ഏകദിന പരമ്പരയില്‍ ന്യൂസിലന്‍ഡിനെതിരായ ആദ്യ മത്സരത്തില്‍ ഇന്ത്യയ്ക്ക് തകര്‍പ്പന്‍ ജയം. ഇന്ന് നടന്ന മത്സരത്തില്‍ നാല് വിക്കറ്റിനാണ് ഇന്ത്യ വിജയിച്ചത്. ന്യൂസിലന്‍ഡ് ഉയര്‍ത്തിയ 301 റണ്‍സ് വിജയലക്ഷ്യം ഓരോവര്‍ ബാക്കി നില്‍ക്കെ ഇന്ത്യ മറികടന്നു. തകര്‍പ്പന്‍ അര്‍ധ സെഞ്ചുറി നേടിയ സൂപ്പര്‍ താരം വിരാട് കോഹ്‌ലിയുടെയും നായകന്‍ ശുഭ്മാന്‍ ഗില്ലിന്റെയും ഇന്നിംഗ്‌സുകളുടെയും മികച്ച പ്രകടനം പുറത്തെടുത്ത ശ്രേയസ് അയ്യരുടെയും മികവിലാണ് ഇന്ത്യ വിജയലക്ഷ്യം മറികടന്നത്.

അവസാന ഓവറുകളിലെ കെ.എല്‍. രാഹുലിന്റെയും ഹര്‍ഷിത് റാണയുടെയും പ്രകടനവും ഇന്ത്യന്‍ വിജയത്തില്‍ നിര്‍ണായകമായി. 93 റണ്‍സെടുത്ത കോഹ്‌ലിയാണ് ഇന്ത്യയുടെ ടോപ്‌സ്‌കോറര്‍. എട്ട് ബൗണ്ടറിയും ഒരു സിക്‌സും അടങ്ങുന്നതായിരുന്നു കോഹ്‌ലിയുടെ ഇന്നിംഗ്‌സി. ഗില്‍ 56 റണ്‍സാണ് എടുത്തത്.

ശ്രേയസ് അയ്യര്‍ 49 റണ്‍സ് സ്‌കോര്‍ ചെയ്തു. രാഹുലും ഹര്‍ഷിതും 29 റണ്‍സ് വീതമാണ് എടുത്തത്. ന്യൂസിലന്‍ഡിന് വേണ്ടി കൈല്‍ ജാമീസണ്‍ നാല് വിക്കറ്റെടുത്തു. ആദിത്യ അശോക്, ക്രിസ്റ്റ്യന്‍ ക്ലര്‍ക്ക് എന്നിവര്‍ ഓരോ വിക്കറ്റ് വീതം വീഴ്ത്തി. ആദ്യം ബാറ്റ് ചെയ്ത ന്യൂസിലന്‍ഡ് 50 ഓവറില്‍ എട്ട് വിക്കറ്റ് നഷ്ടത്തിലാണ് 300 റണ്‍സെടുത്തത്. ഡാരല്‍ മിച്ചലിന്റെയും ഡിവോണ്‍ കോണ്‍വെയുടെയും ഹെന്റി നിക്കോള്‍സിന്റെയും അര്‍ധ സെഞ്ചുറികളുടെ മികലിവാണ് കിവീസ് മികച്ച സ്‌കോര്‍ പടുത്തുയര്‍ത്തിയത്.

84 റണ്‍സെടുത്ത ഡാരല്‍ മിച്ചലാണ് ന്യൂസിലന്‍ഡിന്റെ ടോപ്‌സ്‌കോറര്‍. 71 പന്തില്‍ അഞ്ച് ബൗണ്ടറിയും മൂന്ന് സിക്‌സും അടങ്ങുന്നതായിരുന്നു മിച്ചലിന്റെ ഇന്നിംഗ്‌സ്. ഹെന്റി 62 റണ്‍സും കോണ്‍വെ 56 റണ്‍സുമാണ് എടുത്തത്. അവസാന ഓവറുകളില്‍ ആഞ്ഞടിച്ച ക്രിസ്റ്റ്യന്‍ ക്ലര്‍ക്കിന്റെ ഇന്നിംഗ്‌സും നിര്‍ണായകമായി. 17 പന്തില്‍ 24 റണ്‍സാണ് ക്ലര്‍ക്ക് എടുത്തത്. ഇന്ത്യയ്ക്ക് വേണ്ടി ഹര്‍ഷിത് റാണയും പ്രസിദ് കൃഷ്ണയും മുഹമ്മദ് സിറാജും രണ്ട് വിക്കറ്റ് വീതം വീഴ്ത്തി. കുല്‍ദീപ് യാദവ് ഒരു വിക്കറ്റെടുത്തു.