'ഇന്ത്യന് ക്രിക്കറ്റിനെ ദൈവം രക്ഷിക്കട്ടെ'യെന്ന് ഗാംഗുലി, ഭിന്ന താല്പര്യ വിഷയത്തില് ദ്രാവിഡിന് ബിസിസിഐ നോട്ടിസ്
ഭിന്ന താല്പര്യ വിഷയത്തില് മുന് ഇന്ത്യന് താരവും നിലവില് ജൂനിയര് ടീമുകളുടെ പരിശീലകനുമായ രാഹുല് ദ്രാവിഡിന് ബിസിസിഐ നോട്ടിസ് അയച്ചു.
പ്രസ്തുത വിഷയത്തോട് മുന് നായകന് സൗരവ് ഗാംഗുലിയുടെ പ്രതികരണം ഇങ്ങനെയായിരുന്നു, 'ഇന്ത്യന് ക്രിക്കറ്റിനെ ദൈവം രക്ഷിക്കട്ടെ'! സമാന വിഷയത്തില് വിയോജിപ്പ് രേഖപ്പെടുത്തി മുന് ഇന്ത്യന് താരവും കമന്റേറ്ററുമായ ഹര്ഭജന് സിങ്ങും രംഗത്തെത്തിയതോടെ വിവാദം കൊഴുക്കുകയാണ്. മധ്യപ്രദേശ് ക്രിക്കറ്റ് അസോസിയേഷന് അംഗമായ സഞ്ജയ് ഗുപ്തയാണ്, ക്രിക്കറ്റ് കളത്തിലും പുറത്തും മാന്യനായി അറിയപ്പെടുന്ന രാഹുല് ദ്രാവിഡിനെതിരെ ഭിന്ന താല്പര്യവുമായി ബന്ധപ്പെട്ട് ആരോപണമുയര്ത്തിയത്. ഇതിന്റെ പശ്ചാത്തലത്തിലാണ് ബിസിസിഐ എത്തിക്സ് കമ്മിറ്റി ഓഫിസറായ ജസ്റ്റിസ് ഡി.കെ. ജയിന് ദ്രാവിഡിന് നോട്ടിസ് അയച്ചത്.
'ഇന്ത്യന് ക്രിക്കറ്റിലിതാ പുതിയൊരു ഫാഷന്.. ഭിന്ന താല്പര്യം... വാര്ത്തകളില് നിറഞ്ഞുനില്ക്കാന് മികച്ച വഴി... ഇന്ത്യന് ക്രിക്കറ്റിനെ ദൈവം രക്ഷിക്കട്ടെ... ബിസിസിഐയില്നിന്ന് ദ്രാവിഡിന് ഭിന്ന താല്പര്യ ആരോപണത്തില് നോട്ടിസ് ലഭിച്ചിരിക്കുന്നു' - ഗാംഗുലി ട്വിറ്ററില് എഴുതി. തന്റെ മുന് ക്യാപ്റ്റനെ പിന്തുണച്ച് ഹര്ഭജന് സിങ്ങും തൊട്ടുപിന്നാലെ രംഗത്തെത്തി.
'സത്യം?? എന്താണു സംഭവിക്കുന്നതെന്ന് മനസ്സിലാകുന്നില്ല. ഇന്ത്യന് ക്രിക്കറ്റിന് അദ്ദേഹത്തേക്കാള് (ദ്രാവിഡ്) മികച്ചൊരു വ്യക്തിയെ കിട്ടുമോ? ഇതുപോലുള്ള ഇതിഹാസങ്ങള്ക്ക് നോട്ടിസ് അയയ്ക്കുന്നത് അവരെ അപമാനിക്കുന്നതിനു തുല്യമാണ്. ക്രിക്കറ്റിന്റെ വളര്ച്ചയ്ക്ക് ഇവരേപ്പോലുള്ള താരങ്ങള് കൂടിയേ തീരൂ. ശരിയാണ്, ഇന്ത്യന് ക്രിക്കറ്റിനെ ദൈവം രക്ഷിക്കട്ടെ' - ഹര്ഭജന് കുറിച്ചു.
ഭിന്ന താല്പര്യ വിഷയത്തില് കഴിഞ്ഞ ദിവസമാണ് ബിസിസിഐ എത്തിക്സ് കമ്മിറ്റി രാഹുല് ദ്രാവിഡിന് നോട്ടിസ് അയ്യത്. രണ്ട് ആഴ്ചയ്ക്കുള്ളില് മറുപടി നല്കണമെന്ന നിര്ദ്ദേശത്തോടെയായിരുന്നു ഇത്.
നാഷനല് ക്രിക്കറ്റ് അക്കാദമി (എന്സിഎ) ഡയറക്ടര് പദവി വഹിക്കുന്ന ദ്രാവിഡ്, ഐപിഎല് ടീമായ ചെന്നൈ സൂപ്പര് കിങ്സിന്റെ ഉടമസ്ഥരായ ഇന്ത്യാ സിമന്റ്സ് ഗ്രൂപ്പിന്റെ വൈസ് പ്രസിഡന്റു കൂടിയാണ്. ഇത് ഭിന്ന താല്പര്യ മാനദണ്ഡത്തിന്റെ പരിധിയില് വരുന്ന വിഷയമാണെന്നാണ് ദ്രാവിഡിനെതിരെ ആരോപണമുയര്ത്തിയ മധ്യപ്രദേശില്നിന്നുള്ള സഞ്ജയ് ഗുപ്ത ചൂണ്ടിക്കാട്ടുന്നത്.
മുന് താരങ്ങളായ വി.വി.എസ്. ലക്ഷ്മണ്, സച്ചിന് തെന്ഡുല്ക്കര് എന്നിവര്ക്കെതിരെയും മുന്പ് ഭിന്ന താല്പര്യം ആരോപിച്ച് രംഗത്തെത്തിയിട്ടുള്ള വ്യക്തിയാണ് ഗുപ്ത. ബിസിസിഐ ഉപദേശക സമിതി അംഗങ്ങളായിരിക്കെ ഇരുവരും ഐപിഎല്ലില് സണ്റൈസേഴ്സ് ഹൈദരാബാദ്, മുംബൈ ഇന്ത്യന്സ് ടീമുകളുടെ മെന്റര് പദവിയും വഹിക്കുന്നുവെന്നായിരുന്നു ആരോപണം.
അന്ന് ആരോപണങ്ങളോട് രൂക്ഷമായി പ്രതികരിച്ച സച്ചിനും ലക്ഷ്മണും, ഭിന്ന താല്പര്യമില്ലെന്ന് വ്യക്തമാക്കിയിരുന്നു. മറിച്ച് തെളിയിച്ചാല് ബിസിസിഐ ഉപദേശക സമിതിയിലെ അംഗത്വം രാജിവയ്ക്കാമെന്നും ഇരുവരും ബിസിസിഐ എത്തിക്സ് കമ്മിറ്റിയെ അറിയിച്ചിരുന്നു. ഭിന്ന താല്പര്യ വിഷയത്തില് വിവാദത്തില്പ്പെട്ട വ്യക്തിയാണ് സൗരവ് ഗാംഗുലിയും. ബംഗാള് ക്രിക്കറ്റ് അസോസിയേഷന് പ്രസിഡന്റായിരിക്കെ ഐപിഎല്ലില് ഡല്ഹി ക്യാപിറ്റല്സിന്റെ മെന്റര് പദവിയും വഹിക്കുന്ന സാഹചര്യത്തിലാണിത്.
https://www.facebook.com/Malayalivartha
