രോഹിത് ഇന്സ്റ്റഗ്രാമില് കോലിയോടും അനുഷ്കയോടും 'കൂട്ടുവെട്ടി'!
ഇന്ത്യന് ക്രിക്കറ്റ് ടീമില് ലോകകപ്പ് ക്രിക്കറ്റ് സെമി ഫൈനലിലെ തോല്വിക്കു പിന്നാലെ താരങ്ങള് തമ്മില് അസ്വാരസ്യങ്ങള് രൂപപ്പെട്ടതായുള്ള റിപ്പോര്ട്ടുകള് ശരിവച്ച് പുതിയ സംഭവവികാസങ്ങള്. ക്യാപ്റ്റന് വിരാട് കോലിയും വൈസ് ക്യാപ്റ്റന് രോഹിത് ശര്മയും തമ്മില് പിണക്കത്തിലാണെന്നും ഇരുവരുടെയും പേരില് ടീമില് രണ്ടു ഗ്രൂപ്പുകള് രൂപപ്പെട്ടുവെന്നുമായിരുന്നു ലോകകപ്പിനു തൊട്ടുപിന്നാലെ പുറത്തുവന്ന റിപ്പോര്ട്ട്. ഇതു ശരിവച്ച് വിരാട് കോലിക്കു പിന്നാലെ ഭാര്യയും ചലച്ചിത്ര താരവുമായ അനുഷ്ക ശര്മയേയും രോഹിത് ശര്മ ഇന്സ്റ്റഗ്രാമില് 'അണ് ഫോളോ' ചെയ്തു.
ഇതിനു തൊട്ടുപിന്നാലെ ഇന്സ്റ്റഗ്രാമില് അനുഷ്ക ശര്മ പങ്കുവച്ച ചെറിയൊരു സന്ദേശത്തോടു കൂടിയ ചിത്രം രോഹിത്തിനുള്ള മറുപടിയായിട്ടും വ്യാഖ്യാനിക്കപ്പെട്ടു. 'A wise man once said nothing. Only truth can shake hands with silence in a mess of false appearances' (ജ്ഞാനികള് അധികം സംസാരിക്കാറില്ല. തെറ്റിദ്ധാരണകള് പെരുകുമ്പോഴും നിശബ്ദത പാലിക്കാന് സത്യത്തിനു മാത്രമേ കഴിയൂ' എന്ന് സാമാന്യ പരിഭാഷ) എന്ന സന്ദേശത്തോടു കൂടിയ ചിത്രമാണ് അനുഷ്ക പങ്കുവച്ചത്. വിരാട് കോലിയെ നേരത്തേ തന്നെ രോഹിത് ഇന്സ്റ്റഗ്രാമില് 'അണ് ഫോളോ' ചെയ്തിരുന്നു.
അതേസമയം, കോലി ഇപ്പോഴും ഇന്സ്റ്റഗ്രാമില് രോഹിത്തിനെ 'ഫോളോ' ചെയ്യുന്നുണ്ട്. എന്നാല്, രോഹിത്തിന്റെ ഭാര്യ റിഥികയെ കോലി 'ഫോളോ' ചെയ്യുന്നുമില്ല. അനുഷ്ക ശര്മ, രോഹിത്റിഥിക ദമ്പതിമാരെയും റിഥിക, കോലി-അനുഷ്ക ദമ്പതിമാരെയും ഇന്സ്റ്റഗ്രാമില് ഫോളോ ചെയ്യുന്നില്ല.
അതേസമയം, ടീമില് പടലപ്പിണക്കമാണെന്ന തരത്തിലുള്ള റിപ്പോര്ട്ടുകള് ഇന്ത്യന് ബോളിങ് പരിശീലകന് ഭരത് അരുണ് കഴിഞ്ഞ ദിവസം തള്ളിക്കളഞ്ഞിരുന്നു. വിരാട് കോലി, രോഹിത് ശര്മ എന്നിവരും ഇതേക്കുറിച്ച് പരസ്യപ്രതികരണത്തിനു മുതിര്ന്നിട്ടില്ല.
ലോകകപ്പ് തോല്വിയുടെ പശ്ചാത്തലത്തില് ക്യാപ്റ്റന് സ്ഥാനം വിരാട് കോലി, രോഹിത് ശര്മ എന്നിവര്ക്കായി വീതം വയ്ക്കുമെന്ന് ഇടയ്ക്കു റിപ്പോര്ട്ടുകളുണ്ടായിരുന്നെങ്കിലും വെസ്റ്റിന്ഡീസ് പര്യടനത്തിനുള്ള ടീമിനെ പ്രഖ്യാപിച്ചപ്പോള് കോലിയെത്തന്നെ ക്യാപ്റ്റനായി നിലനിര്ത്തുകയാണ് ചെയ്തത്.
ഏകദിന, ട്വന്റി20 പരമ്പരകളില്നിന്ന് കോലിക്ക് വിശ്രമം അനുവദിച്ചേക്കുമെന്ന് റിപ്പോര്ട്ടുകളുണ്ടായിരുന്നെങ്കിലും എല്ലാ ഫോര്മാറ്റിലും കളിക്കാനുള്ള സന്നദ്ധത കോലി സിലക്ടര്മാരെ അറിയിക്കുകയായിരുന്നു. ഇതോടെ ടെസ്റ്റ്, ഏകദിന, ട്വന്റി20 ടീമുകളുടെ നായകസ്ഥാനത്ത് കോലിയെ നിലനിര്ത്തി. ഓഗസ്റ്റ് മൂന്നു മുതല് സെപ്റ്റംബര് രണ്ടു വരെയാണ് ഇന്ത്യയുടെ വിന്ഡീസ് പര്യടനം.
https://www.facebook.com/Malayalivartha