ട്വന്റി20 ലോകകപ്പിലെ അട്ടിമറിപ്പെരുമ നെതര്‍ലന്‍ഡ്‌സ് ഏകദിന ലോകകപ്പിലും ആവര്‍ത്തിച്ചു. ദക്ഷിണാഫ്രിക്കയെ ഓറഞ്ച് പട 38 റണ്‍സിനാണ്ഒതുക്കിയത്. മഴയെത്തുടര്‍ന്ന് 43 ഓവറായി ചുരുക്കിയ പോരാട്ടത്തില്‍ ടോസ് നഷ്ടപ്പെട്ട് ആദ്യം ബാറ്റ് ചെയ്ത നെതര്‍ലന്‍ഡ്‌സ് ക്യാപ്റ്റന്‍ സ്‌കോട്ട് എഡ്വേഡ്‌സിന്റെ ( 69 പന്തില്‍ 78) ഉജ്വല പ്രകടനത്തിന്റെ മികവില്‍ 8 വിക്കറ്റ് നഷ്ടത്തില്‍ 245 റണ്‍സെടുത്തു. ദക്ഷിണാഫ്രിക്കയുടെ മറുപടി 42.5 ഓവറില്‍ 207 റണ്‍സില്‍ അവസാനിച്ചു.

നെതര്‍ലന്‍ഡ്‌സിനു വേണ്ടി ലോഗന്‍ വാന്‍ ബീക് മൂന്നും പോള്‍ വാന്‍ മീകെറെന്‍, റോളോഫ് വാന്‍ഡര്‍ മെര്‍വ്, ബാസ് ഡി ലീഡ് എന്നിവര്‍ 2 വിക്കറ്റ് വീതവും നേടി.

എഡ്വേഡ്‌സാണ് പ്ലെയര്‍ ഓഫ് ദ് മാച്ച്. പോയിന്റ് പട്ടികയില്‍ 4 പോയിന്റുമായി ദക്ഷിണാഫ്രിക്ക 3ാം സ്ഥാനത്തും 2 പോയിന്റുമായി നെതര്‍ലന്‍ഡ്‌സ് 9ാം സ്ഥാനത്തുമാണ്. സ്‌കോര്‍: നെതര്‍ലന്‍ഡ്‌സ് 43 ഓവറില്‍ 8ന് 245, ദക്ഷിണാഫ്രിക്ക 42.5 ഓവറില്‍ 207 ഓള്‍ഔട്ട്. കഴിഞ്ഞ വര്‍ഷം ട്വന്റി20 ലോകകപ്പില്‍ നെതര്‍ലന്‍ഡ്‌സിനോട് പരാജയപ്പെട്ട് ദക്ഷിണാഫ്രിക്ക നോക്കൗട്ട് ഘട്ടത്തിലെത്താതെ പുറത്തായിരുന്നു.