ലോകകപ്പ് മത്സരത്തിൽ ചിരവൈരികളായ പാക്കിസ്ഥാനെതിരായ ഇന്ത്യയുടെ വിജയത്തിൽ ആഹ്‌ളാദം പ്രകടിപ്പിച്ച് പ്രധാനമന്ത്രി നരേന്ദ്ര മോദി. ഇന്ത്യയുടെ വിജയത്തിന് പിന്നാലെ പ്രധാനമന്ത്രി ട്വീറ്റിലൂടെയാണ് സന്തോഷമറിയിച്ചത്. ഇന്ത്യൻ ടീമിന്റെ "ഓൾ റൗണ്ട് മികവിനെ" അഭിനന്ദിച്ച അദ്ദേഹം, ഐസിസി ലോകകപ്പിലെ വരാനിരിക്കുന്ന മത്സരങ്ങൾക്ക് ആശംസകളും അറിയിച്ചു.

"ടീം ഇന്ത്യയ്ക്ക് എല്ലാ പിന്തുണയും, അഹമ്മദാബാദിൽ ഇന്ന് മികച്ച വിജയം നേടി, അതും ഓൾറൗണ്ട് മികവിൽ. ടീമിന് അഭിനന്ദനങ്ങൾ, വരാനിരിക്കുന്ന മത്സരങ്ങൾക്ക് ആശംസകളും നേരുന്നു" പ്രധാനമന്ത്രി മത്സര ശേഷം എക്‌സിലൂടെ പങ്കുവച്ച സന്ദേശത്തിൽ അറിയിച്ചു.

ഇന്നത്തെ വിജയത്തിന് ശേഷം, ഏകദിന ലോകകപ്പിൽ പാകിസ്ഥാനെതിരായ ടീം ഇന്ത്യയുടെ റെക്കോർഡ് എതിരില്ലാത്ത എട്ട് വിജയങ്ങളായി മാറി. നേരത്തെ 1992, 1996, 1999, 2003, 2011, 2015, 2019 വർഷങ്ങളിലാണ് ഇന്ത്യ ഏകദിന ലോകകപ്പിൽ പാകിസ്ഥാനെ പരാജയപ്പെടുത്തിയത്. അഹമ്മദാബാദിലെ നരേന്ദ്ര മോദി സ്‌റ്റേഡിയത്തിൽ വച്ചായിരുന്നു ടീം ഇന്ത്യയുടെ വിജയം.

എട്ടാം തവണയും തലയുയർത്തി; പാകിസ്ഥാനെ തകർത്ത് ഇന്ത്യ മുന്നോട്ട്
ഏകദിന ലോകകപ്പുകളിലെ മേൽക്കൈ അടിയവരയിട്ട് പാകിസ്ഥാനെതിരെ ഇന്ത്യയ്ക്ക് തകർപ്പൻ ജയം. ഏഴ് വിക്കറ്റുകൾക്കാണ് ഇന്ത്യ മത്സരം സ്വന്തമാക്കിയത്. അഹമ്മദാബാദിലെ നരേന്ദ്ര മോദി സ്‌റ്റേഡിയത്തിലെ തിങ്ങിനിറഞ്ഞ കാണികൾക്ക് നടുവിൽ പാക് നിര കളി മറന്നപ്പോൾ നീലപ്പടയ്ക്ക് കാര്യങ്ങൾ എളുപ്പമായി. ഒറ്റയാൾ പോരാട്ടങ്ങൾക്ക് അപ്പുറം ടീമിന്റെ കൂട്ടായ പ്രകടനമാണ് ഇക്കുറി ഇന്ത്യയ്ക്ക് വിജയമൊരുക്കിയത്.

തുടർച്ചയായി രണ്ടാം മത്സരത്തിലും രോഹിത് മികച്ച പ്രകടനം പുറത്തെടുത്തതോടെ പാകിസ്ഥാന് കീഴടങ്ങുകയല്ലാതെ മറ്റ് വഴികളില്ലായിരുന്നു. ഏകദിന ലോകകപ്പുകളിൽ പാക് ടീമിനെതിരെ ഇന്ത്യയുടെ എട്ടാം വിജയമാണിത്. ലോകകപ്പുകളിൽ ഒരിക്കൽ പോലും ഇന്ത്യയെ തോൽപിക്കാൻ പാകിസ്ഥാന് കഴിഞ്ഞിട്ടുമില്ല.

