ഏകദിന ക്രിക്കറ്റ് ലോകകപ്പില്‍ ഓസ്‌ട്രേലിയ ഇന്ന് ശ്രീലങ്കയെ നേരിടും. ലഖ്നൗവില്‍ ഉച്ചയ്ക്ക് രണ്ടിനാണ് കളി തുടങ്ങുക. ഹാട്രിക് തോല്‍വി ഒഴിവാക്കാനാണ് ഇരു ടീമുകളും ഇന്നിറങ്ങുന്നത്. ലങ്കയോടും തോറ്റാല്‍ ഓസീസിന്റെ സെമി പ്രതീക്ഷകള്‍ക്ക് തിരിച്ചടിയായേക്കും.

ഏകദിന ലോകകപ്പിലെ മുന്‍ ചാമ്പ്യന്‍മാരാണ് ഓസ്‌ട്രേലിയയും ശ്രീലങ്കയും. എന്നാല്‍ ഇക്കുറി രണ്ട് മത്സരങ്ങള്‍ വീതം പൂര്‍ത്തിയായപ്പോള്‍ തുല്യദുഖിതരാണ് രണ്ടു ടീമുകളും. ഓസ്‌ട്രേലിയ ടീം ഇന്ത്യയോടും ദക്ഷിണാഫ്രിക്കയോടും തോറ്റപ്പോള്‍ പാകിസ്ഥാനോടും ദക്ഷിണാഫ്രിക്കയോടുമായിരുന്നു ലങ്കയുടെ അടിയറവുകള്‍.

അതിനാല്‍ ടൂര്‍ണമെന്റിലെ ആദ്യ പോയിന്റിനായാണ് ശ്രീലങ്കയും ഓസ്‌ട്രേലിയയും ഇന്ന് മുഖാമുഖം വരുന്നത്. റണ്ണടിക്കാത്ത ബാറ്റര്‍മാരും ലക്ഷ്യം തെറ്റുന്ന ബൗളര്‍മാരും ഫീല്‍ഡിലെ ചോരുന്ന കൈകളും ടൂര്‍ണമെന്റില്‍ ഓസീസിന് തിരിച്ചടിയാവുന്നു.


വ്യക്തിഗത സ്‌കോര്‍ 50ല്‍ എത്താനോ ടീം സ്‌കോര്‍ 200 കടക്കാനോ കഴിഞ്ഞിട്ടില്ല. നായകന്‍ പാറ്റ് കമ്മിന്‍സ് നയിക്കുന്ന ബൗളിംഗ് നിരയുടെ കാര്യവും പരിതാപകരമാണ്. അതേസമയം കളിച്ച രണ്ട് കളിയിലും തോറ്റെങ്കിലും 300 റണ്‍സിലേറെ നേടിയെന്ന ആശ്വാസമുണ്ട് ലങ്കയ്ക്ക്.