ക്രിക്കറ്റ് കരിയറില് എങ്ങും എത്താനാകാതെ പോയതിന്റെ നിരാശയില് മുംബൈ ക്രിക്കറ്റ് താരം കരണ് തിവാരി ജീവനൊടുക്കി
മുംബൈ രഞ്ജി ടീമിനായി രണ്ടു വര്ഷത്തിലധികമായി നെറ്റ്സില് സ്ഥിരമായി പന്തെറിഞ്ഞുവരികയായിരുന്ന മുംബൈ ക്രിക്കറ്റ് താരം കരണ് തിവാരി ജീവനൊടുക്കി. 27 വയസ്സായിരുന്നു. മുംബൈയിലെ വസതിയില് ചൊവ്വാഴ്ച രാത്രിയാണ് സംഭവം.
ദക്ഷിണാഫ്രിക്കന് ക്രിക്കറ്റ് താരം ഡെയ്ല് സ്റ്റെയ്നിന്റേതിനു സമാനമായ ബോളിങ് ആക്ഷനിലൂടെ ശ്രദ്ധേയനായ താരം കഴിഞ്ഞ വര്ഷം വിവിധ ഐപിഎല് ടീമുകള്ക്കായും മുംബൈ വാംഖഡെ സ്റ്റേഡിയത്തില് നെറ്റ്സില് പന്തെറിഞ്ഞിരുന്നു. ക്രിക്കറ്റ് കരിയറില് എങ്ങും എത്താനാകാതെ പോയതിന്റെ നിരാശയില് താരം ദുഃഖിതനായിരുന്നുവെന്നാണ് റിപ്പോര്ട്ട്. ആത്മഹത്യാ കുറിപ്പൊന്നും ഇതുവരെ ലഭിച്ചിട്ടില്ല. മുംബൈയിലെ വീട്ടില് അമ്മയ്ക്കും സഹോദരനുമൊപ്പമാണ് കരണ് തിവാരി താമസിച്ചിരുന്നത്.
ചൊവ്വാഴ്ച രാത്രി അത്താഴത്തിനുശേഷം കിടക്കാന് പോയതാണ്. ഇതിനിടെ രാജസ്ഥാനിലുള്ള ഒരു സുഹൃത്തിനെ വിളിച്ച് ടീമിലേക്ക് തിരഞ്ഞെടുക്കപ്പെടാത്തതിന്റെ സങ്കടം പങ്കുവച്ചിരുന്നു. ടീമില് ഇടംകിട്ടാത്തതിനാല് മരിക്കാന് പോവുകയാണെന്നും പറഞ്ഞു. ഈ സുഹൃത്ത് രാജസ്ഥാനില് താമസിക്കുന്ന തിവാരിയുടെ സഹോദരി വഴി അദ്ദേഹത്തിന്റെ അമ്മയെ വിളിച്ചെങ്കിലും വൈകിപ്പോയിരുന്നു. മുറിയുടെ വാതില് തകര്ത്ത് അകത്തു കടന്നെങ്കിലും അപ്പോഴേക്കും മരിച്ചിരുന്നു.
മുംബൈയിലെ ഏതെങ്കിലും മികച്ചൊരു ക്ലബ്ബില് കരണിനെയും ഉള്പ്പെടുത്തുന്നതിന് ശ്രമങ്ങള് നടത്തിവരികയായിരുന്നുവെന്ന് മുംബൈ സീനിയര് ടീം പരിശീലകന് വിനായക് സാമന്ത് പ്രതികരിച്ചു. ക്രിക്കറ്റില് മികച്ചൊരു കരിയര് സ്വപ്നം കണ്ട കരണ് തിവാരിക്ക് ഒരിടത്തും എത്താനാകാതെ പോയതില് കടുത്ത നിരാശയുണ്ടായിരുന്നുവെന്ന് സുഹൃത്തും നടനുമായ ജിത്തു വര്മ പ്രതികരിച്ചു.
https://www.facebook.com/Malayalivartha