ഏഷ്യാകപ്പ് ക്രിക്കറ്റില്‍ ഇന്ത്യയ്ക്ക് ഗംഭീരത്തുടക്കം. ഉദ്ഘാടന മല്‍സരത്തില്‍ ആതിഥേയരായ ബംഗ്ലദേശിനെ ഇന്ത്യ 45 റണ്‍സിന് തോല്‍പ്പിച്ചു. ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ ഇന്ത്യ രോഹിത് ശര്‍മയുടെ അര്‍ധസെഞ്ചുറിയുടെയും (55 പന്തില്‍ 83) ഹാര്‍ദിക് പാണ്ഡ്യ 18 പന്തില്‍ നേടിയ 31 റണ്‍സിന്റെയും മികവില്‍ 20 ഓവറില്‍ ആറു വിക്കറ്റിന് 166 റണ്‍സെടുത്തു. ബംഗ്ലദേശിന്റെ മറുപടി 20 ഓവറില്‍ ഏഴിന് 121ല്‍ അവസാനിച്ചു. ഉജ്വല അര്‍ധസെഞ്ചുറിയുമായി ഇന്ത്യന്‍ ഇന്നിങ്‌സിനെ തോളിലേറ്റിയ രോഹിത് ശര്‍മയാണ് കളിയിലെ കേമന്‍. ശനിയാഴ്ച ബന്ധവൈരികളായ പാക്കിസ്ഥാനെതിരെയാണ് ഇന്ത്യയുടെ അടുത്ത മല്‍സരം.

ഇന്ത്യ ഉയര്‍ത്തിയ 167 റണ്‍സ് വിജയലക്ഷ്യം പിന്തുടര്‍ന്ന ആതിഥേയരായ ബംഗ്ലദേശിന് നിശ്ചിത 20 ഓവറില്‍ ഏഴു വിക്കറ്റ് നഷ്ടത്തില്‍ 121 റണ്‍സ് നേടാനേ കഴിഞ്ഞുള്ളൂ. നാല് ഓവറില്‍ 23 റണ്‍സ് വഴങ്ങി മൂന്നു വിക്കറ്റ് വീഴ്ത്തിയ നെഹ്‌റയാണ് ബംഗ്ലദേശിനെ തകര്‍ത്തത്. സാബിര്‍ റഹ്മാന്‍ 32 പന്തില്‍ 44 റണ്‍സ് നേടി. മൂന്നു പന്തില്‍ ഒരു റണ്ണെടുത്ത ഓപ്പണര്‍ മുഹമ്മദ് മിഥുന്‍ (14 പന്തില്‍ 11), സൗമ്യ സര്‍ക്കാര്‍ (23 പന്തില്‍ 14), ഇംറുള്‍ കയിസ് (24 പന്തില്‍ 14), ഷാക്കിബ് അല്‍ഹസന്‍ (എട്ടു പന്തില്‍ മൂന്ന്), മഹ്മൂദുല്ല (ഏഴു പന്തില്‍ എട്ട്), മഷ്‌റഫെ മൊര്‍ത്താസ (ഒരു പന്തില്‍ പൂജ്യം) എന്നിവരാണ് പുറത്തായത്. ഇന്ത്യയ്ക്കായി നെഹ്‌റ മൂന്നും ബുംമ്ര, അശ്വിന്‍, ഹാര്‍ദിക് പാണ്ഡ്യ എന്നിവര്‍ ഓരോ വിക്കറ്റും വീഴ്ത്തി. ഷാക്കിബ് അല്‍ഹസന്‍ റണ്ണൗട്ടായി. മുഷ്ഫിഖുര്‍ റഹിം 17 പന്തില്‍ 16 റണ്‍സോടെയും തസ്‌കിന്‍ അഹമ്മദ് 15 പന്തില്‍ 15 റണ്‍സോടെയും പുറത്താകാതെ നിന്നു.

നേരത്തെ, അര്‍ധസെഞ്ചുറി നേടിയ രോഹിത് ശര്‍മയുടെയും (55 പന്തില്‍ 83) ഹാര്‍ദിക് പാണ്ഡ്യയുടെയും (18 പന്തില്‍ 31) മികവിലാണ് ബംഗ്ലദേശിനെതിരെ ഇന്ത്യ മികച്ച സ്‌കോറിലേക്കെത്തിയത്. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയെ ബംഗ്ലദേശ് ബോളര്‍മാര്‍ തുടക്കത്തില്‍ വലച്ചെങ്കിലും പതറാതെ പൊരുതിയ രോഹിതിന്റെയും അവസാന ഓവറുകളില്‍ വെടിക്കെട്ടിന് തിരികൊളുത്തിയ ഹാര്‍ദിക് പാണ്ഡ്യയുടെയും മികവില്‍ ഇന്ത്യ കുറിച്ചത് 20 ഓവറില്‍ ആറു വിക്കറ്റിന് 166 റണ്‍സ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha