ലോകകപ്പില്‍ അഫ്ഗാനെതിരായ മറുപടി ബാറ്റിംഗില്‍ 1000 റണ്‍സും സെഞ്ച്വറി നേട്ടത്തില്‍ സച്ചിന്റെ റെക്കോഡും രോഹിത്ത് മറികടന്നു.63 പന്തുകളിലാണ് രോഹിത്ത് തന്റെ സെഞ്ച്വറി തികച്ചത്. 12 ഫോറുകളും നാല് സിക്സറുമടക്കം 150 ലധികം സ്ട്രൈക് റേറ്റിലാണ് രോഹിത്തിന്റെ ബാറ്റിംഗ്. 273 റണ്‍സ് വിജയലക്ഷ്യം തേടിയിറങ്ങിയ ഇന്ത്യക്കായി രോഹിത്ത് തകര്‍ത്തടിക്കുകയായിരുന്നു. അരുണ്‍ ജെയ്റ്റ്‌ലി സ്റ്റേഡിയത്തിലെ നാലുപാടും രോഹിത്ത് ബൗണ്ടറികള്‍ നേടി. ലോകകപ്പില്‍ ഏറ്റവും വേഗമേറിയ ഇന്ത്യന്‍ താരത്തിന്റെ സെഞ്ച്വറിയാണ് രോഹിത്ത് നേടിയത് അതും ക്രിക്കറ്റ് ഇതിഹാസം കപില്‍ ദേവിന്റെ റെക്കോഡ് മറികടന്ന്.

17 ഓവറില്‍ 150 റണ്‍സ് കൂട്ടുകെട്ട് പൂര്‍ത്തിയാക്കിയതിന് പിന്നാലെ ഇശാന്‍ കിഷന്‍ (47) പുറത്തായി. റാഷീദ് ഖാന്റെ പന്തിലാണ് കിഷന്‍ പുറത്തായത്. നിലവില്‍ 19 ഓവറില്‍ 162 റണ്‍സ് ഇന്ത്യ നേടിയിട്ടുണ്ട്. നേരത്തെ ടോസ് നേടി ബാറ്റിംഗ് തിരഞ്ഞെടുത്ത അഫ്ഗാന്‍ നിശ്ചിത 50 ഓവറില്‍ എട്ട് വിക്കറ്റ് നഷ്ടത്തില്‍ 272 റണ്‍സ് നേടി. മദ്ധ്യനിര ബാറ്റര്‍മാരായ ഹഷ്മത്തുള്ള ഷഹീദി, അസ്മത്തുള്ള ഒമര്‍സായി എന്നിവരുടെ മികച്ച ബാറ്റിംഗാണ് തകര്‍ച്ചയില്‍ നിന്നും അഫ്ഗാന് മാന്യമായ സ്‌കോര്‍ നല്‍കിയത്.

ഷഹീദി 88 പന്തുകളില്‍ എട്ട് ഫോറും ഒരു സിക്‌സുമടക്കം 80 റണ്‍സ് നേടി. ഒമര്‍സായി 69 പന്തില്‍ നാല് സിക്‌സറും രണ്ട് ഫോറുമടക്കം 62 റണ്‍സെടുത്ത് പുറത്തായി. ഇന്ത്യയ്ക്കായി ബുംറ 10 ഓവറില്‍ 39 റണ്‍സ് മാത്രം വഴങ്ങി നാല് വിക്കറ്റുകള്‍ വീഴ്ത്തി. ഹാര്‍ദ്ദിക് പാണ്ഡ്യ രണ്ട് വിക്കറ്റുകളും നേടി.