ആദ്യ ഏകദിനത്തില്‍ സിംബാബ്‌വെക്കെതിരെ ആതിഥേയരായ പാക്കിസ്ഥാനു 41 റണ്‍സിന്റെ ജയം. ആവേശോജ്വലമായ മത്സരത്തില്‍ ആദ്യം ബാറ്റ് ചെയ്ത പാക്കിസ്ഥാന്‍ മൂന്നു വിക്കറ്റിനു 375 റണ്‍സെടുത്തപ്പോള്‍ സിംബാബ്‌വെക്കു 334 റണ്‍സെടുക്കാനെ സാധിച്ചുള്ളു. പാക്കിസ്ഥാനായി വെടിക്കെട്ട് സെഞ്ചുറി നേടിയ ശുഹൈബ് മാലിക് (76 പന്തില്‍ 112) ആണ് കളിയിലെ കേമന്‍. സ്‌കോര്‍: പാക്കിസ്ഥാന്‍- 50 ഓവറില്‍ മൂന്നിന് 375. സിംബാബ്‌വെ- 50 ഓവറില്‍ അഞ്ചിന് 334. 

ടോസ് നേടി ബാറ്റിംഗ് തുടങ്ങിയ പാക്കിസ്ഥാനു ഓപ്പണര്‍മാരായ മുഹമ്മദ് ഹഫീസ്(86), നായകന്‍ അസര്‍ അലി(79) എന്നിവര്‍ തകര്‍പ്പന്‍ തുടക്കമാണ് നല്കിയത്. ഇരുവരും പുറത്തായതോടെ എത്തിയ ശുഹൈബ് മാലികും(76 പന്തില്‍ 112) ഹരീസ് സൊഹൈലും(66 പന്തില്‍ 89) സിംബാബ്‌വെന്‍ ബൗളറുമാരെ കടന്നാക്രമിച്ചതോടെ പാക്കിസ്ഥാന്‍ കൂറ്റന്‍ സ്‌കോറിലെത്തി. സിംബാബ്‌വെക്കായി പ്രോസ്പര്‍ ഉത്‌സേയ രണ്ടും പനയന്‍ഗര ഒരു വിക്കറ്റും വീഴ്ത്തി. 

മറുപടി ബാറ്റിംഗിനിറങ്ങിയ സിംബാബ്‌വെയ്ക്ക് ഓപ്പണര്‍മാരായ സിബാന്‍ഡ(23), സികന്ദര്‍ റാസ(36) എന്നിവര്‍ മികച്ച തുടക്കം നല്‍കി. ഇരുവരും പുറത്തായതോടെ ക്രീസില്‍ ഒത്തുചേര്‍ന്ന ഹമില്‍ട്ടണ്‍ മസകഡ്‌സയും നായകന്‍ എല്‍ട്ടണ്‍ ചിഗുംബുരയും ബാറ്റിംഗിനെ മുന്നോട്ടു നയിച്ചു. മസകഡ്‌സ(73 പന്തില്‍ 73) പുറത്തായതോടെ എത്തിയ സീന്‍ വില്യസിനൊപ്പം ചിഗുംബുര കടന്നാക്രമണം നടത്തിയെങ്കിലും പാക്കിസ്ഥാന്റെ കൂറ്റന്‍ ലക്ഷ്യത്തിനരികെ എത്താനാകാതെ ഇരുവരും പുറത്തായി. സെഞ്ചുറിയുമായി ചിഗുംബുര 95 പന്തില്‍ 112 റണ്‍സും സീന്‍ വില്യംസ് 28 പന്തില്‍ 36 റണ്‍സുമെടുത്തു. പാക്കിസ്ഥാനു വേണ്ടി വഹാബ് റിയാസ് മൂന്നു വിക്കറ്റ് വീഴ്ത്തി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha