ഐ പി എല്ലില് ഇനി നോബോളിനും അംപയര്
ഐപിഎല് അടുത്ത സീസണ് മുതല് നോബോളുകള് പരിശോധിക്കാനായി മാത്രം ഒരു ടിവി അംപയറെ ചുമതലപ്പെടുത്താന് മുംബൈയില് ചേര്ന്ന പുതിയ ഐപിഎല് ഭരണസമിതിയുടെ പ്രഥമ യോഗം തീരുമാനിച്ചു. തേഡ് അംപയറിനും ഫോര്ത്ത് അംപയറിനും പുറമെയായിരിക്കും നോബോള് പരിശോധിക്കാനായി മാത്രം ഒരു അധിക അംപയറിനെ നിയമിക്കുക. നോബോളുകള് വിളിക്കുന്ന കാര്യത്തില് മുഖ്യ അംപയര്മാരെ സഹായിക്കുകയാകും ഈ അംപയറിന്റെ ചുമതല.
ഐപിഎല്ലില് പുതിയ സംവിധാനം നടപ്പാക്കും മുന്പ് ആഭ്യന്തര തലത്തിലെ ഏതെങ്കിലും ടൂര്ണമെന്റില് ഇതു പരീക്ഷണാടിസ്ഥാനത്തില് നടപ്പാക്കുമെന്ന് ഭരണസമിതിയിലെ ഒരംഗം വെളിപ്പെടുത്തി. സയ്യിദ് മുഷ്താഖ് അലി ട്രോഫി വെള്ളിയാഴ്ചയാണ് ആരംഭിക്കുന്നത്. അതിനു പിന്നാലെ രഞ്ജി ട്രോഫിയുമുണ്ട്. ഇതിലേതെങ്കിലും ടൂര്ണമെന്റിലാകും പുതിയ സംവിധാനം പരീക്ഷണാടിസ്ഥാനത്തില് നടപ്പാക്കുക.
കഴിഞ്ഞ ഐപിഎല് സീസണില് ഫൈനലില് ഉള്പ്പെടെ നോബോള് വിളിക്കുന്നതുമായി ബന്ധപ്പെട്ട് വലിയ വിവാദം ഉടലെടുത്തിരുന്നു. ഈ സാഹചര്യത്തിലാണ് ബ്രിജേഷ് പട്ടേലിന്റെ നേതൃത്വത്തിലുള്ള പുതിയ ഭരണസമിതി ഇതിനു മാത്രമായി ഒരു അംപയറിനെ നിയമിക്കാന് തീരുമാനിച്ചത്.
ഐപിഎല്ലിലെ അംപയറിങ് നിലവാരത്തെക്കുറിച്ച് ഓരോ സീസണ് കഴിയുന്തോറും പരാതി വര്ധിച്ചുവരുന്ന സാഹചര്യത്തിലാണ് അധിക അംപയറെ നിയമിച്ചുള്ള പുതിയ പരീക്ഷണം. അംപയറിങ് പിഴവുകള് വര്ധിച്ച സാഹചര്യത്തിലാണ് 2018 മുതല് ഡിആര്എസ് സംവിധാനം ഐപിഎല്ലില് നടപ്പാക്കിയത്.
https://www.facebook.com/Malayalivartha