ട്വന്റി20 ലോകകപ്പില്‍ മൂന്നാം കിരീടത്തില്‍ മുത്തമിട്ട് ഇന്ത്യ ന്യൂസീലന്‍ഡിനെ 96 റണ്‍സിന് തോല്‍പ്പിച്ചു.256 റണ്‍സ് വിജയലക്ഷ്യം പിന്തുടര്‍ന്ന ന്യൂസീലന്‍ഡ് 19 ഓവറില്‍ 159 ന് പുറത്ത്. ഫൈനലില്‍ ഇന്ത്യ ഉയര്‍ത്തിയ കൂറ്റന്‍ ടോട്ടല്‍ ചേസ് ചെയ്യാനിറങ്ങിയ ന്യൂസീലന്‍ഡിന് തുടക്കം മുതല്‍ പിഴച്ചു. പവര്‍പ്ലേയില്‍ തന്നെ അവര്‍ക്ക് ആദ്യ മൂന്നു വിക്കറ്റും നഷ്ടമായി. മൂന്നാം ഓവറില്‍, . സെമിഫൈനലിലെ സെഞ്ചറി വീരനായ ഓപ്പണര്‍ ഫിന്‍ അലന്‍ (7 പന്തില്‍ 9) ആണ് ആദ്യം വീണത്. 'ലോക്കല്‍ ബോയ്' അക്ഷര്‍ പട്ടേല്‍, തിലക് വര്‍മയുടെ കൈകളില്‍ എത്തിച്ചാണ് അലനെ പുറത്താക്കിയത്. ഒന്നാം വിക്കറ്റില്‍ ടിം സെയ്ഫര്‍ട്ട്– ഫിന്‍ അലന്‍ സഖ്യം 31 റണ്‍സാണ് കൂട്ടിച്ചേര്‍ത്തത്. തൊട്ടടുത്ത ഓവറില്‍ മറ്റൊരു 'ലോക്കല്‍ ബോയ്' ജസ്പ്രീത് ബുമ്രയുടെ ബോളില്‍ ഇഷാന്‍ കിഷന്റെ കിടിലന്‍ ക്യാച്ചില്‍ രചിന്‍ രവീന്ദ്ര (2 പന്തില്‍ 1) രചിന്‍ പുറത്തായി. പവര്‍പ്ലേ അവസാനിക്കും മുന്‍പ് തന്നെ അക്ഷര്‍ അടുത്ത പ്രഹരവും കിവീസിനു നല്‍കി. അഞ്ചാം ഓവറില്‍ ഗ്ലെന്‍ ഫിലിപ്‌സിനെ ബൗള്‍ണ്ടാക്കിയതോടെ പവര്‍പ്ലേ അവസാനിക്കുമ്പോള്‍ 3ന് 52 എന്ന നിലയിലേക്കു വീണു കിവീസ്.

ലോകകപ്പില്‍ തുടര്‍ച്ചയായി മൂന്നാം അര്‍ദ്ധ സെഞ്ച്വറി നേടി മലയാളി താരം സഞ്ജു സാംസണ്‍. സെഞ്ച്വറി നേടുമെന്ന് ഉറപ്പിച്ച് നിന്ന ഘട്ടത്തിലാണ് സഞ്ജു വി സാംസണ്‍ പുറത്തായത്. 46 പന്തുകളില്‍ നിന്ന് 89 റണ്‍സാണ് മലയാളി താരം അടിച്ചെടുത്തത്. എട്ട് സിക്‌സറുകളും അഞ്ച് ബൗണ്ടറികളും ഇതില്‍ ഉള്‍പ്പെടുന്നു. ലോകകപ്പ് ഫൈനലില്‍ സെഞ്ച്വറി നേടുന്ന ആദ്യ ഇന്ത്യക്കാരന്‍ എന്ന റെക്കോഡിന് തൊട്ടടുത്താണ് താരം പുറത്തായത് എന്നത് ആരാധകരെ നിരാശരാക്കി.

സൂപ്പര്‍ എട്ടിലെ അവസാന മത്സരത്തില്‍ വിന്‍ഡീസിനെതിരെ 97 റണ്‍സെടുത്ത് പുറത്താകാതെ നിന്ന സഞ്ജു സെമിയില്‍ ഇംഗ്ലണ്ടിനെതിരെയും 89 റണ്‍സാണ് നേടിയത്. ലോകകപ്പിന്റെ സെമിയിലും ഫൈനലിലും അര്‍ദ്ധ സെഞ്ച്വറി നേടുന്ന മൂന്നാമത്തെ മാത്രം താരം എന്ന റെക്കോഡും തിരുവനന്തപുരത്തുകാരന്‍ സ്വന്തം പേരിലാക്കി. സെഞ്ച്വറി അല്ല മറിച്ച് ടീമിന് വേണ്ടി പരമാവധി റണ്‍സ് എന്നതാണ് തന്റെ ലക്ഷ്യം എന്ന് സെമിക്ക് ശേഷം ഉള്ള പ്രതികരണത്തില്‍ സഞ്ജു സാംസണ്‍ വ്യക്തമാക്കിയിരുന്നു.