ട്വന്റി20 ലോകകപ്പില്‍ നെതര്‍ലന്‍ഡ്‌സിനെതിരെ 17 റണ്‍സ് വിജയം നേടി ഇന്ത്യ. ഇന്ത്യ ഉയര്‍ത്തിയ 194 റണ്‍സ് വിജയലക്ഷ്യം പിന്തുടര്‍ന്ന നെതര്‍ലന്‍ഡ്‌സിന് 20 ഓവറില്‍ ഏഴു വിക്കറ്റ് നഷ്ടത്തില്‍ 176 റണ്‍സെടുക്കാന്‍ മാത്രമാണു സാധിച്ചത്. അര്‍ധസെഞ്ചറിയും രണ്ടു വിക്കറ്റുകളും സ്വന്തമാക്കിയ ശിവം ദുബെയാണു കളിയിലെ താരം.ഇതോടെ എ ഗ്രൂപ്പില്‍ ഒന്നാം സ്ഥാനത്തുള്ള ഇന്ത്യയ്ക്ക് എട്ടു പോയിന്റായി. സൂപ്പര്‍ എട്ട് റൗണ്ടില്‍ കരുത്തരായ ദക്ഷിണാഫ്രിക്കയാണ് ഇന്ത്യയുടെ ആദ്യ എതിരാളികള്‍.

ബാസ് ഡെ ലീഡ് (23 പന്തില്‍ 33), മിച്ചല്‍ ലെവിറ്റ് (23 പന്തില്‍ 24), കോളിന്‍ അക്കര്‍മാന്‍ (15 പന്തില്‍ 23), മാക്‌സ് ഒ!ഡൂഡ് (18 പന്തില്‍ 20) എന്നീ മുന്‍നിര ബാറ്റര്‍മാര്‍ മറുപടിയില്‍ നെതര്‍ലന്‍ഡ്‌സിനായി തിളങ്ങി. മറുപടി ബാറ്റിങ്ങില്‍ മുന്‍നിര ബാറ്റര്‍മാര്‍ പൊരുതിനോക്കിയെങ്കിലും ഇന്ത്യ ഉയര്‍ത്തിയ വലിയ വിജയലക്ഷ്യത്തിലേക്ക് എത്താന്‍ നെതര്‍ലന്‍ഡ്‌സിനു സാധിച്ചില്ല. ഓപ്പണിങ് വിക്കറ്റില്‍ 35 ഫണ്‍സാണ് റണ്‍സാണ് നെതര്‍ലന്‍ഡ്‌സ് അടിച്ചെടുത്തത്. എന്നാല്‍ 94 റണ്‍സെടുക്കുന്നതിനിടെ നാലു വിക്കറ്റുകള്‍ വീണത് ഓറഞ്ച് പടയെ പ്രതിരോധത്തിലാക്കി.

മൂന്നു മുന്‍നിര വിക്കറ്റുകള്‍ വീഴ്ത്തിയ ഇന്ത്യന്‍ സ്പിന്നര്‍ വരുണ്‍ ചക്രവര്‍ത്തിയാണ് നെതര്‍ലന്‍ഡ്‌സിന്റെ പ്രതീക്ഷകള്‍ തച്ചുടച്ചത്. അവസാന 12 ഓവറില്‍ 46 റണ്‍സായിരുന്നു നെതര്‍ലന്‍ഡ്‌സിനു ജയിക്കാന്‍ വേണ്ടിയിരുന്നത്. 20 ഓവറില്‍ ഏഴു വിക്കറ്റ് നഷ്ടത്തില്‍ 176 റണ്‍സെടുത്ത് നെതര്‍ലന്‍ഡ്‌സ് ബാറ്റിങ് അവസാനിപ്പിച്ചു. ലോവര്‍ ഓര്‍ഡറില്‍ സാക് ലിയോണ്‍ (16 പന്തില്‍ 26), നോവാ ക്രോസ് (12 പന്തില്‍ 25) എന്നിവരും പൊരുതിനിന്നു. നാലു കളികളില്‍ മൂന്നും തോറ്റ നെതര്‍ലന്‍ഡ് നേരത്തേ തന്നെ പുറത്തായിരുന്നു.

ടോസ് നേടി ബാറ്റിങ്ങിനിറങ്ങിയ ഇന്ത്യ 20 ഓവറില്‍ ആറു വിക്കറ്റ് നഷ്ടത്തില്‍ 193 റണ്‍സെടുത്തു. അര്‍ധ സെഞ്ചറി നേടി പുറത്താകാതെനിന്ന ശിവം ദുബെയാണ് ഇന്ത്യയെ മികച്ച സ്‌കോറിലെത്തിച്ചത്. 31 പന്തുകള്‍ നേരിട്ട ശിവം ദുബെ 66 റണ്‍സുമായി പുറത്താകാതെനിന്നു. ആറു സിക്‌സുകളും നാല് ഫോറുകളുമാണ് ദുബെ ബൗണ്ടറി കടത്തിയത്.