പൃഥ്വി ഷാ-യ്ക്ക് വില്ലനായത് ടെര്ബ്യൂട്ടാലിന്!
ടെസ്റ്റ് ഓപ്പണര് സ്ഥാനത്തേക്ക് ഇന്ത്യ കാത്തുവച്ചിരിക്കുന്ന താരം എന്ന് ക്രിക്കറ്റ് വിദഗ്ധര് വിലയിരുത്തിയ കൗമാര വിസ്മയം പൃഥ്വി ഷാ-യ്ക്ക് ഇന്ത്യന് ക്രിക്കറ്റ് കണ്ട്രോള് ബോര്ഡ് (ബിസിസിഐ) സസ്പെന്ഷന് ഏര്പ്പെടുത്തിയ വിവരം ചൊവ്വാഴ്ച വൈകീട്ട് പുറത്തുവന്നപ്പോള് ആരാധകര് ഞെട്ടി. ഉത്തേജക പരിശോധനയില് പരാജയപ്പെട്ടതിനെ തുടര്ന്നാണ് വിലക്ക് ഏര്പ്പെടുത്തിയത്. ഷായ്ക്കു പുറമെ ഉത്തേജക പരിശോധനയില് പരാജയപ്പെട്ട അക്ഷയ് ദല്ലാര്വര് (വിദര്ഭ), ദിവ്യ ഗജ്രാജ് (രാജസ്ഥാന്) എന്നീ താരങ്ങള്ക്കും വിലക്കുണ്ട്. ദല്ലാര്വറിന് 8 മാസവും ഗജ്രാജിന് 6 മാസവുമാണു വിലക്ക്.
ഫെബ്രുവരി 22-ന് സയ്യിദ് മുഷ്താഖ് അലി ട്രോഫിക്കിടെ പൃഥ്വി നല്കിയ മൂത്ര സാംപിളില് ടെര്ബ്യൂട്ടാലിന് എന്ന ഉല്പന്നമാണു കണ്ടെടുത്തത്. കഫ് സിറപ്പ് ഉപയോഗിച്ചിരുന്നുവെന്നും അതില് ടെര്ബ്യൂട്ടാലിന് അടങ്ങിയിട്ടുണ്ടെന്ന് അറിയില്ലായിരുന്നു എന്നുമാണ് ഷാ നല്കിയ വിശദീകരണം. സയ്യിദ് മുഷ്താഖ് അലി ട്രോഫിയില് പങ്കെടുക്കുന്നതിന് ഇന്ഡോറിലെത്തിയപ്പോള് ജലദോഷം പിടിച്ചിരുന്നു. അന്ന് കഴിച്ച മരുന്നാണ് ഷായ്ക്ക് വിനയായത്. ഷാ നല്കിയ വിശദീകരണം തൃപ്തികരമാണെന്ന് ബിസിസിഐ അറിയിച്ചു.
ഉത്തേജക പരിശോധനയില് പരാജയപ്പെട്ട് മുന് ഇന്ത്യന് താരം യൂസഫ് പഠാന് ക്രിക്കറ്റില്നിന്ന് അഞ്ചു മാസം വിലക്കു നേരിട്ടത് കഴിഞ്ഞ വര്ഷമാണ്. ടെര്ബ്യൂട്ടാലിനായിരുന്നു പഠാന്റെ കാര്യത്തിലും പ്രശ്നമുണ്ടാക്കിയത്. കഴിഞ്ഞ വര്ഷം മാര്ച്ചില് ബറോഡയും തമിഴ്നാടുമായുള്ള ആഭ്യന്തര ട്വന്റി20 മല്സരത്തിനിടെ നടത്തിയ പരിശോധനയിലാണു കണ്ടെത്തിയത്. അറിഞ്ഞു കൊണ്ടു ചെയ്തതല്ലെന്നു പഠാന്റെ വിശദീകരണം തൃപ്തികരമാണെന്ന് അന്നും ബിസിസിഐ വിലയിരുത്തി.
എന്നാല്, ഉത്തേജക വിരുദ്ധ ഏജന്സിയായ 'വാഡ'യുടെ നിരോധിത പട്ടികയില്പ്പെട്ട ഉല്പന്നമാണ് ടെര്ബ്യൂട്ടാലിന് എന്നതിനാല് രണ്ടു സംഭവങ്ങളിലും വിലക്ക് എന്നത് അനിവാര്യതയായി. നിയമമനുസരിച്ച് പരിശോധനയ്ക്കായി മൂത്ര സാംപിള് നല്കിയ അന്നു മുതലാണ് വിലക്ക് നിലവില് വരുക. ഷായുടെ കാര്യത്തില് ഇത് ഈ വര്ഷം ഫെബ്രുവരി 22-നാണ്. ഫലത്തില്, അന്നു മുതലാണ് പൃഥ്വി ഷായുടെ വിലക്ക് പ്രാബല്യത്തിലായത്. എങ്കിലും വിലക്കിന്റെ പകുതി കാലയളവെങ്കിലും കളത്തിനു പുറത്തു നില്ക്കണമെന്ന് നിര്ബന്ധമാണ്. ഈ സാഹചര്യത്തില് ജൂലൈ 16 മുതല് നവംബര് 15 വരെയുള്ള നാലു മാസം ഷായ്ക്ക് കളത്തിലിറങ്ങാനാകില്ല. അതേസമയം, സെപ്റ്റംബര് 15-ന് ടീമിനൊപ്പം പരിശീലനത്തിനു ചേരാം.
എന്റെ വിധി പൂര്ണമായും ഉള്ക്കൊള്ളുന്നു. കഴിഞ്ഞ ടൂര്ണമെന്റിനിടെ പിടിപെട്ട പരുക്കില്നിന്ന് ഇതുവരെ മോചിതനായിട്ടില്ല. പൂര്വാധികം ശക്തിയോടെ ഞാന് തിരിച്ചുവരും. ക്രിക്കറ്റാണ് എന്റെ ജീവിതം പൃഥ്വി ഷാ കുറിച്ചു.
https://www.facebook.com/Malayalivartha