ഇന്ത്യയ്ക്ക് വേണ്ടി ക്യാപ്റ്റൻ രോഹിത് ശർമ്മ അർധസെഞ്ചുറി നേടി. തുടക്കം മുതൽ ആക്രമിച്ചു കളിച്ച രോഹിത് ഇന്ത്യയുടെ നയം വ്യക്തമാക്കി. മൂന്നാം ഓവറില്‍ തന്നെ ഇന്ത്യയ്ക്ക് ഗില്ലിന്റെ നഷ്‌ടമായിരുന്നു. അസുഖബാധിതനായി ആദ്യ രണ്ട് മത്സരങ്ങൾ കളിക്കാതിരുന്ന ഗില്ലിന്റെ ഏകദിന ലോകകപ്പ് അരങ്ങേറ്റമായിരുന്നു ഇത്. വൺഡൗണായി ക്രീസിലെത്തിയ കോഹ്‌ലി നീണ്ട ഇന്നിംഗ്‌സ് കളിക്കുമെന്ന് പ്രതീക്ഷ നൽകിയെങ്കിലും ജയം പെട്ടെന്നാക്കാനുള്ള ആവേശത്തിൽ പാതി വഴിയിൽ വീണു.

എന്നാൽ അപ്പോഴെല്ലാം മറുവശത്ത് രോഹിത് സ്വതസിദ്ധമായ ശൈലിയിൽ സ്ട്രോക്ക് പ്ലേയുമായി കൂസലില്ലാതെ ബാറ്റ് വീശി. പിന്നീട് ശ്രേയസ് അയ്യർ ബാറ്റിങിന് ഇറങ്ങിയതോടെ ഇന്ത്യൻ ഇന്നിംഗ്‌സ് വേഗത്തിലായി. ഒടുവിൽ 63 പന്തിൽ 86 റൺസെടുത്ത രോഹിത് പുറത്താവുമ്പോഴേക്കും ഇന്ത്യ ജയത്തോട് വളരെ അടുത്തിരുന്നു. ശ്രേയസ് അയ്യറും അർധ സെഞ്ചുറിയുമായി മികച്ച പിന്തുണ നൽകി.

ആദ്യം ബാറ്റ് ചെയ്‌ത പാകിസ്ഥാനെ 42.5 ഓവറിൽ കേവലം 191 റൺസിന് പുറത്താക്കിയാണ് ഇന്ത്യ അയൽക്കാരുടെ പോരാട്ടത്തിൽ മുൻതൂക്കം നേടിയത്. ഒരു ഘട്ടത്തിൽ രണ്ട് വിക്കറ്റുകൾക്ക് 155 റൺസ് എന്ന ശക്തമായ നിലയിലായിരുന്നു പാകിസ്ഥാൻ. എന്നാൽ ബാബർ അസം കൂടാരം കയറിയതിന് പിന്നാലെ പാകിസ്ഥാൻ മധ്യനിര ചീട്ടുകൊട്ടാരം പോലെ തകരുകയായിരുന്നു.

ഇന്ത്യയ്ക്ക് വേണ്ടി ശാർദൂൽ താക്കൂർ ഒഴികെയുള്ള മറ്റ് ബൗളർമാരെല്ലാം വിക്കറ്റ് വീഴ്ത്തി. ജസ്പ്രീത് ബുമ്ര, രവീന്ദ്ര ജഡേജ, കുൽദീപ് യാദവ്, ഹർദിക് പാണ്ഡ്യ, മുഹമ്മദ് സിറാജ് എന്നിവർ രണ്ട് വിക്കറ്റുകൾ വീതമാണ് വീഴ്‌ത്തിയത്. എഴോവറിൽ 19 റൺസ് മാത്രം വഴങ്ങി രണ്ട് വിക്കറ്റെടുത്ത ബുമ്രയാണ് കളിയിലെ താരം.