പൃഥ്വി ഷാ സംഭവത്തെ കരുതലോടെ കൈകാര്യം ചെയ്ത് ബിസിസിഐ
ഇന്ത്യന് ക്രിക്കറ്റിന്റെ പോസ്റ്റര് ബോയ് ആയേക്കാവുന്ന താരമായി കണക്കാക്കുന്ന പൃഥ്വി ഷാ ഉത്തേജക പരിശോധനയില് പരാജയപ്പെട്ടു എന്ന വാര്ത്തയില് ആദ്യം ഞെട്ടിയത് ഇന്ത്യന് ക്രിക്കറ്റ് ബോര്ഡ് (ബിസിസിഐ) തന്നെയാണ്. എന്നാല് ശോഭനമായ ഭാവിയുള്ള കൗമാരതാരത്തിന്റെ കരിയര് തന്നെ തകര്ത്തു കളയാവുന്ന സംഭവത്തെ ബിസിസിഐ കരുതലോടെയാണ് കൈകാര്യം ചെയ്തത് .
ഉത്തേജക പരിശോധനയില് പിടിക്കപ്പെട്ടാല് നല്കാവുന്നതില് ഏറ്റവും കുറഞ്ഞ ശിക്ഷയാണ് പൃഥ്വിക്കു നല്കിയത്- മാര്ച്ച് 16 മുതല് നവംബര് 15 വരെ മുന്കാല പ്രാബല്യത്തോടെ, എട്ടു മാസം. സെപ്റ്റംബര് പകുതിയോടെ വേണമെങ്കില് ടീമിനൊപ്പം പരിശീലിക്കാനുള്ള അനുവാദവും നല്കി.
എട്ടു മാസം വരെ, 8 മുതല് 16 മാസം വരെ, 16- 24 മാസം വരെ എന്നിങ്ങനെയാണ് ശിക്ഷാ കാലയളവുകള്.
എന്നാല് ഉപയോഗിച്ച കഫ് സിറപ്പില് നിന്ന് അറിയാതെയാണ് നിരോധിത മരുന്നായ ടെര്ബ്യൂട്ടാലിന് ശരീരത്തിലെത്തിയതെന്ന പൃഥ്വിയുടെ വിശദീകരണം ബോര്ഡ് മുഖവിലയ്ക്കെടുത്തു.
കഴിഞ്ഞ ഫെബ്രുവരി 22-ന് സയ്യിദ് മുഷ്താഖ് അലി ട്രോഫിക്കിടെ പൃഥ്വി നല്കിയ മൂത്രസാംപിളിലാണ് ടെര്ബ്യൂട്ടാലിന്റെ അംശം കണ്ടെത്തിയത്.
വെസ്റ്റിന്ഡീസ് പര്യടനത്തിനു മുന്നോടിയായി ഇന്ത്യന് ക്രിക്കറ്റ് ടീമിനെക്കുറിച്ചുള്ള വാര്ത്തകള് മാധ്യമങ്ങളില് നിറഞ്ഞു നില്ക്കുമ്പോഴാണ് വിലക്കിന്റെ തീരുമാനം പുറത്തു വിട്ടത് എന്നതും ശ്രദ്ധേയമായി. വിലക്കിന് അമിതമായ ശ്രദ്ധ കിട്ടുന്നതില് നിന്ന് ഇതോടെ രക്ഷപ്പെട്ടു.
പൃഥ്വി ഷായുടെ ഖേദപ്രകടനം ആത്മാര്ഥതയുള്ളതാണ്. തെറ്റുകള് ആര്ക്കും സംഭവിക്കും. പ്രത്യേകിച്ച് നിരോധിത മരുന്നുകള് പോലെ ഇത്ര സൂക്ഷ്മമായ കാര്യങ്ങളില്. പൃഥ്വി കൂടുതല് കരുത്തോടെ തിരിച്ചു വരും എന്നെനിക്കുറപ്പാണ്. ക്രിക്കറ്റ് താരം മനോജ് തിവാരി അഭിപ്രായപ്പെട്ടു.
https://www.facebook.com/Malayalivartha