 11 സിക്സും സഹിതമാണ് ഗപ്ടില് 237 റണ്സെടുത്തത്. ഏകദിനത്തില് ന്യൂസീലന്ഡ് താരങ്ങളുടെ ഏക ഇരട്ട സെഞ്ചുറിയും, ലോകകപ്പിലെ ഉയര്ന്ന വ്യക്തിഗത സ്കോറും ഇതുതന്നെയാണ്.
ന്യൂസീലന്ഡിലെ പ്രശസ്ത ടെലിവിഷന് അവതാരകയും റേഡിയോ ജോക്കിയുമായ ലൗറ മക്ഗോള്ഡ്രിക്കാണ് ഗപ്ടിലിന്റെ ഭാര്യ. ഒരു ടെലിവിഷന് പരിപാടിക്കു വേണ്ടി 2011-ല് ലൗറ, മാര്ട്ടിന് ഗപ്ടിലിനെ അഭിമുഖം നടത്താനെത്തിയപ്പോഴാണ് ഇരുവരും ആദ്യമായി കാണുന്നത്. പിന്നീട് ഈ ബന്ധം വളര്ന്ന് പ്രണയമാകുകയായിരുന്നു. 2013-ലാണ് ഇരുവരും വിവാഹിതരായത്.
https://www.facebook.com/Malayalivartha