വനിതാ ലോകകപ്പ് ഫൈനലില്‍ ദക്ഷിണാഫ്രിക്കയ്ക്ക് മുന്നില്‍ 299 റണ്‍സ് വിജയലക്ഷ്യം ഉയര്‍ത്തി ഇന്ത്യന്‍ വനിതകള്‍. ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യന്‍ വനിതകള്‍ നിശ്ചിത ഓവറില്‍ ഏഴു വിക്കറ്റ് നഷ്ടത്തില്‍ 298 റണ്‍സ് നേടി. 87 റണ്‍സ് നേടിയ ഷഫാലി വര്‍മ്മായണ് ഇന്ത്യന്‍ നിരയില്‍ തിളങ്ങിയത്. സ്മൃതി മന്ദാന (47), ദീപ്തി ശര്‍മ്മ ( 58) എന്നിവരുടെ ബാറ്റിംഗും ഇന്ത്യക്ക് മികച്ച സ്‌കോര്‍ നേടാന്‍ കരുത്ത് പകര്‍ന്നു. നവി മുംബയിലെ ഡിവൈ പാട്ടീല്‍ സ്‌റ്റേഡിയത്തിലാണ് ഫൈനല്‍ മത്സരം നടക്കുന്നത്. ഇന്ന് മൂന്നുമണിയോടെ തുടങ്ങേണ്ടിയിരുന്ന ഇന്ത്യ ദക്ഷിണാഫ്രിക്ക മത്സരം മഴ കാരണം രണ്ട് മണിക്കൂറോളം വൈകിയാണ് തുടങ്ങിയത്.

ടോസ് നഷ്ടപ്പെട്ട് ബാറ്റിംഗിനിറങ്ങി ഇന്ത്യക്കായി ഷഫാലി വര്‍മ്മയും സ്മൃതി മന്ദാനയും ശ്രദ്ധയോടെയാണ് തുടങ്ങിയത്. പതിയെ സ്‌കോര്‍ ഉയര്‍ത്തിയ ഇരുവരും ചേര്‍ന്ന് ആദ്യ ആറോവറില്‍ 45 റണ്‍സാണ് നേടിയത്. പിന്നീട് സ്‌കോറിംഗിന് വേഗം കൂട്ടിയ ഷഫാലി ഇന്ത്യന്‍ സ്‌കോര്‍ 17 ഓവറില്‍ 97 റണ്‍സ് എന്ന നിലയിലെത്തിച്ചു.

19ാം ഓവറില്‍ ഇന്ത്യന്‍ സ്‌കോര്‍ നൂറു കടന്നതിന് പിന്നാലെ സ്മൃതി മന്ദാന പുറത്തായി. 58 പന്തില്‍ നിന്ന് 45 റണ്‍സുമായാണ് മന്ദാന മടങ്ങിയത്. തുടര്‍ന്നിറങ്ങിയ ജമീമയുമായി ചേര്‍ന്ന് ഷഫാലി സ്‌കോര്‍ 150 കടത്തി. സ്‌കോര്‍ 166ല്‍ നില്‍ക്കെ ഷഫാലി പുറത്തായി. 78 പന്തില്‍ നിന്ന് 87 റണ്‍സാണ് ഷഫാലി നേടിയത്. പിന്നാലെ 24 റണ്‍സെടുത്ത് ജെമീമയും പുറത്തായി. അഞ്ചാം വിക്കറ്റില്‍ ഒന്നിച്ച ദീപ്തി ശര്‍മ്മയും (58) റിച്ച ഘോഷും (34) ചേര്‍ന്നാണ് ഇന്ത്യയെ മികച്ച സ്‌കോറിലെത്തിച്ചത്.