ബിസിസിഐ, ട്വന്റി20 ക്രിക്കറ്റിന്റെ ഭാവിയെത്തന്നെ മാറ്റി മറിക്കാവുന്ന പരിഷ്‌കാരം ഐപിഎല്ലില്‍ കൊണ്ടുവരാനൊരുങ്ങുകയാണ്്. ഐപിഎല്ലിന്റെ അടുത്ത പതിപ്പ് മുതല്‍ 'പവര്‍ പ്ലേയര്‍' സംവിധാനം ഏര്‍പ്പെടുത്താനാണ് ആലോചന. ഒരു വിക്കറ്റ് വീഴുമ്പോഴോ, ഓവര്‍ അവസാനിക്കുമ്പോഴോ കളിക്കാരനെ മാറ്റി പരീക്ഷിക്കാനുള്ള അവസരമാണ് പവര്‍ പ്ലേയര്‍ ആശയം ഓരോ ഐപിഎല്‍ ടീമിനും നല്‍കുക. ഈ ആശയത്തിനു അംഗീകാരം ലഭിച്ചുകഴിഞ്ഞെന്നാണ് ഒടുവില്‍ ലഭിക്കുന്ന വിവരം.

'പവര്‍ പ്ലേയര്‍' എന്ന രീതിക്ക് ഇതിനകം അനുമതി ലഭിച്ചു കഴിഞ്ഞു. എന്നാല്‍ ചൊവ്വാഴ്ച മുംബൈയില്‍ ബിസിസിഐയുടെ ആസ്ഥാനത്തു നടക്കുന്ന യോഗത്തില്‍ വിഷയം ചര്‍ച്ച ചെയ്യുമെന്നും ഐപിഎല്‍ ഗവേണിങ് കൗണ്‍സിലില്‍ ഇക്കാര്യം ചര്‍ച്ച ചെയ്തശേഷം മാത്രമായിരിക്കും അന്തിമ തീരുമാനം എടുക്കുകയെന്നും ഒരു മുതിര്‍ന്ന ബിസിസിഐ ഉദ്യോഗസ്ഥന്‍ ദേശീയ മാധ്യമത്തോടു പറഞ്ഞു. പുതിയ പദ്ധതി നടപ്പായാല്‍ പ്ലേയിങ് ഇലവന്‍ എന്ന ആശയം ഇല്ലാതാകും. 15 അംഗ ടീമിനെയായിരിക്കും പ്രഖ്യാപിക്കുക. മത്സരത്തിന്റെ ഏതു നിമിഷത്തിലും ഒരു വിക്കറ്റ് വീഴുമ്പോഴോ, ഒരു ഓവര്‍ അവസാനിക്കുമ്പോഴോ, ഒരു കളിക്കാരന് 'സബ്സ്റ്റിറ്റിയൂട്ട്' ആയി എത്താം.

വരാനിരിക്കുന്ന മുഷ്താഖ് അലി ട്രോഫി ക്രിക്കറ്റില്‍ ഇതു പരീക്ഷിക്കുമെന്ന് ബിസിസിഐ ഉദ്യോഗസ്ഥന്‍ പറഞ്ഞു. മത്സരത്തിന്റെ സാഹചര്യത്തെ തന്നെ മാറ്റിമറിക്കാന്‍ പോന്നതാണു പദ്ധതിയെന്നാണു ബിസിസിഐയുടെ വിലയിരുത്തല്‍. 'നിങ്ങള്‍ തന്നെ ആലോചിക്കുക, നിങ്ങള്‍ക്ക് അവസാന ആറു പന്തില്‍ എടുക്കേണ്ടത് 20 റണ്‍സാണ്. പ്ലേയിങ് ഇലവനില്‍ ഇല്ലാത്ത ആന്ദ്രെ റസ്സല്‍ ഡഗ് ഔട്ടില്‍ ഇരിക്കുന്നുണ്ട്. എന്നാല്‍ ഇപ്പോള്‍ അയാള്‍ക്ക് വന്ന് അടിച്ചു പറത്തി കളി ജയിപ്പിക്കാം'- ബിസിസിഐ ഉദ്യോഗസ്ഥന്‍ പറഞ്ഞു.

അതുപോലെ തന്നെ അവസാന ഓവറില്‍ ആറു റണ്‍സ് വിട്ടുകൊടുക്കാതിരിക്കണം എന്നു കരുതുക. ഡഗ് ഔട്ടില്‍ ജസ്പ്രീത് ബുമ്രയെ പോലൊരാള്‍ ഉണ്ടെന്നു വിചാരിക്കുക. അപ്പോഴെന്താണു ക്യാപ്റ്റനു ചെയ്യാന്‍ സാധിക്കുക? 19-ാം ഓവറിന്റെ അവസാനം ബുമ്രയെ കളിക്കാന്‍ ഇറക്കുക. മുന്നോട്ടുപോകുക. ഈ ആശയത്തിനു കളിയെ തന്നെ മാറ്റാനുള്ള ശേഷിയുണ്ടെന്നും ബിസിസിഐ ഉദ്യോഗസ്ഥന്‍ വ്യക്തമാക്കി. 2019 ഐപിഎല്ലിന്റെ വിശകലനവും നാളെ നടക്കുന്ന ഗവേണിങ് കൗണ്‍സിലില്‍ ചര്‍ച്ചയാകും. അടുത്ത ഐപിഎല്‍ കൂടുതല്‍ ആഘോഷത്തോടെയും ആരാധകരെ ഉള്‍പ്പെടുത്തിയും നടത്താനും ആലോചനയുണ്ട്.